VOV4.Êđê - Anôk bruă gĭt gai hdră gang mkhư̆ klei ruă Covid 19 čar Gia Lai mrâo ba mdah Hdră kčah kơ bruă rơ̆ng kjăp hdră bruă mdrao mgŭn lehanăn rơ̆ng klei êđăp ênang gang mkhư̆ klei ruă Covid 19 kơ gưl ruah pô bi ala Quốc hội gưl 15 lehanăn bi ala HĐND dŭm gưl wung thŭn 2021 – 2026. Mta kñăm mơ̆ng hdră kčah jing rơ̆ng pŏk hluê ngă mđrăm mbĭt hŏng bruă mdrao mgŭn kñăm ksiêm dlăng kjăp lehanăn gang mkhư̆ klei ruă Covid 19 mŭt hlăm alŭ wăl čar, mbĭt anăn rơ̆ng kjăp klei doh êƀăt mnơ̆ng ƀơ̆ng, pral msir mghaih boh klei mjêč tăm mâo lehanăn rơ̆ng klei suaih pral kơ pô mgơ̆ng ruah, knuă druh nao hlăm hdră ruah khua lehanăn mnuih ƀuôn sang êlâo, hlăm wưng mkŏ mjing hdră ruah khua. Hluê anăn, brei mâo 100% anôk mplĕ hră ruah khua ti alŭ wăl čar ba yua hdră msir gang mkhư̆ klei ruă Covid 19, dưi krih êa drao bi mdjiê kman Cloramin B êlâo lehanăn êdei kơ gưl ruah khua, dŭm hdră ruah khua dưi mkŏ mjing djŏ hdră hluê si 5 asăp mtă mơ̆ng Phŭn bruă mdrao mgŭn./.

H Nêč pô mblang