Êlâo anăn, hlăk êjai mă bruă hlăm war, Ksor Tân, kkiêng thŭn 1980, dôk ti ƀuôn Sơr, ƀuh dŭm  pŏk mčah leh anăn klang đing jing klang kahan êngiă asei. Ñu hưn leh hŏng Anôk bruă gĭt gai lĭng kahan să Ia Boong leh anăn Êpul K52 čiăng ksiêm dlăng, bi mklă. Leh pŏk mlar krĭng wăl tui duah, êpul bruă djŏ tuôm bi kƀĭn thiăm 2 klang kahan êngiă asei hŏng dŭm mta mnơ̆ng dhơ̆ng mkăn.

Snăn, yap truh hruê 13/8, knŏng hlăm sa wưng bhiâo, Êpul K52 kƀĭn mâo 8 klang kahan êngiă asei ti krĭng wăl ƀuôn Sơr, să Ia Boòng. Ară anei, dŭm klang kahan êngiă asei hŏng dŭm mta  mnơ̆ng djŏ tuôm mâo Êpul K52 kriê dlăng, dôk guôn bi mklă klei hâo hưn, duh kơ bruă bi mklă anăn djuê leh anăn mkŏ mjing klei ba dơr hlue si hdră kčah.

Hruê mbruê 13/8, Êpul ngă bruă tui duah mơ̆ng êpul gĭt gai hlue ngă hdră bruă “500 hruê mlam mtrŭt mđĭ bruă tui duah, bi kƀĭn leh anăn bi klă anăn klang kleh lĭng kahan êngiă asei” ti alŭ wăl ƀuôn hgŭm Nam Nha Trang, čar Khánh Hoà, hmao ƀuh đa đa klang kleh đing jing klang kleh lĭng kahan êngiă êa ti anôk mdrao mgŭn hlăm ƀăng boh tâo, hlăm wăl anôk bruă krŭ kdơ̆ng Đồng Bò.

Êlâo kơnăn, hruê 4/8, ông Nguyễn Văn Hưng, 65 thŭn, dôk ti alŭ Phước Tân, ƀuôn hgŭm Nam Nha Trang,  mâo klei hưn kơ anôk bruă djŏ tuôm kơ đa đa klang kleh ti alŭ wăl Anôk mdrao mgŭn êjai nao hlăm dliê mâo hŏng anei êbeh 20 thŭn. Mơ̆ng klei hưn anei, êpul knuă druh, lĭng kahan ƀuôn hgŭm Nam Nha Trang, mkŏ mjing lu hruê nao duah hluê si klei ktrâo mơ̆ng Hưng. Truh kơ aguah hruê 13/8, êpul êya ngă bruă hmao ƀuh đa da klang jơ̆ng prŏng, đĭng jing mơ̆ng lĭng kahan êngiă asei. Alŭ wăl hmao ƀuh dưi čuăl krĭng, răng mgang leh anăn hưn mdah hŏng gưl nah dlông čiăng ngă klei bi klă, msir hluê si klei čuăn.