VOV4.Êđê- Tui si êpul hgŭm mnuih ngă bruă Hà Nôị, yap truh hrue 20/5 mâo leh 296/296 Công đoàn anôk bruă duh mkra mkŏ mjing “Êpul êđăp ênang Covid 19” hŏng êbeh 7 êbâo 800 čô mnuih nao hgŭm. Leh 5 hrue mâo ngă, jih jang phung knuă druh Công đoàn dŭm anôk bruă duh mkra mnia mblei hŏng ala tač êngao ti Hà Nội ngă bruă anei, ktrâo atăt jih jang knuă druh bruă Công đoàn nah gŭ bi mguôp hŏng phung duh mkra mkŏ mjing dŭm “Êpul êđăp ênang Covid 19”. Jih jang djăp êpul mâo mkŏ mjing leh sơăi hdră kăp mdrơ̆ng, amâo mâo lĕ hlăm klei kdjăt ôh ti anăp klei amâo mâo jăk truh. Grăp hrue, “Êpul êđăp ênang Covid 19” hlăm puhng duh mkra mâo klei hâo hưn, mtrŭt mjhar, ktrâo atăt, mtă mtăn mnuih ngă bruă hlăm Êpul, hlue gưt kjăp djăp ênŭm jih jang hdră gang mkhư̆ klei ruă tưp ti anôk pô mă bruă, lehanăn êngao mmông mă bruă, boh nik hlue gưt kjăp bruă bi mkă hnơ̆ng h’uh asei mlei, truă čhiăm guôm ƀô̆, dôk bi kbưi, nao hưn klei suaih pral pô hŏng klei djŏ./.

Pô mblang: Y-Khem Niê