VOV4.Êđê- Lăn dap kngư hlăk dôk hlăm yan bhang thu krô, adiê mđiă hlơr sui hlăm wưng êgao ngă kơ dŭm pluh êbâo ha dliê ti čar Gia Lai dôk ti anăp klei huĭ srăng bluh mâo klei pui ƀơ̆ng dliê. Čiăng pral mâo hdră gang mkhư̆ klei pui ƀơ̆ng dliê, alŭ wăl čih mkra leh hdră kčah, mbĭt anăn pŏk ngă lu hdră mđrăm mbĭt kñăm dưi mdrơ̆ng hŏng djăp klei mâo.

Jih jang mnuih ƀuôn sang ti ƀuôn Đôch 1, să Ia Kreng, kdriêk Chư Pah, tŭ mă leh bruă srăng răng mgang, kriê dlăng 700 ha dliê mơ̆ng dhar bruă kriê dlăng dliê akŏ êa Ia Ly. Hlăm dŭm hruê knhal tuič mlan 3, adiê mđiă ktang ngă kơ wăl dliê anei mâo lu rơ̆k krô, asuah mbô, ênưih truh kơ klei pui ƀơ̆ng dliê. Čiăng mâo klei gang mkhư̆ êlâo, ƀuôn Đôch 1 mkŏ mjing lu êpul êya nao ksiêm dlăng, mkŏ mkra lu anôk ksiêm dlăng, hiu ksiêm dlăng hrue mlam. Boh nik, anôk bruă anei mâo hdră êlan nao čuh tir djah krô ti gŭ ana kyâo mâo klei ksiêm dlăng ti lu anôk mâo klei ênưih pui ƀơ̆ng hĭn. Rơ Chăm Ho, ƀuôn Đôch 1, să Ia Kreng, kdriêk Chư Pah, jing sa hlăm dŭm gŏ sang nao hlăm bruă răng mgang, kriê dlăng dliê brei thâo:

“Leh mâo klei yua mă bruă anăn, hmei dưi mkŏ mjing leh 4 êpul êya čiăng nao hiu ksiêm dlăng grăp hruê, hur har hlăm bruă răng kriê dliê, tơdah mâo pui ƀŏng dliê srăng bi mguôp mbĭt hŏng dŭm êpul êya mơ̆ng bruă sang čư êa, êpul kahan ksiêm, ngă djăl bruă prah pui mâo dah truih pui ƀơ̆ng dliê hŏng klei hmar.”

Mnuih ƀuôn sang ƀuôn Đôč 1 čuh krô ti gŭ ana kyâo gang mkhư̆ klei pui ƀơ̆ng dliê

Dhar bruă kriê dlăng dliê akŏ êa Ia Ly dôk răng kriê êbeh 12.500 ha dliê krơ̆ng. Mơ̆ng phŭn kčưm yan mđiă không, anôk bruă dăp leh bruă kơ dŭm čô knuă druh, mnuih mă bruă mâo klei nao ksiêm dlăng nanao, thâo bĭt êlan klông hlăm alŭ wăl, dưi mkŏ mkra hdră êlan 4 ti anôk dôk, mbĭt hŏng anăn srăng mkŏ mjing dŭm êpul êya hlăm bruă gang mkhư̆ klei pui ƀơ̆ng dliê hŏng ênoh mnuih truh kơ dŭm êtuh čô. Anôk bruă ăt dôk ngă dŭm hdră êlan nao hiu čuh tir djah krô ti gŭ ana kyâo tơdah mâo klei gal, mkŏ mjing êlan mnuôr gang pui ti dŭm anôk dliê ênưih mâo klei pui ƀơ̆ng.

Phạm Thành Phước, khua dhar bruă kriê dlăng dliê akŏ êa Ia Ly, kdriêk Chư Pah, čar Gia Lai brei thâo, khădah lu ênhă dliê dhar bruă kriê dlăng hlăm lu alŭ wăl, ƀiădah dhar bruă dưi ngă leh lu hdră êlan čiăng mkhư̆ gang klei pui ƀơ̆ng dliê. Hlăm anăn jing mâo lu klei bi mguôp ai tiê mơ̆ng mnuih ƀuôn sang đru kơ dhar bruă, hiu tir waih djah krô lehanăn čuh djah anăn mâo klei ksiêm dlăng čiăng gang mhkư̆ kơ klei truh pui ƀơ̆ng dliê.

“Hlăm yan bhang mđiă ktang ti Lăn Dap Kngư mâo klei thu đrưiñ êdi, ênưih truh kơ klei pui ƀơ̆ng dliê srăng mâo hlăm grăp hruê mmông, kyuanăn dhar bruă mkŏ mjing leh êpul gĭt gai bruă gang mkhư̆ klei pui ƀơ̆ng dliê, bi êdah lu hdră êlan, mkra klei kuôl klă hŏng yang ƀuôn, dŭm gŏ sang dôk hdĭp jĕ giăm dliê, lehanăn bi mklă klei kuôl kă hŏng dŭm anôk bruă dôk ti dlông dhar bruă anei lehanăn dŭm anôk bruă sang čư êa grăp să dưi mbha bruă kơ dŭm anôk ksiêm dlăng, hŏng pô hưn tơdah mâo klei pui ƀơ̆ng, lehanăn ya dŏ bruă ngă čiăng hmao mghaih msir mtam  klei pui ƀơ̆ng dliê.

Pô mblang: Y-Khem Niê