VOV4.Êđê- Tlam mbruê 21/5, êpul bruă ruah khua ala čar mâo leh klei kƀĭn klei mrâo, lŏ bi mdah dŭm klei mrâo kơ bruă mprăp kơ hruê ruah khua ngă pô bi ala Quốc Hội gưl 15 lehanăn HĐND dŭm gưl wưng thŭn 2021-2026. Hlăm klei kƀĭn anăn, pô bi ala kơ êpul bruă ruah khua ala čar brei thâo, truh kơ ară anei, dưi ngă djăp lehanăn djŏ hnơ̆ng dŭm bruă mprăp kơ hruê ruah khua. Ti 16 čar, ƀuôn prŏng mâo klei ruah khua hnưm hlăm đa đa anôk, bruă ruah khua djŏ hŏng hdră êlan lehanăn mâo klei êđăp ênang. Pô bi ala êpul ruah khua ala čar ăt brei thâo, kluôm ala čar srăng mâo 69 êklăk čô mnuih nao mplĕ hră hlăm giăm 85.000 anôk ruah khua. Ară anei mâo leh hdră êlan čiăng rơ̆ng kơ klei êđăp ênang hlăm hruê ruah khua, rơ̆ng kơ klei dưi pô mplĕ hră, boh nĭk hlăm dŭm alŭ wăl dôk mâo klei dleh dlan msĕ si: klei truh kyua yan adiê, klei ruă tưp, khădah mâo lu mnuih mâo klei dôk bi kbưi ƀiădah ăt dưi ngă jăk.

Pô mblang: Y-Khem Niê