VOV4.Êđê - Tui hluê hdră mtrŭn mơ̆ng phŭn bruă mtô mjuăt leh anăn sang hră mơar kơ bruă bi êdah klei bhiăn hlăm klei bi lông bi ruê klei hriăm gưl 3, bruă sang čư̆ êa čar Gia Lai mâo leh klei tŭ ư srăng bi mklă hdră êlan mkŏ mkra klei bi lông bi ruê̆ hriăm jih gưl 3 thŭn 2021. Bruă sang čư êa čar Gia Lai mâo leh klei mtă kơ khua knơ̆ng bruă klei mtô mjuăt leh anăn sang hră mơar srăng bi mguôp hŏng dŭm knơ̆ng, dhar bruă djŏ tuôm srăng mkŏ mkra klei bi lông jih gưl 3 thŭn 2021 dưi mâo klei êđăp ênang, klă mngač, djŏ hdră bhiăn boh nĭk nak hlăm klei êđăp ênang êjai wưng klei ruă tưp Covid- 19 dôk dleh kơ klei dưi ksiêm dlăng. Klei bi lông bi ruê̆ klei hriăm jih gưl tlâo thŭn anei srăng mkŏ mjing hlăm 2 hruê 7 leh anăn 8/7 hŏng 5 mta bi lông: 3 klei bi lông hjăn mâo Toán, Ngữ văn, Ngoại ngữ lehanăn 2 klei bi lông mbĭt Khoa học tự nhiên, Khoa học xã hội. Dŭm anôk bruă mâo klei bi mklă bi lông ti alŭ wăl čar Gia Lai srăng ngă bruă tŭ mă hră mơar mơ̆ng dŭm čô hđeh sang hră hlăm klei bi lông anăn mơ̆ng hruê 27/4 lehanăn srăng mjưh hlăm 5 mmông tlam hruê 11/05/2021.

H Zawut pô mblang