VOV4.Êđê - Adiê không amâo hjan sui, êa mur leh anăn dŭm êa knơ̆ng kdơ̆ng êa khuôt anăn lu ênhă mdiê yan Puih Mnga ti kdriêk Čư̆ Pah, čar Gia Lai djiê krô. Hŏng dŭm gŏ êsei mâo mdiê jing phŭn hrui wĭt, snăn yan anei jing luič liê mang.

Dlăng kơ kdrăn lŏ Ia Sah jing sa êa mil kñĭ krô msĕ pui trơ̆ng, Rơ Chăm Chĭu, ti buôn Mrông Yô̆ 2, să Ia ka, kdriêk Čư̆ Pah, ƀuh ênguôt hlăm ai tiê. Mdiê lŏ yan bhang thŭn anei mơ̆ng gŏ sang ñu luič jih, lehanăn ñu ka lŏ thâo si ngă srăng lŏ pla mjing čiăng kơ gŏ sang mâo mnơ̆ng ba wĭt mgi dih.  “Gŏ sang kâo mjing 3 sao mdiê lŏ, grăp yan 1 sao srăng ba wĭt hlăm ƀrô 600 - 700 kg mdiê, sơnăn grăp thŭn ăt djăp êsei huă hlăm gŏ sang. Ƀiădah thŭn anei amâo mâo djăp ôh, êjai lu gŏ sang mkăn dôk hlăm yan wiă, gŏ sang pô mdiê djiê krô kyua amâo mâo êa, ară anei knŭk kna dôk mtô kơ mnuih ƀuôn sang lŏ pla ana mnơ̆ng mkăn čiăng djŏ hŏng lăn ti anôk anei, lehanăn hmei tui ngă msĕ si klei mtô mơ̆ng knŭk kna yơh.”

Ăt jĕ mbông lŏ mơ̆ng Rơ Chăm Chĭu, mâo giăm 4 sao mdiê lŏ mơ̆ng Rơ Chăm Luyên ăt djiê krô kơyua mâo amâo êa, tui hlue Rơ Chăm Luyên, anei jing thŭn tal 2 gŏ sang amâo mâo dưi ba wĭt sa săr mdiê mơ̆ng kdrăn lŏ Ia Sah. “Dŭm thŭn êlâo dih ăt dôk djăp êsei huă hlăm gŏ sang, ƀiădah mâo 2,3 thŭn ară anei amâo mâo êa ngă kơ mdiê lŏ djiê krô jih. Hmăng hmưi kơ Đảng lehanăn knŭk kna srăng mâo hdră hriê ksiêm dlăng lăn anôk anei srăng dưi pla hŏng ya mta ana kyâo leh anăn djŏ hŏng klei hdĭp mnuih ƀuôn sang hmei.”

Hoàng Văn Thành. K’iăng khua kiă kriê bruă sang čư̆ êa să Ia ka, kdriêk Čư̆ Pah brei thâo: Lŭ thŭn hŏng anei mnuih ƀuôn sang Ja Rai hdĭp hŏng bruă ngă mdiê lŏ mơ̆ng dŭm hnoh êa ƀlĕ lehanăn hnoh êa điêt, amâo mâo ôh klei ba êa mơ̆ng dŭm knơ̆ng kdơ̆ng êa. Thŭn anei, êa hlăm dŭm hnoh anăn khuôt jih kyua anăn mdiê ăt djiê krô mơh. Tui hlue klei čih yap tal êlâo brei ƀuh, mâo êbeh 70 ha kdrăn lŏ yan bhang mâo klei hmăi amâo dah djiê krô jih, hmăi kơ giăm 200 boh gŏ sang, kñăm hlăm ƀuôn Mrông Yô̆ 1 leh Mrông Yô̆ 2. Hoàng Văn Thành mâo klei hyưt, tơdah amâo mâo hmar nao mtô hriăm kơ mnuih ƀuôn sang hlăm bruă bi mlih ana kyâo pla mjing, klei hmăi amâo jăk srăng lŏ dơ̆ng hlăm dŭm thŭn kơ anăp: “Ƀri wưng anei ăt mâo klei akâo kơ dŭm anôk bruă djŏ tuôm čiăng mâo sa hdră êlan đru prăk kăk kơ mnuih ƀuôn sang lŏ dưi wĭt mkŏ mkra. Tui hlue dŭm klei đăo knăl, hlăm dŭm thŭn ti anăp srăng lŏ mâo klei không kƀah êa, bruă sang čư̆ êa să srăng bi mguôp hŏng dŭm anôk bruă djŏ tuôm kơ dlông lehanăn mnuih ƀuôn sang, čiăng mtô kơ mnuih ƀuôn sang thâo mlih ana kyâo pla mjing ƀiă hruê djŏ hŏng klei hdĭp mnuih ƀuôn sang lehanăn yan adiê ti yan bhang hlăm dŭm thŭn ti anăp.”

Trần Đắc Thắng, k’iăng khua bruă lŏ hma lehanăn krĭng ƀuôn sang kdriêk Čư̆ Pah brei thâo, anôk bruă anei ngă leh klei ksiêm dlăng hlăm kluôm ênŭm ênă mdiê lŏ yan bhang hlăm kdriêk, mdiê lŏ yan bhang thŭn anei, kluôm kdriêk mâo hlăm ƀrô 1700 ha mdiê lŏ, hlăm anăn mâo 170 ha amâo mâo êa leh anăn djiê krô. Čiăng mgaih msir kơ dŭm klei jhat anei, boh nĭk hlăm dŭm anôk mdiê lŏ amâo mâo êa, Trần Đắc Thắng brei thâo: “Anôk bruă lŏ hma lehanăn krĭng buôn sang mâo leh klei bi mguôp hŏng anôk bruă mprăp kơ bruă lŏ hma lehanăn bruă sang čư̆ êa dŭm să ngă bruă ksiêm dlăng ênă mdiê lŏ yan bhang thŭn anei lehanăn mâo hdră êlan: knŏng plă jing dŭm anôk mâo êa lehanăn amâodah mâo êa mkăp krih, bi kơ anôk amâo mâo êa srăng mtrŭt mjhar kơ mnuih ƀuôn sang lŏ mlih pla kơ dŭm ana boh kroh djŏ hŏng mnuih ƀuôn sang čiăng dêč đuê̆ kơ klei hmăi amâo jăk truh kơ mnuih ƀuôn sang”./.