VOV4.Êđê- Mơ̆ng leh klei bi kƀĭn tal 10 quốc hội gưl 14 truh kơ ară anei, Êpul khua kiă kriê mŏng bruă mặt trận čar kwar gưl dlông Việt Nam hgŭm leh hŏng Dhar bruă kiă kriê Quốc hội ngă leh klei bi klin mâo truh 2.278 klei blŭ mŏng phung bi ala mnuih ƀuôn sang kluôm ala mơĭt truh kơ anôk bi kƀĭn tal 11 Quốc hội gưl 14. Tui si khua kiă kriê bruă mặt trận čar kwar gưl dlông Trần Thanh Mẫn, phung bi ala kơ mnuih ƀuôn sang lŏ dŏng bi êdah klei dôk hyưt ti anăp klei ruă tưp covid 19 dôk đĭ lar, jih jang klei amâo mâo jăk hmăi mŏng klei ruă tưp djŏ tuôm hlăm klei duh mkra ala ƀuôn, lehanăn klei hdĭp mda mnuih ƀuôn sang, boh nik hlăm krĭng mâo klei ruă tưp, dôk hyưt kơ mnuih ñŭ kma soh hŏng klei bhiăn hlăm Việt Nam, lehanăn bi hưn kơ klei suaih pral hŏng klei amâo mâo klă ôh. Akâo kơ Quốc hội, knŭk kna, dŭm phŭn dhar bruă, alŭ wăl lŏ ngă djăp hdră krŭ wĭt, lehanăn mtrŭt bruă duh mkra, rơ̆ng kjăp klei êđăp ênang hlăm yang ƀuôn êjai dôk găn klei ruă tưp anei., mghaih msir jih jang bruă adôk dleh kpăk hlăm bruă sang hră mơar, bruă mdrao mgŭn, bruă dhar kreh, yang ƀuôn, kiă kriê lăn ala, lehanăn răng mgang wăl hdĭp mda, lehanăn ngă tŭ jing hĭn bruă kdơ̆ng hŏng klei ƀơ̆ng ngăn, klei bi liê hơăi mung mang./.

Pô mblang: Y-Khem Niê