VOV4.Êđê - Hrue 11/5 mrâo êgao, Êpul mă bruă mơ̆ng Anôk bruă lĭng kahan alŭ wăl 5 mâo Trung tướng Thái Đại Ngọc, Khua hlăm bruă Đảng gưl dlông, Khua êpul kahan alŭ wăl 5 ngă khua êpul mă bruă hŏng čar Dak Nông kơ bruă klam lĭng kahan -răng mgang ala čar thŭn 2021.

Tui hluê klei hưn mdah, ngă klei gĭt gai, klei kčĕ mơ̆ng bruă Đảng čar, bruă sang čư̆ êa čar Dak Nông, hlăm dŭm hruê mmông leh êgao, êpul răng mgang klei êđăp ênang čar Dak Nông tui dlăng nanao boh klei, bruă klam leh anăn klei jing hlăm alŭ wăl, mâo klei bi mguôp hŏng dŭm gưl bruă, dhar bruă dưi ksiêm dlăng kjăp boh klei, hmar hưn mdah hŏng gưl bruă Đảng nah gŭ, bruă sang čư̆ êa srăng ngă kjăp bruă lĭng kahan hlăm alŭ wăl. Dŭm alŭ wăl, anôk bruă srăng ngă jăk dŭm mta bruă mprăp kơ klei ba jao leh anăn tŭ drông kahan mrâo thŭn 2021, rơ̆ng kơ klei êđăp ênang, dưi mâo 100% hnơ̆ng čuăn kčah. Mâo giăm 1000 čô phung hđeh êdam êra hlăm čar nao  ngă kahan. Knăm ba jao lĭng kahan hlăm dŭm kdriêk, ƀuôn prŏng dưi mkŏ mjing hŏng klei kdrưh k’ang, mjêč leh anăn mâo klei êđăp ênang hlăm wưng klei ruă tưp Covid dôk dleh dưi ksiêm dlăng. Dŭm čô hđeh êdam êra nao ngă kahan gưl anei tui ngă bruă čuăn lĭng kahan hlăm dŭm anôk: phŭn bruă kahan ksiêm, anôk bruă kdrăp lĭng kahan (phŭn bruă lĭng kahan), Êpul kahan răng gang wăl adiê 234, êpul lĭng kakan mrô 3 (phŭn bruă lĭng kahan), Lữ đoàn 573 (kahan alŭ wăl 5), knơ̆ng bruă gĭt gai lĭng kahan čar, lĭng kahan knông lăn lehanăn êpul kahan ksiêm hlăm čar.

Dŭm klei nao gak, mprăp kơ klei bi blah hlăm dŭm anôk bruă dưi mâo ngă jăk. Dŭm êpul răng mgang klei êđăp ênang čar Dak Nông mâo klei bi mguôp mkŏ mkra anôk ksiêm dlăng hlăm dŭm êlan điêt, êlan hnoh ti knông lăn, mâo klei guôp hlăm bruă gang mkhư̆ klei ruă tưp covid-19 mâo boh tŭ dưn. Êpul răng mgang klei êđăp ênang hrăm mbĭt hŏng êpul kahan ksiêm, kahan răng mgang knông lăn mkŏ mjing jăk bruă mprăp kơ klei bi blah leh anăn rang mgang klei ruah khua pô bi ala Quốc Hội gưl 15 leh anăn HĐND dŭm gưl wưng thŭn 2021-2026, đru hlăm klei rơ̆ng kjăp bruă kđi čar, klei êđăp ênang yang ƀuôn hlăm alŭ wăl čar.

Blŭ hlăm klei mă bruă anăn, k’iăng khua gĭt gai bruă sang čư̆ êa čar Dak Nông Lê Trọng Yên mñă klă, dŭm êpul bruă Đảng nah gŭ, bruă sang čư̆ êa mâo nanao klei uêñ mĭn mkŏ mjing êpul răng mgang klei êđăp ênang kjăp ktang leh anăn kluôm ênŭm, dưi ngă leh bruă klam. Bruă dưi kpăt mă, ksiêm duah leh anăn mgaih msir dŭm boh klei dôk mâo, lŏ mâo, amâo dưi lui mâo dŭm anôk rŭng răng, đru hlăm bruă mkŏ mkra klei găl dưi mđĭ kyar bruă duh mkra, rơ̆ng kơ klei hdĭp hlăm yang ƀuôn. Boh nĭk nak, čar Dak Nông mâo klei uêñ mĭn, kriê dlăng, mđĭ ai leh anăn brei mnơ̆ng dhơ̆ng kơ dŭm êpul răng mgang klei êđăp ênang hruê mlam hlăm dŭm anôk gak, gang mkhư̆ klei ruă tưp Covid-19 ti knông lăn.

K’iăng bruă sang čư̆ êa čar Dak Nông ăt mtă kơ anôk bruă gĭt gai lĭng kahan alŭ wăl 5 mâo klei duh mĭn, gĭt gai, kčĕ leh anăn đru kơ čar Dak Nông dưi ngă bruă klam mđĭ kyar bruă duh mkra leh anăn rơ̆ng kơ klei êđăp ênang ala čar, boh nĭk hrăm mbĭt hŏng čar mgaih msir dŭm klei kpăk êgun djŏ tuôm hŏng lăn pioh kơ bruă răng mgang klei êđăp ênang ala čar.

Blŭ hlăm klei mă bruă, mbĭt hŏng bruă čih yap, yap yuôm bhăn dŭm boh tŭ dưn dưi mâo leh, Trung tướng Thái Đại Ngọc – khua bruă Đảng gưl dlông, khua hlăm anôk bruă kahan alŭ wăl 5 mñă, êpul răng mgang klei êđăp ênang čar Dak Nông srăng lŏ mđĭ bruă hưn mdah kơ bruă sang čư̆ êa hlăm alŭ wăl, dŭm gưl bruă dưi ngă jăk bruă klam lĭng kahan leh anăn klei êđăp ênang ala čar thŭn 2021 lehanăn rơ̆ng kjăp dŭm hdră êlan mprăp kơ klei bi blah, mkŏ mjing dŭm hdră čiăng răng mgang kơ dŭm anôk bruă…

Êpul răng mgang klei êđăp ênang čar Dak Nông čiăng lŏ bi mguôp kjăp hĭn hŏng dŭm gưl, dhar bruă čiăng dưi păn kjăp ai tiê klei mĭn, mgaih msir jăk klei êđăp ênang hlăm alŭ wăl. Ti anăp srăng bi mguôp hŏng dŭm gưl bruă Đảng nah gŭ, bruă sang čư̆ êa hlăm bruă gang mkhư̆ klei ruă tưp Covid-19, răng mgang klei ruah khua pô bi ala Quốc Hội gưl 15 leh anăn HĐND dŭm gưl wưng thŭn 2021-2026 mâo klei êđăp ênang leh anăn mâo boh tŭ dưn