VOV4.Êđê- Êpul kiă kriê bruă Đảng čar Kontum mrâo mâo leh mmông mă bruă hŏng Êpul bruă Đảng kdriêk Ngọc Hồi. Ti anôk ngă bruă, Êpul kiă kriê bruă Đảng kdriêk Ngọc Hồi mâo leh klei akâo kơ Êpul kiă kriê bruă Đảng čar Kontumlŏ dơ̆ng bi klă kdriêk Ngọc Hồi mguôp hŏng alŭ wăl duh mkra ƀăng jang knông lăn Bơ Y lehanăn dŭm bruă krĭng duh mkra phŭn hlăm čar, čiăng mtrŭt bruă duh mkra, đru kơ kdriêk mâo klei găl dưi iêu jak phung duh mkra hrie duh bi liê, mđĭ kyar bruă nah gŭ pioh kơ klei duh mkra mnia mblei, rŭ mdơ̆ng bi leh kdriêk djăp ênoh čuăn ƀuôn prŏng mta 4. Klah čŭn ti anôk bi kƀĭn Dương Văn Trang, khua bruă Đảng čar Kontum mtă kơ kdriêk Ngọc Hồi ksiêm duah hdră mghaih msir djăp mta klei dleh kpăk kơ bruă mđĭ kyar klei duh mkra mnia mblei, mđĭng kơ bruă mđĭ kyar lŏ hma pla mjing ênuk mrâo, bi mlih mnơ̆ng pla mjing hŏng djăp mta ana boh kroh djŏ guôp hŏng lăn ala yan adiê hlăm kdriêk, pŏk phai ênhă pla ana măkka pioh mđĭ kyar bruă duh mkra, kiă kriê, gĭt gai bi kjăp 5 boh să djăp ênoh čuăn krĭng ƀuôn sang mrâo, lŏ dơ̆ng djăp ênoh čuăn mrâo kơ klei mkŏ mkra krĭng ƀuôn sang mrâo, amâodah să krĭng ƀuôn sang mrâo mâo klei thâo bi hmô./.

Pô mblang: Y-Khem Niê