VOV4.Êđê - Tlam hruê 5/5, Chu Ngọc Anh, Khua anôk bruă sang čư̆ êa ƀuôn prŏng Hà Nôị nao ksiêm dlăng leh hdră gang mkhư̆ klei ruă ti Sang êa drao mdrao klei ruă krĭng hlơr anôk bruă mrô 2 ti kdriêk Đông Anh leh hmao ƀuh phung nai aê mdrao mơ̆ng Sang êa drao anei djŏ kman Sar-Cov-2.  Chu Ngọc Anh brei thâo, ƀuôn prŏng dôk bi hgŭm hŏng Phŭn bruă mdrao mgŭn kwang dar jih sang êa drao anei. Bruă klam ti anăp jing pral mkhư̆ klei ruă anei, rơ̆ng klei êđăp ênang kơ êpul nai aê mdrao dôk mă bruă gang mkhư̆ klei ruă tưp. Anei ăt jing hdră kñăm mkhư̆ klei ruă anei đĭ lar hlăm êpul êya yang ƀuôn. Hluê si khua anôk bruă sang čư̆ êa ƀuôn prŏng Hà Nội, hŏng klei mâo dleh dưi ksiêm dlăng mơ̆ng klei ruă, mta kman lŏ mlih mrâo, phung mă bruă gang mkhư̆ klei ruă msĕ si phung nai aê mdrao, phung mă bruă mdrao mgŭn mâo leh mnuih djŏ kman Sar-Cov-2. Chu Ngọc Anh mtă brei ksiêm dlăng jih mnuih kbiă leh mơ̆ng sang êa drao hlăm brô 10 hruê hŏng anei, kñăm tui duah, bi mklă kman lehanăn pral msir mghaih anôk bluh mâo klei ruă anei./.

H Nêč pô mblang