VOV4.Êđê-  Aguah 2/4, Knơ̆ng bruă sang čư̆ êa čar Gia Lai mkŏ mjing klei bi kƀĭn trực tuyến ksiêm wĭt bruă mđĭ kyar bruă duh mkra - ala ƀuôn, rơ̆ng klei êđăp ênang ala čar gưl I, pŏk ngă bruă knuă Gưl II thŭn 2021. Gưl I thŭn 2021, khă gơ̆ tlă anăp hŏng lu klei dleh dlan kyua klei ruă Covid-19 bluh mâo ti dŭm alŭ wăl ti čar, ƀiădah čar Gia Lai gĭr mkhư̆, msưh kdŭn klei ruă tưp. Hlăm gưl I thŭn 2021, ngă mđrăm bruă klam mdua mdrơ̆ng hŏng klei ruă tưp Covid-19 êjai, kƀĭn mđĭ kyar bruă duh mkra ala ƀuôn, mjưh ruê̆ yan Puih - Mnga 2020-2021, kluôm čar buh pla leh êbeh 77 êbâo ha ana pla mjing dŭm mta. Ênoh bruă tuh tia mkra mjing 3 mlan akŏ thĭn 2021 mâo êbeh 5.525 êklai prăk. Ênoh duh bi liê kluôm yang ƀuôn ti alŭ wăl čar 3 mlan akŏ thŭn đaŏ tĭng mâo 13 êbâo 996 êklai prăk, mâo 20% hdră kčah. Ăt hlăm gưl I, čar bi mklă hdră mtrŭn duh bi liê kơ 7 hdră bruă hŏng ênoh bi liê 1.988 êklai prăk leh anăn mâo 220 anôk bruă mnia blei, 48 anôk bruă mkŏ mjing mrâo.

Pô mblang: H’Zawut Ƀuôn Yă