Knơ̆ng gĭt gai lĭng kahan čar Khánh Hòa tŭ mă leh êbeh 80 klei hâo hưn djŏ tuôm kơ dŭm krĭng mâo klei găl adôk msat lĭng kahan djiê êngiă. Hlăm anăn mâo 7 klei hâo hưn kơ msat lu mnuih, mĭn tĭng êbeh 200 klang kleh. Mơ̆ng hdră ksiêm dlăng, bi mklă, tal êlâo dưi bi kƀĭn leh 6 kdrêč msat lĭng kahan ba hlăm dŭm anôk msat ti alŭ wăl čar. Mbĭt hŏng bruă tui duah, bi kƀĭn, Khánh Hòa dôk mtrŭt mđĭ bruă bi mklă anăn phung lĭng kahan djiê êngiă hŏng hdră ksiêm dlăng ADN.

Truh kơ ară anei, čar hrui mă leh hlăm brô 2.700 mta ksiêm dlăng mơ̆ng êbeh 3.000 găp djuê phung lĭng kahan djiê êngiă čih anăn, mâo giăm 90% hdră kčah leh anăn êbeh 550 mta mkă hŏng ênoh čuăn. Giăm 80 čô mnuih khua thŭn, klei suaih pral awăt dưi đru mă mta ksiêm dlăng ti sang mtam. Hluê si ksiêm dlăng, Khánh Hòa ară anei mâo êbeh 12.000 klei hưn phung lĭng kahan djiê êngiă, hlăm anăn giăm 4.900 čô ka dưi bi mklă klei hưn kơ msat. Kyua anăn, grăp čô mnuih bi trông, grăp čô mnuih ƀuôn sang tuôm thâo kơ kdrăn mblah, tuôm ƀuh anôk dơr tal êlâo phung lĭng kahan djiê êngiă dưi đru mguôp sa kdrêč yuôm bhăn hlăm hdră tui duah.