VOV4.Êđê - Mơ̆ng dŭm bruă ngă hrui mƀĭn mơar, rông ŭn lăn, blei hră čih hruê mlan hlăm gưl Têt čiăng mkrum prăk kơ hdră kčah điêt, lu hđeh sang hră mâo klei hdĭp dleh dlan ti Dak Lak lŏ mâo klei găl nao sang hră. Mơ̆ng keh prăk mơ̆ng hdră mâo dŭm sang hră yua mđup brei hnư prăk đru hriăm hră, đru kdrăp mnơ̆ng hriăm hră, čhum ao mđao kơ hđeh sang hră ƀun.

Leh mâo nai khua kiă kriê bruă đội hlăm sang hră bi êdah hlăm hruê kkuh kơ ala čhiăm gru ti akŏ hruê kăm lehanăn nai kiă kriê mbĭt hŏng hđeh djă bruă hlăm adŭ lŏ bi êdah, adei Nguyễn Quỳnh Nhi, adŭ 7A2, sang hră gưl 2 Ngô Quyền, wăl krah Ea Drăng, kriêk Ea Hleo, čar Dak Lak mâo klei hur har hlăm bruă hiu kƀĭn dŭm pŏk hdruôm hră leh yua lehanăn nao bi mklin mbĭt hlăm sang hră. Adei Nguyễn Quỳnh Nhi yăl dliê, ñu lehanăn dŭm čô ƀĭng găp mâo klei hur har nao hgŭm hlăm hdră anei mơ̆ng sang hră mtrŭt mjhar. Amâo mâo lu ênoh prăk bi mguôp, kyuanăn diñu tui duah dŭm pŏk hdruôm hră leh yua, hruh mơar hlăm gŏ sang amâo yua, dŭm pŏk mơar ti wăl sang pô amâodah hlăm sang hră ba wĭt poih hlăm sang čiăng ba mklin hlăm hdră êlan bruă ngă điêt“Grăp hruê tơdah mâo dŭm pŏk hla mơar amâo yua ôh, kâo srăng mă lehanăn mkăm pioh ti djiêu mtih adŭ hriăm hră, truh hruê nao bi mklin kâo srăng ba dŭm pŏk mơar anăn dưm hlăm kpung ksu lehanăn nao ba kơ anôk mklin hlăm sang hră. Kâo ƀuh ai tiê mâo klei mơak sơnăk kyua dưi đru kơ dŭm čô ƀĭng găp dôk hlăm klei knap mñai ti sang hră, đru prăk kơ phung ƀing găp. Êngao kơnăn, sang hră hmei lŏ mă yua prăk anăn čiăng mkŏ mkra tač hlăp êlêñ kơ phung hđeh”

Hŏng klei ngă ênưih, hlăm klei mtrŭt mjhar tal êlâo hĭn ti thŭn hriăm hră 2020-2021, sang hră gưl dua Ngô Quyền dưi ba bi mklin hlăm ƀrô 2 tôn mơar, hŏng ênoh 3,5 êklăk prăk, mbĭt hŏng anăn, sang hră lŏ bi êdah dŭm bruă ngă msĕ si: mtrŭt mjhar hlăm klei đru čhum ao, hdruôm hră hriăm, mnơ̆ng dhơ̆ng yua hlăm klei hriăm hră čiăng mơĭt kơ phung hđeh sang hră dôk ti alŭ wăl dôk dleh dlan. Hlăm 5 thŭn leh êgao, sang hră dưi đru 1.500 hlâo čhum ao, 800 mta hdruôm hră hriăm, êbeh 200 boh đuôn đua, kdô hră, mnơ̆ng dhơ̆ng yua hlăm klei hriăm hră mơar, hlăm ƀrô 1,2 tôn mnơ̆ng dhơ̆ng mơĭt kơ êpul hđeh lăk mâo klei hdĭp dleh dlan ti dŭm să taih kbưi hlăm kdriêk. Adei Phan Trường Nhất, k’iăng khua bruă đội sang hră gưl 2 Ngô Quyền, wăl krah Ea Drăng, kdriêk Ea H’leo, čar Đắk Lắk lač “Kâo ƀuh dŭm čô ƀĭng găp nao hgŭm hlăm hdră anei hŏng klei hur har, dŭm pŏk hla mơar lĕ ti gŭ lăn, dŭm pŏk hdruôm hră leh yua dưi bi mklin sa anôk lehanăn dưi ba đru kơ dŭm čô ƀĭng găp mâo klei hdĭp dleh dlan, dŭm čô găp thâo hlăm klei hriăm hră lehanăn mâo klei gĭr”.

