Leh dŭm hruê kăm nao ti êa ksĭ, kŭm păn mơ̆ng pô trah mă kan Đỗ Văn Tiến, ƀuôn hgŭm Hoài Nhơn Đông, čar Gia Lai wĭt truh êđăp ênang ti krŭn ksĭ, djŏ hŏng klei čuăn hlăm lăm kŭm păn mâo lu kan hdang. Hluê si Tiến, bruă trah mă kan hdang ară anei ƀrư̆ mâo lu klei čuăn ktang phĭt. Dŭm mta klei trah mă amâo mâo hră mơar, trah mă amâo djŏ krĭng, soh bruă, êgao ling, amâo mâo rơ̆ng kơ kdrăp ktuê dlăng, amâo mâo čih amâodah čih pioh amâo mâo djŏ, yua bruă mă, kdrăp yua kăm agha amâodah trah mă soh hŏng hdră bhiăn ti êa ksĭ ala tač êngao…srăng ƀuah mkta ktang phĭt. Kyuanăn, bruă thâo klă dŭm klei čuăn jing yuôm bhăn hlăm grăp gưl nao ti êa ksĭ.

“Knŭk kna mâo leh lu hdrăm trŭn, êpul lĭng kahan knông lăn, êpul ksiêm dlăng kan hdang grăp mlan mâo klei hâo hưn kơ phung trah mă kan hdang hmei. Hmăng hmưi jih jang mnuih ƀuôn sang hluê ngă, djăp ênŭm hră mơar, trah mă amâodưi ngă soh čiăng kơ Việt Nam drei dưi pral ruh hră kñĭ čiăng ba čhĭ kan hdang mâo boh tŭ dưn jăk”.

Ăt msĕ hŏng lu phung trah mă kan hdang mkăn, Nguyễn Hữu Kính, ti êpul 3, Bãi Xếp, ƀuôn hgŭm  Quy Nhơn Nam jih klei hdĭp hŏng êa ksĭ, kyuanăn bruă hluê ngă hdră bhiăn amâo djŏ knŏng dêč kơ klei bi kmhal, ƀiadah lŏ răng mgang pô leh anăn krơ̆ng kơ hdră duh ƀơ̆ng.

“Hmei mâo lĭng kahan ƀăng jang knông lăn hâo hưn kơ hdră bhiăn, kơ bruă hluê ngă dŭm klei čuăn ti êa ksĭ čiăng kơ mnuih ƀuôn sang thâo klă leh anăn ngă djŏ, amâo mâo ngă soh hŏng klei čuăn. Mơ̆ng dŭm kdrăp yua gĭr hluê ngă djŏ hdră bhiăn lăn čar dưi hâo hưn. Lač jăk kơ klei uêñ mĭn mơ̆ng lĭng kahan knông lăn brei kơ hmei thâo dŭm klei čuăn mbĭt brei hmei hluê ngă”.

Đại úy Lê Văn Hòa, Khua anôk bruă ksiêm dlăng lĭng kahan knông lăn Mũi Tân brei thâo, anăp anei Hdră mtrŭn 246 mơ̆ng Knŭk kna bi klă ƀuh mkra đŭ bi kmhal hlăm bruă kan hdang srăng dưi yua leh anăn hrô kơ dŭm hdră mtrŭn hđăp êlâo anăn. Kyuanăn, êpul kreh jêñ jêñ hâo hưn kơ phung trah mă kan êjai diñu ngă hră mơar kơ kŭm păn mŭt leh anăn đuĕ mơ̆ng kdrŭn ksĭ.

