Ung mô̆ amai Lâm Thị Ngọc Hoa, gŏ êsei ƀun djuê ana Khmer ti alŭ Xẻo Cóc, să Lai Hòa, ƀuôn prŏng Cần Thơ, mrâo anei dưi ksiêm dlăng đru kơ gru hmô rông bê msĕ si sa "Hdră duh ƀơ̆ng", pŏk klei găl kpưn đĭ bi hơĭt klei hdĭp. Amai Lâm Thị Ngọc Hoa brei thâo:

“Amâo dưi lač jăk jih ôh, thŭn anei dưi đru sa êpul bê mjeh. Ară anei gĭr kriê dlăng čiăng kơ êdei anei mđĭ êpul, mâo klei hdĭp hơĭt, mkiêt mkriêm rŭ mdơ̆ng sang. Ară anei, kâo nao khăt rơ̆k grăp hruê, bi ung kâo nao kiă war hdang kơ arăng, tơdah dôk ti sang snăn đru kriê dlăng bê.”

Diệp Phước Nghĩa, ƀuôn hgŭm Mỹ Xuyên, kyua dưi čan prăk knŭk kna 50 êklăk prăk hŏng 2 gưl čan, dưi duh bi liê pla djam hlăm ênhă 4 ha lăn. Ñu lŏ duh bi liê kơ kdrăp krih êa mkiêt mkriêm, ba yua kdrăp kreh knhâo lehanăn kdrăp mrâo hlăm bruă pla mjing, kyua anăn hnư hrui wĭt mâo êbeh 50 êklăk prăk hlăm grăp thŭn. Mơ̆ng klei đru mơ̆ng Knŭk kna mbĭt hŏng klei gĭr ktưn kpưn đĭ, ñu dưi rŭ mdơ̆ng leh sang prŏng siam lehanăn klă sĭt tlaih ƀun hlăm thŭn 2024:

“Ară anei pla mnga amâo lŏ liê lu ai tiê ôh tơdah ba yua kdrăp krih êa hŏng aruăt êa, yua mô-tơ pom krih, dưi mkiêt mkriêm lu prăk bi liê. Êngao anăn, êlan klông dưi mkra truh kơ hma kyua anăn phung ghan mnia nao hrui blei găl ênưih. Mnuih ƀuôn sang mâo lăn giăm mbĭt ăt bi mtrŭt mjhar hdơ̆ng găp kriê dlăng čiăng mâo boh mnga lu.”

Ƀuôn prŏng Cần Thơ leh bi mŭt mbĭt mâo giăm 495.000 čô mnuih djuê ƀiă, hlăm anăn lu hĭn jing mnuih djuê ana Khmer hŏng êbeh 411.000 čô. Hlăm thŭn êgao, ƀuôn prŏng pŏk ngă tŭ dưn Hdră kñăm ala čar mđĭ kyar bruă duh mkra - ala ƀuôn krĭng mnuih djuê ƀiă, hŏng ênoh prăk êbeh 305 êklai prăk. Mơ̆ng anăn, lu hdră bruă êlan klông, sang hră mơar, mdrao mgŭn dưi duh bi liê; sang dôk leh anăn prăk brei čan dưi đru, đru kơ mnuih ƀuôn sang mđĭ kyar bruă duh mkra, ƀrư̆ ƀrư̆ mđĭ hnơ̆ng klei hdĭp mnơ̆ng dhơ̆ng leh anăn ai tiê klei mĭn. Truh ară anei, ênoh gŏ êsei ƀun hlăm mnuih djuê ana Khmer mơ̆ng ƀuôn prŏng hrŏ adôk giăm 1.900 gŏ êsei. Lê Trung Tuấn, kiăng khua bruă sang čư̆ êa să Thạnh Thới An, ƀuôn prŏng Cần Thơ brei thâo:

“Mbĭt hŏng bruă pŏk ngă dŭm hdră mtrŭn hŏng mnuih ƀuôn sang djuê ana ƀiă, să lŏ mđing kơ bruă mjuăt bi hriăm bruă knuă hluê hŏng dŭm adŭ mjuăt bi hriăm hdră rông mnơ̆ng, mtrŭt mđĭ bruă lŏ hma, mtô bruă knuă… Mơ̆ng anăn đru kơ mnuih ƀuôn sang mđĭ klei thâo, mkăp kơ hdră mđĭ kyar bruă duh mkra amâo dah nao mă bruă ti dŭm knơ̆ng bruă čiăng mđĭ hnư hrui wĭt kơ gŏ sang.”

Hlăm wưng ti anăp, ƀuôn prŏng Cần Thơ  srăng hluê ngă mđrăm mbĭt dŭm bruă klam, hdră msir mđĭ kyar bruă duh mkra - ala ƀuôn; mtrŭt mđĭ hnơ̆ng ngă dŭm hdră bruă, hdră kñăm hlăm dŭm hdră ala čar kñăm; rơ̆ng mnuih ƀuôn sang dưi dưn djăp ênŭm, hmao dŭm hdră mtrŭn hluê si klei kčah mtrŭn, hluê anăn ƀrư̆ mđĭ hnơ̆ng klei hdĭp.