VOV4.Êđê- Hlăm hrue tal êlâo trŭn kơ bruă răng mgang klei êđăp ênang êlan klông ƀri wưng mdei 30/4 – 1/5, răng mgang kơ klei ruah phung bi ala Quốc hội gưl 15, lehanăn phung bi ala Hội đồng nhân dân djăp gưl wưng păn bruă 2021 – 2026, kahan ksiêm êlan klông kluôm ala ksiêm dlăng, hmao ƀuh lehanăn mghaih msir leh giăm 9 êbâo klei ngă soh hŏng klei êđăp ênang êlan klông, đŭ giăm 10 êklai prăk. Năng mđing êdi, êpul bruă djŏ tuôm hmao ƀuh lehanăn mghaih msir êbeh 600 čô mgăt êdeh mnăm kpiê ăt mgăt êdeh, 5 čô mâo matuĭ. Hlăm êlan êdeh treng, kahan ksiêm mkŏ mjing leh lu anôk ksiêm dlăng, răng mgang kjăp ti dŭm kdrêč êlan bi kuh, êlan bi găn, 5 êpul êdeh treng mdiăng tue, ngă djŏ kle ibhiăn gang mkhư̆ klei ruă tưp covid 19. Hlăm aguah mbrue mtam (16/4). Êpul ksiêm dlăng êlan klông hmao ƀuh 4 čô mgăt êdeh mâo matuĭ, lehanăn mnăm kpiê leh ăt mgăt êdeh hlăm hrue tal êlâo trŭn kơ bruă răng mgang klei êđăp ênang êlan klông kdrêč êlan êran pral Hà Nội – Thái Nguyên. Tui si hdră mtrŭn mrô 100/2019/NĐ-CP mơ̆ng knŭk kna čoh čuăn kơ klei đŭ bi kmhal dŭm klei ngă soh hŏng klei êđăp ênang êlan klông hlăm êlan dơ̆ng, êlan êdeh treng, mgăt êdeh mơh hlăm asei mnăm leh kpiê lehanăn mâo matuĭ, phung mgăt êdeh ngă soh anăn tŭ klei đŭ mơ̆ng 30 – 40 êklăk prăk, sua mă hĕ hră dưi mgăt êdeh mơ̆ng 22 – 24 mlan./.

Pô mblang: Y-Khem Niê