Mâo djŏ knŏng hjăn sang hră gưl 2 Ngô Quyền, hlăm lu thŭn leh êgao, bruă ngă hdră êlan điêt ăt dưi mâo klei mkŏ mjing mơ̆ng lu sang hră gưl 1 lehanăn gưl 2 ti čar Dak Lak dưi mâo bi lar. Hŏng klei ngă mdê mdê msĕ si: găp đru găp, 2 čô găp gĭr mbĭt, abŭ braih klei khăp, êpul mnŭ hđeh kă čhiăm hrah rông, keh kyua ƀĭng găp knap mñai, (mkuôm prăk) rô̆ng hruh ŭn lăn... bruă ngă anei dưi mâo klei bi lar čiăng mkŏ mjing keh đru kơ dŭm čô hđeh sang hră mâo klei hdĭp dleh dlan, mâo klei gĭr lehanăn thâo hlăm klei hriăm hră. Adei Nguyễn Thái Thùy Linh, hđeh sang hră gưl 2 Tân Lợi, ƀuôn prŏng Ƀuôn Ma Thuột, čar Đắk Lắk yăl dliê: “Ti sang hră gưl 2 Tân Lợi ăt mâo lu bruă ngă čiăng đru kơ dŭm čô ƀĭng găp mâo klei hdĭp dleh dlan msĕ si bi mklin mơar leh yua, đru čhum ao, blei hră dlăng hruê mlan, rông hruh ŭn lăn. Truh ti knhal tuič thŭn, sang hră srăng yua prăk anei pioh đru kơ dŭm čô ƀĭng găp mâo klei hdĭp dleh dlan, kâo ƀuh mơak sơnăk hlăm ai tiê lehanăn hmăng hmưi sang hră srăng dưi đru lu hĭn kơ dŭm čô ƀĭng găp anăn”.

Tui hluê ayŏng Trần Doãn Tới, khua kiă kriê bruă Đội čar Dak Lak, amâo djŏ ôh knŏng đru kơ dŭm čô hđeh sang hră mâo klei hdĭp dleh dlan, bruă ngă anei ăt lŏ đru hlăm klei ƀi hriăm kơ phung hđeh hlăm bruă Đội, êpul hđeh êlăk dưi mâo klei thâo mkiêt, khăp kơ klei mă bruă, răng mgang wăl hdĭp mda lehanăn mâo ai tiê bi mguôp, thâo pap, kah mbha, đru kơ mnuih mâo klei hdĭp dleh dlan.Mơ̆ng dŭm Kilôgam mơar leh yua lehanăn giêt êa mih phung hđeh sang hră hrui duiñ lŏ dưi đru ênoh prăk dưi lŏ bi mrâo hĭn dră êlan anei. Tal dua, dŭm bruă ngă điêt anăn srăng đru kơ hđeh sang hră mâo klei mĭn hjăn lehanăn mâo knuih hlăm pô, thâo kah mbha, thâo kơ yang ƀuôn lehanăn đru kơ dŭm čô ƀĭng găp mâo klei hdĭp dleh dlan. Lu phung hđeh sang hră dưi tŭ mă klei đru anei mơ̆ng hră êlan bruă mă điêt, anăn jing prăk đru hlăm klei nao sang hră, klei đru mơ̆ng êpul Đội hlăm sang hră lehanăn ti êngao.

Mơ̆ng ênoh prăk mơ̆ng hdră êlan bruă ngă điêt anei, mâo lu boh sang, anôk hlăp lêñ kơ phung hđeh dưi mkŏ mjing ti čar Dak Lak. Hdră êlan anei dưi ba lu boh tŭ dưn klă klơ̆ng, mkŏ mjing klei myun kơ dŭm čô hđeh sang hră mâo klei hdĭp dleh dlan dưi truh kơ sang hră.