VOV4.Êđê- Hŏng bruă phung êdam êra leh anăn hđeh sang hră đru mguôp 1000 prăk hlăm grăp thŭn čiăng mkŏ mjing keh rŭ mdơ̆ng Sang bi đru, giăm 8 thŭn êgao, dŭm pluh gŏ sang hđeh sang hră ƀun ti kdriêk Krông Pač, čar Dak Lak dưi đru čiăng mâo sang kjăp siam hĭn. Dŭm boh sang dưi rŭ mdơ̆ng  mơ̆ng keh 1000 prăk anei đru kơ phung hđeh leh anăn gŏ sang mâo thiăm klei đaŏ knang, klei gĭr ktưn hlăm klei hriăm hră leh anăn klei hdĭp.

Ti krah yang hruê dơ̆ng mđiă ktang. Ayŏng Y Đŭt Êban, ti ƀuôn Kplang, să Tân Tiến, Kdriêk Krông Pač, čar Dak Lak ăt dôk hli bi kpă lăn tur sang. Ayŏng Y Đŭt lač, čiăng hnêč ngă leh bruă anei čiăng kơ dŭm čô mkra sang lŏ mă bruă mkăn. Lu thŭn leh êgao, 2 čô ung mô̆ nao mă bruă ti anôk kbưi, sui hruê mâo wĭt kơ sang sa blư̆, 3 čô anak điêt dôk hŏng aduôn aê dlăng ba. Sa boh sang sô siă mơ̆ng gŏ sang 2 ung mô̆, jing msĕ si sa boh pưk điêt hlăm ƀrô 10 m², mtih lehanăn čuôr găp sang hŏng tôl sô knŏng kơ klei mgang kơ hjan, kơ mđiă.

 Klei mơak mŏng gŏ sang ayŏng Y Đŭt Êban ( ao karô) hlăm hruê mphŭn rŭ mdŏng sang

Kčưm ti thŭn anei, anak êkei Ayŏng Y Đŭt jing Y Duy Niê (dôk hriăm adŭ 4, sang hră gưl sa Ngô Gia Tự) dưi mâo klei ksiêm dlăng mơ̆ng bruă Đoàn ti kdriêk Krông Pač, đru hlăm ênoh 25 êklăk prăk čiăng rŭ mdơ̆ng sa boh sang bi đru, lehanăn dŭm anôk bruă lŏ đru thiăm 40 êklăk prăk pioh mkra sang. Sang anei dưi kčưm mkra tur ti akŏ mlan 3 anei. Jih gŏ sang ayŏng Y Đút hơ̆k mơak snăk.

Bruă mă lehanăn bruă duh mkra hlăm gŏ sang tuôm lu hŏng klei dleh dlan, knŏng knang kơ dua ung mô̆ hiu duah mă bruă arăng čiăng duah êsei huă, djam ƀơ̆ng grăp hruê, snăn amâo mâo thâo bĭt anôk lĭng čan čiăng lŏ rŭ mdơ̆ng sa boh sang dôk jăk hĭn. Truh kơ ară anei mâo leh ênoh đru mơ̆ng dŭm anôk bruă dưi mdơ̆ng sa boh sang dôk jăk, gŏ sang hmei mơak snăk. Leh mâo sang dôk gŏ sang ăt srăng gĭr ktưn mă bruă ciăng lŏ mđĭ bruă duh mkra lehanăn lŏ blei thiăm mnơ̆ng yua hlăm gŏ sang. 

 Ayŏng Y Đŭt Êban hnêč yang hruê hli lăn tur sang

Êlâo kơ năn, ăt ti să Tân Tiến, kdriêk Krông Pač, mâo leh 2 boh sang dôk hŏng klei khăp dưi mâo klei mkŏ mjing. Aduôn Mai Thị Phuơng, sa hlăm 2 gŏ sang mâo leh klei đru dưi mdơ̆ng sang dôk lač: Lăn mă bruă hlăm gŏ sang jing ƀiă êdi, tơl ñu nao hiu duiñ tŏ ksu djah čiăng rông ba 3 čô anak dôk hlăm thŭn nao sang hră mơar, bruă duh mkra hlăm gŏ sang bŏ hŏng klei dleh dlan. Leh mâo klei đru hŏng ênoh 25 êklăk prăk. Gŏ sang lŏ gĭr lĭng čan čiăng lŏ rŭ mdơ̆ng sa boh sang dôk prŏng ƀiă. Kyua mâo phung êdam êra mơ̆ng bruă Đoàn ti kdriêk lehanăn dŭm čô ayŏng amai adei nao đru, hlăm 1 mlan sang dôk mrâo dơ̆ng nao kơ leh yơh. Aduôn Mai Thị Phương lač:

Ênoh prăk anei tơdah hŏng mnuih mkăn jing ƀiă, khădah hŏng gŏ sang hmei jing lu êdi, kyua mơ̆ng klei khăp arăng đru kơ pô, hmei mơak snăk kyua bruă anei. Mơ̆ng leh rŭ  mdơ̆ng sang dôk anei ƀuh lu klei hơ̆k mơak, truh kơ ară anei mâo leh klei êđăp ênang, nư klei mơ̆ng klei amâo suaih sei mlei lehanăn mdơ̆ng sang dôk ăt jih leh mơh.

