VOV4.Êđê- Dŭm alŭ wăl mơ̆ng čar Gia Lai dôk mtrŭt mđĭ hdră ruah khua truh kơ grăp alŭ, ƀuôn krĭng taih kbưi, đru kơ mnuih ƀuôn sang djuê ana ƀiă thâo săng klă klei dưi lehanăn klei đua klam mơ̆ng pô hlăm hdră ruah khua ti anăp

 Nguyễn Đăng Chung, Khua anôk bruă sang čư̆ êa să, K’iăng khua Anôk bruă ruah khua să Đông, kdriêk Kbang, čar Gia Lai brei thâo, alŭ wăl ksiêm dlăng, mƀlir leh anăn phung bi ala, mbĭt anăn hâo hưn nanao čiăng kơ jih jang mnuih ƀuôn sang thâo săng lehanăn hluê ngă djăp ênŭm klei dưi mơ̆ng pô:

“ Truh kơ ară anei hdră mprăp kơ gưl ruah pô bi ala Quốc hội gưl XV lehanăn bi ala HĐND dŭm gưl wưng thŭn 2021 – 2026 hmei rơ̆ng hluê ngă djăp ênŭm lehanăn tŭ jăk hdră mă bruă. Čih mkra anăn phung bi ala snăn hmei mâo leh hră m’ar gĭt gai kơ anôk bruă kahan ksiêm să bi nao mă bruă hŏng dŭm alŭ, ƀuôn; truh kơ ară anei ti alŭ wăl să mâo leh anăn phung bi ala lehanăn hmei lŏ jao wĭt kơ dŭm alŭ, wĭt lŏ wĭt ksiêm dlăng kluôm đăm lŏ mâo klei kƀah lehanăn rơ̆ng klei dưi mơ̆ng mnuih ƀuôn sang ti alŭ wăl.

Hŏng să Đăc Talay, kdriêk Mang Yang, mâo êbeh 80% ênoh mnuih jing mnuih djuê ana Bahnar, dua hruê sa blư̆, knuă druh să lŏ đĭ êdeh ph’phŭt, ba loa kčaĭ asăp mbĕ hiu lehanăn mbha hră kơ mnuih ƀuôn sang. Hră hưn mthâo kơ klei ruah khua ăt msĕ mơh klei hâo hưn dưi mđung hŏng dua klei blŭ, jing klei Bahnar lehanăn klei blŭ mnuih djuê lar čiăng kơ jih jang mnuih ênưih thâo săng. Ayŏng Đinh Gôn- knuă druh să Đăc Talay, brei thâo:

“Mnuih ƀuôn sang tinei nao mă bruă mơ̆ng aguah ưm, hlăm brô 5 -6h kơh wĭt. Yang đar hmei kreh hiu mđung hŏng loa kčaĭ asăp mơ̆ng 5h čiăng kơ mnuih ƀuôn sang dưi hmư̆ lu ƀiă. Hâo hưn hŏng klei blŭ djuê ana. Hmei hâo hưn snăn kơh mnuih ƀuôn sang thâo săng, ênưih săng hŏng klei blŭ djuê ana pô.

Đinh Đình Chi, Khua anôk bruă Hâo hưn mtô mblang kdriêk Kbang brei thâo, hŏng giăm 46% ênoh mnuih jing mnuih djuê ƀiă, bruă mtô mblang kơ diñu dưi hluê ngă hŏng lu hdră, djŏ hŏng knhuah dhar kreh grăp djuê ana. Sa hdră, êpul êya hâo hưn kơ hdră ruah khua hluê loa kčaĭ asăp, hdră mkăn jing hưn mthâo hlăm êpul êya lehanăn hluê hdră mbĕ hiu.

“ Hŏng mta phŭn lehanăn klei ktrâo lač mơ̆ng Anôk bruă kiă kriê klei hâo hưn ăt msĕ mơh hdră mtô mblang mơ̆ng anôk bruă ruah khua, snăn anôk bruă dôk hluê ngă hdră ksiêm dlăng, čih kač, kđăm mkra lehanăn hiu mbha hră hưn mthâo kơ alŭ wăl kdriêk, krĭng wăl krah. Truh kơ mmông anei, hdră hiu hưn mthâo hŏng ală dlăng dưi pŏk ngă leh ti êbeh 300m2 pŏk panô, áp phích. Čih mkra hdră kčah mđing truh kơ hruê ruah khua. Êpul hâo hư mbĕ hiu ăt ngă dŭm klei hkăp mgưt, mta phŭn, bi mklă anôk čiăng kƀĭn kơ hdră mtô mblang.

Bruă mtô mblang kơ hdră ruah khua ti Gia Lai mâo lu jơr êdi hluê hdră dlăng hŏng ală mta, nao hiu mtô mblang, ba yua tuič hnơ̆ng kdrăp hâo hưn hlăm yang ƀuôn, mđing kơ hdră mtô mblang hŏng klei blŭ. Mđĭ hdră mtô mblang hlăm krĭng mnuih djuê ƀiă hŏng klei blŭ mnuih Jarai, Bahnar... Aduôn Phạm Thị Lan, K’iăng khua anôk bruă mặt trận Việt nam čar Gia Lai mñă klă leh klei tŭ dưn mŏng êpul ‘’Hiu mtô mblang hŏng klei blŭ’’ ƀuh klă nik leh ti dŭm krĭng taih kbưi.

“ Boh nik mnuih mâo k’hưm hlăm yang ƀuôn, phung khua mduôn, Khua ƀuôn hlăm krĭng yua klei blŭ mŏng diñu msĕ si klei Jarai lehanăn bahnar čiăng mtô mblang, hưn mthâo dŭm klei hâo hưn truh hŏng grăp čô mnuih ƀuôn sang. Hluê hŏng hdră hâo hưn anei, mnuih ƀuôn sang boh nik mnuih djuê ƀiă mâo leh klei thâo săng, yua hră mplĕ mŏng pô ruah mnuih mâo k’hưm, djăp klei thâo, mâo knhuah hdĭp jăk nao hgŭm ngă pô bi ala HĐND dŭm gưl.

Hruê ruah pô bi ala Quốc hội gưl XV lehanăn HĐND dŭm gưl wưng thŭn 2021 – 2026 dôk truh giăm. Mnuih ƀuôn sang dŭm djuê ana ti Gia Lai dôk mprăp čang guôn Hruê m’ak prŏng anei.

                                                    Pô mblang: H’Nêč Êñuôl