VOV4.Êđê -  Hlăm 3 mlan gưl I thŭn 2021, êpul ksiêm dlăng hlăm êlan klông čar Gia Lai thâo ƀuh, đŭ bi kmhal dŭm pluh êpul bruă, mnuih ngă soh dŭm klei kčah mtrŭn kơ êlan klông, dŭ mdiăng, hŏng ênoh prăk êbeh 3 êtuh êklăk prăk. Klă klơ̆ng, hlăm bruă ksiêm dlăng, đŭ bi kmhal kơ klei êđăp ênang hlăm êlan klông, êpul kahan ksiêm mơ̆ng Knơ̆ng bruă êlan klông dŭ mdiăng Gia lai mkŏ mjing ksiêm dlăng 160 gưl êdeh êdâo, đŭ bi kmhal hŏng prăk 22 êpul bruă, 40 čô mnuih hŏng 209 êklăk prăk, mă hră brei mgăt êdeh mâo wưng kčah hŏng 9 čô mnuih, mă 13 hră brei dŭ mdiăng, brei suai mă 38,6 ton mnơ̆ng dhơ̆ng.

Dŭm klei ngă soh khăng mâo jing mdiăng mnơ̆ng êgao hnơ̆ng kčah, msiăng êbeh boh dlông djưi brei, amâo mâo hră mơar tui si hdră kčah, nao hlăm êlan kăm… Hŏng êdeh êdâo dŭ mdiăng tuê, mâo 20/46 êdeh ksiêm dlăng mâo klei ngă soh, hŏng ênoh prăk đru bi kmhal mâo giăm 100 êklăk prăk. Boh nik, hlăm gưl Tết Nguyên đán Tân Sửu, êpul kahan ksiêm mâo mă leh anăn msir mgaih 121 klei hâo hưn kơ phung tuê lač kơ bruă amâo lŏ dưi bi mloh, tla hră đĭ êdeh leh amâo lŏ đĭ êdeh nao ti anôk čiăng kyua hmaĭ mơ̆ng klei ruă Covid-19 ti čar.

H Zawut pô mblang