VOV4.Êđê - Klei hâo hưn čar Gia Lai hưn mdah hdră kčah akâo bi mlih êbeh  8 êbâo ha lăn dliê hrông ti să knông lăn Ia Mơr, kdriêk Čư̆ Prông jing lăn lŏ hma čiăng ngă krĭng krih pioh krih mơ̆ng bruă rŭ mkra knơ̆ng kdơ̆ng êa Ia Mơr ngă kơ klei bi rai dliê mjing lăn pla mjing mơ̆ng mnuih ƀuôn sang alŭ wăl đĭ lu. Klei anei ngă kơ bruă kriê dlăng, răng mgang dliê ti krĭng wăl anei dleh dlan leh, ară anei lŏ dleh dlan lu hĭn.

Knŏng sa mlam 15/4, mâo êbeh 3.300 m² dliê ti lô 1, čuê 1, wăl dliê mrô 1001, đang dliê mơ̆ng anôk bruă kriê dlăng dliê akŏ êa Ia Mơr (kdriêk čư̆ Prông), kbưi hŏng mnuôr êa phŭn mơ̆ng knơ̆ng êa Ia Mơr hlăm ƀrô 100m êlan čim phiơr, arăng čuh pui ƀơ̆ng jih. Ana kyâo mâo klei druôm lehanăn ba mđuê̆, phŭn kyâo ăt dôk mâo săp pui, lehanăn pui dôk trơ̆ng. Nao ksiêm dlăng anôk anăn, Nguyễn Tuấn Anh, k’iăng khua bruă sang čư̆ êa să Ia Mơr brei thâo, anei jing klei bi rai dliê čiăng mă lăn pla mjing. Truh kơ ară anei, tĭng hjăn să Ia Mơr, mnuih ƀuôn sang mâo truh 500 ha hma dôk mpluă mbĭt hŏng dliê kmrơ̆ng dlăng msĕ hŏng mlâo êmông brêč. Klă mngač, bruă ksĭng mmiă lăn dliê mâo leh mơ̆ng êlâo lehanăn dơ̆ng čuê mơ̆ng thŭn anei truh kơ thŭn mkăn: “Hŏng hdră êlan, hlăm sa yan diñu srăng tư̆ mă điêt, phŭn kčưm diñu mkrieo kyâo, klăk hĕ klĭt ana kyâo čiăng ana kyâo anăn djiê, lehanăn srăng pla asăr kñŭl čiăng truh kơ yan êdei kñŭl srăng mâo klei čăt đĭ”

Đinh Văn Khẩn, khua êpul kriê dlăng dliê Ia Mơr, anôk bruă dôk kriê dlăng hlăm ƀrô 4000/8000 ha dliê hrông, mâo leh klei akâo kơ Quốc Hội srăng brei bi mlih jing lăn pla jing bruă lŏ hma lehanăn ngă anôk krih mơ̆ng anôk mkăp êa Ia Mơr. Mơ̆ng jih thŭn 2020 truh kơ ară anei, klei mmiă lăn dliê čiăng ngă lŏ hma jing lu êdi, tui hluê anăn, hlăm mlan 1, pô dliê hmao ƀuh 4 klei tlĕ ksĭng mmiă hŏng ênhă êbeh 5 sao, ƀiădah truh kơ jih mlan 3 mâo truh kơ 29 klei tlĕ ksĭng mmiă hŏng ênhă lăn truh kơ giăm 4 ha. Hlăm anăn dưi čih yap dŭm klei tlĕ mmiă thâo kral pô ngă, lehanăn hlăm ênhă prŏng dliê kmrơ̆ng ka thâo ôh pô bi rai, phung bi rai dliê kyâo mâo klei mprăp srăng bi kdơ̆ng hŏng êpul răng mgang dliê tơdah hmao ƀuh diñu. “Êjai phung ayŏng adei nao ksiêm dlăng hlăm mmăt mlam, kyuadah phung ayŏng adei nao ksiêm dlăng jing ƀiă, tơdah hmao ƀuh phung bi rai dliê, phung anăn srăng đua mnal đuôn jŭ guôm hĕ jih bô̆ mta, knŏng lui mă 2 săr ală lehanăn djă dhŏng kgă tiŏ koh phung ayŏng adei hiu ksiêm dlăng dliê. Tơdah ƀuh lu phung ayŏng adei, diñu srăng đuê̆ dăp hlăm dliê, amâo dưi thâo kral diñu ôh. Truh kơ ară anei phung ayŏng adei knŏng mâo mdei sa hruê hlăm hruê kăm, lehanăn bi mlih kơ hruê mdei.”

Phạm Vũ Tú, k’iăng khua bruă sang čư̆ êa să čư̆ Prông brei thâo, ti alŭ wăl mâo 8000 ha dliê hrông dưi mâo leh klei akâo truh kơ Quốc Hội srăng brei bi mlih jing lăn pla mjing bruă lŏ hma lehanăn mâo leh êa krih mđoh mơ̆ng anôk mkăp êa Ia Mơr, ară anei amâo sa pô dliê lehanăn sa alŭ wăl dôk kriê dlăng. Mơ̆ng knhal jih thŭn 2020 truh kơ ară anei, hlăm kdriêk lŏ mkŏ mjing thiăm 5 êpul mă lu bruă msĕ si: bruă ksiêm dlăng knông lăn, kahan ksiêm, phung kriê dlăng dliê bi mguôp hŏng pô dliê lehanăn bruă sang čư̆ êa hlăm alŭ wăl, tui ngă bruă hiu ksiêm dlăng. Khădah anei jing hdră êjai đuič lehanăn dleh dưi ngă bruă čiăng gang mkhư̆ klei ksĭng mmiă lăn dliê: “Dŭm êpul bruă ksiêm dlăng mkŏ mkra leh anôk ksiêm dlăng hlăm dŭm anôk kreh tuôm hŏng klei luič dliê, 2 anôk bruă kriê dlăng jing pô dliê, dŭm să mâo dliê čiăng ngă ktang hĭn klei kriê dlăng lehanăn răng mgang dliê. Hlăm klei mĭn hmei srăng ngă kjăp hĭn bruă kriê dlăng lehanăn răng mgang dliê, biădah ngă bruă anăn jing dleh êdi.”

Êjai lăn dliê kmrơ̆ng ka dưi bi mlih jing lăn pla mjing ôh, dliê kmrơ̆ng Ia Mơr mâo klei bi rai lu leh. Ară anei tơdah amâo mâo hdră êlan gang mkhư̆ hŏng klei tŭ dưn, mâo djŏ ôh knŏng ênhă mâo leh klei akâo čiăng bi mlih, ƀiădah anăp srăng mâo klei bi rai wăt kơ alŭ wăl dliê prŏng ti knông lăn srăng jing đang hma msĕ mơh.