VOV4.Êđê- Tlam hruê 15/3, ti wăl krah Lộc Thắng, kdriêk Bảo Lâm, čar lâm Đồng, Dhar bruă Kreh knhâo, kdrăp mrâo lehanăn wăl hdĭp mda mơ̆ng Quốc hội mâo leh mmông mă bruă hŏng Êpul bruă Bauxit - ksueh Tân Rai (Lâm Đồng) lehanăn Nhân Cơ (Dak Nông) kơ bruă hluê ngă dŭm klei ba mdah mơ̆ng êpul ksiêm dlăng lehanăn boh tŭ msir mghaih dŭm klei gun kpăk hluê si klei hưn mdah.

Hluê si klei hưn mơ̆ng Êpul group tuh tia mkra mjing Hdăng – Mnơ̆ng gŭ lăn Việt Nam hlăm thŭn 2020, khădah tlă anăp hŏng lu klei dleh dlan kyua hmăi mơ̆ng klei ruă Covid 19 ƀiădah jih 2 sang maĭ Bauxit Tân Rai lehanăn Nhân Cơ ăt rơ̆ng kjăp hdră ngă bruă. Hlăm anăn, sang maĭ Tân Rai mkra mjing mâo êbeh 707.000 ton alumin, hnơ̆ng hrui wĭt mâo 2.700 êklai prăk, prăk mnga mâo mơ̆ng hdră bruă duh mkra pla mjing truh 62,2 êklai prăk, sang maĭ Nhân Cơ mkra mjing êbeh 715.000 ton, hnơ̆ng hrui wĭt mâo 2.900 êklai prăk hŏng ênoh prăk mnga mâo giăm 29 êklai prăk.

Kơ bruă răng mgang wăl hdĭp mda, dŭm sang maĭ mâo klei gĭr hlăm bruă pŏk ngă mđrăm mbĭt dŭm hdră msir gang mkhư̆ klei čhŏ djhan mơ̆ng bruă mkra mjing; hnơ̆ng doh wăl hdĭp msa, wăl anôk riêng gah dưi mkra mđĭ jăk siam. Blŭ hrăm klah čŭn ti anôk mă bruă, êpul mtă brei lŏ hluê ngă kjăp dŭm klei ba mdah mơ̆ng êpul ksiêm dlăng kơ bruă răng mgang wăl hdĭp mda lehanăn pla ana kyâo mtah lŏ krŭ wĭt wăl anôk jăk siam hlăm wăl anôk sang maĭ Alumin Nhân Cơ.

Pô mblang: H’Nêč Êñuôl