VOV4.Êđê - Aguah mbrue (26/3), čar Gialai mkŏ mjing leh knăm pla kyâo “kyua sa Việt Nam mtah” ti alŭ wăl hiu čhưn ênguê Êa Nueng, să Biển Hồ, Pleiku. Hlăm knăm anei, phung khua kiă kriê bruă Đảng čar, Knơ̆ng bruă sang čư̆ êa čar Gialai, phung bi ala dŭm knơ̆ng dhar bruă alŭ wăl lehanăn êpul bi đru hrăm mbĭt mkŏ mjing leh bruă pla kyâo truh 200 phŭn kyâo hngô jŭm alŭ wăl hiu čhưn ênguê Êa Nueng, ti să Biển Hồ, ƀuôn prŏng Pleiku.

Ti nei, khua kiă kriê čar Gialai brei thâo, čar hlăk mâo mta kñăm mkŏ mjing čar jing “Čư̆ dliê mtah kyua klei suaih pral”, pla kyâo, pla dliê amâo mâo djŏ knŏng pioh răng mgang wăl hdĭp mda, ƀiădah lŏ mđĭ kyar bruă duh mkra, ala ƀuôn, dhar kreh lehanăn hiu čhưn ênguê. Hlăm 5 thŭn êgao, čar mâo pla leh truh 20 êbâo ha dliê lehanăn ana kyâo bi êyui. hdră mtrŭn klei bi kƀĭn prŏng Đanr čar Gialai tal 16, wưng păn bruă 2021 – 2025 ăt mâo ênoh čuăn pla truh 40 êbâo ha dliê, mđĭ hnơ̆ng luôm dliê hlăm čar truh 47,75% hlăm 5 thŭn kơ anăp./.

Y Khem pô mblang