VOV4.Êđê - Bruă sang čư̆ êa čar Gia Lai mrâo mâo hră mtrŭn mjêč čiăng mtă kơ dŭm alŭ wăl srăng mdei dŭm bruă ngă mâo lu mnuih, dŭm bruă amâo jăk čiăng mơ̆ng 12 mmông hruê 8/5 čiăng gang mkhư̆ klei ruă tưp Covid-19. Tui hluê boh phŭn hlăm hră mtrŭn anăn, čar Gia Lai mtă kơ dŭm alŭ wăl hlăm kluôm čar srăng mdei dŭm bruă ngă dhar kreh, mjuăt asei mlei, dŭm klei knăm prŏng, bruă ngă mâo klei bi kƀĭn lu mnuih, lehanăn dŭm bruă amâo jăk čiăng msĕ si:  karaoke, sang bar, sang kdŏ mmuñ, massage, sang dlăng film, dŭm anôk hlăp lêñ điện tử, internet, ênao luê êa… mơ̆ng 12 mmông hruê 8/5. Dŭm anôk mnia êa kphê, sang huă mnăm, anôk mnăm êa, sang mjuăt asei mlei srăng dưi mâo klei mă bruă ƀiadah srăng tui ngă jăk dŭm hdră êlan hlăm bruă gang mkhư̆ klei ruă tưp Covid-19. Dŭm čô mnuih ƀuôn sang nao čuă dŭm anôk knhuah gru amâodah dŭm anôk hiu čhưn ênguê srăng guôm ƀô̆ mta hŏng čhiăm guôm bô̆. Bruă sang čư̆ êa čar Gia Lai mñă kơ dŭm knơ̆ng bruă mdrao mgŭn dưi mâo klei ksiêm dlăng čiăng bi mdrơ̆ng hŏng klei tưp lar klei ruă, mđĭ bruă ksiêm dlăng, mâo klei bi kmhal kơ dŭm čô mnuih amâo guôm ƀô̆ mta hlăm yang ƀuôn. Tĭng truh kơ jih tlam hruê 7/5, čar Gia Lai dưi bi leh bruă tlŏ mgang vaccine hŏng 18.000 hnơ̆ng vaccine gang mkhư̆ klei ruă tưp Covid-19.

Y Khem pô mblang