VOV4.Êđê - Mbĭt hŏng kluôm ala, Anôk bruă răng mgang klei êđăp ênang hlăm êlan klông čar Gia Lai mkŏ mjing Knăm trŭn ngă bruă hâo hưn, mtô mblang hdră bhiăn leh anăn hiu ksiêm dlăng đŭ bi kmhal klei ngă soh, klei êđăp ênang hlăm êlan klông hlăm êpul êdam êra mnuih djuê ƀiă kñăm bi hrŏ klei bi drăm hlăm êlan klông hlăm krĭng mnuih djuê ƀiă mơ̆ng čar.

Tui hlue dhar bruă răng mgang klei êđăp ênang hlăm êlan klông čar Gia Lai, ti dua mlan akŏ thŭn anei, hlăm čar Gia lai mâo 56 klei bi drăm êdeh êdâo hlăm êlan klông jing kjham êdi, ngă kơ 46 čô mnuih djiê lehanăn dŭm pluh čô mnuih êka êkeh. Êbeh krah wah hlăm anei jing phung hđeh êdam êra mnuih djuê ƀiă. Tĭng knŏng hjăn să Ia Hrŭ mâo truh 5 čô mnuih djiê leh, Huỳnh Thái Nghiêm, Khua bruă sang čư̆ êa să Ia Hrŭ, kdriêk Čư̆ Pưh brei thâo, jih 5 čô anei amâo mâo pô đua đuôn mgang boh kŏ ôh, 2 čô ka mâo ôh hră dưi djă êdeh môtô. Hŏng boh phŭn klă anei Huỳnh Thái Nghiêm lač, sa kdrêč ăt soh mơ̆ng amĭ ama kyua m’ŭng đei kơ anak mơ̆ng mnuih buôn sang hlăm alŭ wăl. Gŏ sang m’ŭng dei kơ anak kơ klei đĭ hiu êdeh êdâo, khădah dôk hŏng klei knap mñai ƀiădah ăt gĭr tĭr blei sa boh êdeh kơ anak. Nao đĭ êdeh hlăm êlan klông kƀah klei thâo săng, kyuanăn mâo lu klei truh amâo jăk msĕ sơnăn, mnuih hlăm gŏ sang kdjăt, amâo mĭn ôh anak aneh truh kơ prŏng leh, đĭ êdeh hlăm êlan klông tuôm hĕ klei truh sơnăn. Jih jang diñu bŏ hŏng klei ênguôt hnĭng.

Ksiêm dlăng hlăm dŭm klei bi drăm êdeh êdâo hlăm anôk mnuih djuê ƀiă, dhar bruă răng mgang klei êđăp ênang hlăm êlan klông čar Gia Lai brei thâo, hlăm anăn jing lu hđeh êdam êra, mnuih mă bruă klă klơ̆ng hlăm gŏ sang, klei truh anei mâo kyua dŭm klei đĭ hiu êdeh ƀiădah ka truh thŭn dưi djă êdeh ôh, djă êdeh môtô prŏng, yua kpiê êsei, đĭ êgao hnơ̆ng dưi brei êran. Amâo đua đuôn mgang boh kŏ, đĭ amâo djŏ klông êlan... ka mâo klei dưi hmao ƀuh lehanăn hmao gang.

Nguyễn Văn Hạnh, K’iăng Khua knơ̆ng bruă hlăm êlan klông lehanăn dŭ mdiăng, khua êpul bruă êđăp ênang hlăm êlan klông čar Gia lai brei thâo, hlăm klei hâo hưn, mtô mhriăm klei bhiăn lehanăn hruê kăm hiu duah ksiêm dlăng klei ngă soh, răng mgang klei êđăp ênang ti êlan klông hlăm phung hđeh êdam êra mnuih djuê ƀiă, mâo klei kñăm čiăng mđĭ klei hlue gưt hdră bhiăn mơ̆ng ala čar hlăm bruă rang mgang klei êđăp ênang hlăm êlan klông ti anôk alŭ wăl, anôk mâo lu mnuih djuê ƀiă, boh nik hlăm anôk mâo êlan dơ̆ng prŏng ala čar găn djŏ. Hlăm anăn čar Gia lai kñăm kơ dŭm hdră êlan bi mguôp klei hâo hưn lehanăn bi kmhal ktang dŭm čô ngă soh hŏng hdră bhiăn ala čar kơ bruă răng mgang klei êđăp ênang hlăm êlan klông:Tal sa, čiăng bi mguôp bruă hâo hưn kluôm ênŭm lehanăn mtrŭt mjhar kơ dŭm čô êdam êra yua kpiê êsei mâo bruă ngă amâo jăk êjai nao hlăm êlan klông. Tal 2 bruă ksiêm dlăng amâo djŏ knŏng êlan dơ̆ng prŏng ala čar ôh  ƀiădah wăt kơ dŭm êlan dơ̆ng điêt hlăm alŭ wăl. Boh nĭk êlan bi kuh anôk lu mnuih găn kbiă ti êlan dơ̆ng prŏng ala čar.

Nao hlăm knăm mtrŭt mjhar, ayŏng Siu Hiên (ƀuôn Rŭ Rưng, să Ia Hrŭ) brei thâo:Kâo pô êdei dih, tơdah nao hlăm klei đĭ êdeh êdâo hlăm êlan klông srăng ngă djŏ tui si hdră bhiăn, klei bhiăn mâo leh mơ̆ng Đảng lehanăn knŭk kna. Êlâo kơ đĭ êdeh kbiă kơ êlan srăng đua đuôn mgang boh kŏ, amâo mâo mnăm kpiê êsei, đĭ djŏ klông êlan, amâo bi kčao đĭng săp pui êdeh.

Hlăm mmông hâo hưn, mtô lač klei bhiăn mơ̆ng hră bhiăn lehanăn hruê kăm hiu duah ksiêm dlăng, bi kmhal dŭm čô ngă soh hŏng hdră bhiăn hlăm klei êđăp ênang hlăm êlan klông kyua phung hđeh êdam êra mơ̆ng čar Gia Lai hlăm mlan 3, srăng mkŏ mjing mơ̆ng ară anei truh mlan 6 ...