 Aduôn Mai Thị Phương ti anăp sang bi đru dưi đru rŭ mdơ̆ng mơ̆ng thŭn 2016

Dŭm boh sang hŏng klei bi đru anei dưi rŭ mdơ̆ng mơ̆ng keh hlăm hdră “sang dôk klei khăp - sang dôk hŏng ênoh 1.000 prăk” mơ̆ng bruă Đoàn kdriêk Krông Pač pŏk ngă mơ̆ng thŭn 2013. Tui hlue anăn, hlăm grăp thŭn, Bruă Đoàn ti kdriêk iêu mthưr klei đru mguôp mơ̆ng grăp čô hlăm êpul, phung hđeh sang hră hlăm kdriêk, bi đru sa čô mơ̆ng 2.000 prăk čiăng đru mguôp rŭ mdơ̆ng 2 boh sang dôk kơ 2 boh gŏ sang mâo klei hdĭp dleh dlan kơ sang dôk (sa čô mguôp 1.000 ti sa boh sang). Hrăm mbĭt hŏng mguôp prăk lehanăn êpul êdam êra mơ̆ng bruă Đoàn hlăm kdriêk lŏ srăng duah mnuih đru mkra sang, đru kơ gŏ sang čuăn dlăng, si ngă mkra čiăng kơ jăk hĭn. Ayŏng Võ Quốc Việt, Khua bruă Đoàn ti să Tân Tiến, kdriêk Krông Pač brei thâo kơ dŭm klei mă bruă mơ̆ng phung hđeh êdam êra hlăm alŭ wăl:

Grăp thŭn mâo nanao hdră bi đru  rŭ mdơ̆ng sang dôk hŏng ênoh 1.000 prăk tui hlue hdră mtrŭn mơ̆ng bruă Đoàn ti kdriêk, hmei srăng hưn truh kơ bruă Đoàn ti grăp alŭ, grăp buôn lehanăn ksiêm dlăng hlăm jih jang grăp alŭ, grăp buôn. Lehanăn hlăm bruă đru ruh sang hđăp, đru mkra tur sang jing mâo bruă Đoàn ti să đru ai. Mâo wăt bruă kđi čar nao hgŭm čiăng bi hrŏ hnơ̆ng gŏ sang ƀun ƀin lehanăn dleh dlan kơ sang dôk dưi mâo klei đru hmăr čiăng kơ diñu mâo klei êđăp ênang lehanăn bi mđĭ bruă duh ƀơ̆ng hlăm gŏ sang.

Truh kơ ară anei hdră sang bi đru hŏng ênoh 1.000 prăk ti kdriêk Krông Pač dưi đru mdơ̆ng leh 12 boh sang kơ dŭm gŏ sang mâo hđeh sang hră knap mñai. Ayŏng Nguyễn Văn Hà, Khua bruă Đoàn ti kdriêk brei thâo, hŏng ênoh đru 25 êklăk mơ̆ng keh, dŭm phŭn, knơ̆ng bruă Đoàn ăt lŏ iêu mthưr kơ lu mnuih mâo ai tiê đru mguôp čiăng rơ̆ng kơ bruă hlăm sa boh sang srăng mâo ênoh mơ̆ng 50 êklăk prăk kơ dlông, rŭ mdơ̆ng hŏng klei mkiêt lehanăn mâo boh tŭ dưn hĭn. Ară anei  dưi ba leh lu boh tŭ dưn klă klơ̆ng, đru kơ dŭm gŏ sang mâo sa boh sang dôk kjăp, êđăp ênang kơ klei hdĭp. Truh kơ bruă srăng lăm lui klei ư̆ êpa, bi hrŏ klei ƀun ƀin lehanăn bi mđĭ ai tiê thâo khăp mơ̆ng dŭm čô hlăm bruă Đoàn. Hđeh êdam êra lehanăn hdeh sang hră.

Boh tŭ dưn amâo djŏ knŏng mdei kơ sa boh sang dôk ôh, ƀiădah jing klei bi kah mbha, mtô kơ hđeh êdam êra thâo kơ klei thâo mkiêt, thâo khăp, truăn mĭn kơ mnuih mkăn. Ƀuh hlăm lu gŏ sang, boh nik dŭm gŏ sang mâo hđeh sang hră mâo leh klei đru anei, lŏ mâo leh ai tiê thâo gĭr, gĭr wăt kơ klei hriăm hră lehanăn hlăm gŏ sang ăt mâo dŭm klei jăk hlăm bruă duh mkra lehanăn hur har nao hgŭm hlăm dŭm bruă ti alŭ wăl. Mơ̆ng dŭm bruă mă mâo boh tŭ dưn yuôm bhăn anei ăt dưi mâo klei đru mơ̆ng yang ƀuôn.

Hŏng ênoh 1.000 prăk sa thŭn, ênoh prăk mkuôm anei amâo yuôm ôh ƀiădah hŏng klei bi mguôp, đru ai tiê mơ̆ng êpul êdam êra bruă Đoàn lehanăn hđeh sang hră, ƀrư̆ hruê ƀrư̆ mâo lu boh sang bi đru ti kdriêk Krông Pač dưi mkŏ mjing leh. Hdră êlan mơ̆ng bruă Đoàn ti kdriêk Krông Pač dưi đru leh hlăm bruă bi lar klei khăp, klei bi mguôp hlăm yang ƀuôn kơ gưl hđeh, mtô kơ phung hđeh knhuah gru “Hla hrông guôm hla tĭ” mơ̆ng djuê ana pô./.

Pô mblang: H’Nêč Êñuôl