VOV4.Êđê -  Aguah mbrue (13/4), Êpul kiă kriê bruă Đảng ƀuôn prŏng Hồ Chí Minh gưl 11, wưng păn bruă 2020 – 2025, mkŏ mjing klei bi kƀĭn tal 5, ti gŭ klei kiă kriê mơ̆ng Khua hlăm phŭnbruă kđi čar, Khua bruă Đảng ƀuôn prŏng Hồ Chí Minh Nguyễn Văn Nên. Blŭ hrăm gĭt gai ti anôk bi kƀĭn ñu lač, hlăm 3 mlan akŏ thŭn, ƀuôn prŏng Hồ Chí Minh mđing kiă kriê, mjing djăp klei găl mă bruă mâo klei tŭ dưn, djăp knơ̆ng dhar bruă hlue ngă kjăp dŭmbruă čuăn, bi leh bruă mdua Mđĭ kyar klei duh mkra êjai, lehanăn mdrơ̆ng hŏng klei ruă tưp êjai. Khua bruă Đảng ƀuôn prŏng ăt mtă hlăm 3 mlan gưl 2, ƀuôn prŏng ngă mta kñăm mrô sa jing mdrơ̆ng hŏng klei ruă tưp, ngă jăk bruă prăp êmiêt klei ruah khua, lehanăn čuăl mkă ƀuôn prŏng Hồ Chí Minh, ƀuôn prŏng Thủ Đức, mprăp klei bi tuôm hŏng dŭm êpul grŭp ala tač êngao hhlăm dŭm bruă ngăn prăk, knơ̆ng prăk, lehanăn bruă mjuăt bi hriăm./.

Y Khem pô mblang