“Hŏng dŭm klei čuăn mrâo kơ ƀuah mkra klei ngă soh đŭ bi kmhal hlăm klei IUU anôk bruă ngă leh klei hâo hưn hŏng phung trah mă kan hdang leh dŭm gưl nao ti êa ksĭ wĭt bi kƀĭn ti krŭn ksĭ kan. Hŏng phung ngă soh hŏng klei čuăn, anôk bruă srăng ƀuah mkra hluê si hdră bhiăn lăn čar, mbĭt anăn hưn hŏng Bruă sang čư̆ êa alŭ wăl čiăng hrăm mbĭt kiă kriê phung trah mă kan ngă soh čiăng rơ̆ng kơ bruă ruh hră knĭ mơ̆ng Việt Nam”.

Bi hŏng kđông kahan ƀăng jang knông lăn kdrŭn ksĭ Quy Nhơn, anôk bruă amâo djŏ knŏng hâo hưn ti krŭn ksĭ, anôk jưh kŭm păn ƀiădah lŏ mkŏ mjing lu gưl hlăk mblang hdră bhiăn lăn čar ti dŭm ƀuôn trah mă kan. Mta phŭn kñăm kơ dŭm hdră ƀuah mkra leh anăn klei ƀuah mkra mbŏ hŏng dŭm klei ngă soh ka dưi bi klă hlăm hdră mtrrŭn mrô 246. Trung tá Vũ Đức Tuệ, khua kiă kriê kđông kahan ƀăng jang knông lăn kdrŭn ksĭ Quy Nhơn brei thâo:

“Leh grăp gưl hâo hưn srăng đru kơ mnuih ƀuôn sang thâo klă dŭm klei čuăn hdră bhiăn lăn čar, mơ̆ng anăn mđĭ klei thâo săng hluê ngă leh anăn hâo hưn kơ găp djuê hlăm klei ngă bruă. Hŏng huôm hră mơĭt online, mrô QR hmei mơĭt leh kơ mnuih ƀuôn sang hmăng hmưi mnuih ƀuôn sang čih hưn hlăm mrô QR brei hmei tiŏ nao êpul bi klă, ƀuah mkra hluê si klei čuăn”.

Gia Lai ară anei mâo 3.147 kŭm păn hlăm ênoh 3.152 kŭm păn trah mă kan mdưm leh kdrăp ktuê dlăng hluê si klei čuăn.

Nguyễn Anh Dũng, khua kiă kriê êpul ksiêm dlăng kdrŭn ksĭ kan Gia Lai brei thâo, bruă hâo hưn dưi ngă jêñ jêñ, mơ̆ng kŭm păn dơ̆ng đuĕ truh kơ wĭt ti kdrŭn ksĭ. Kyuanăn, phung trah mă kan hdang čŏng pô hluê ngă djŏ dŭm klei čuăng kơ klei trah mă kan hdang, boh nik jing dŭm klei čuăn kơ bruă gang mkhư̆ klei trah mă IUU.

“Hlăm wưng hluê ngă mnuih ƀuôn sang thâo săng kơ IUU kyuanăn leh wĭt ti kdrŭn ksĭ ngă jăk dŭm mta kơ klei trah mă, rơ̆ng dŭm klei čuăn mâo leh. Truh kơ ară anei, jih jang dŭm kŭm păn ngă jăk sơăi, hlăm wưng kơ anăp hmei lŏ dơ̆ng gĭr bi mguôp hŏng dhar bruă djŏ tuôm mtô kơ mnuih ƀuôn sang kơ hră čih pioh điện tử brei mnuih ƀuôn sang bi kluôm hĭn kơ klei bi mlih mrô leh anăn dŭm hdră êlan mơ̆ng čar mâo leh.”

Hdră mtrŭn 246/2026/NĐ-CP srăng klă klơ̆ng dưi ba yua mơ̆ng hruê 18/8. Bruă mđĭ hĭn klei hâo hưn, ksiêm dlăng leh anăn ƀuah mkra klei ngă soh mâo dŭm êpul bruă djŏ tuôm bi klă jing hdră êlan yuôm bhăn čiăng mđĭ klei thâo săng hluê ngă djŏ hdră bhiăn mơ̆ng phung trah mă kan hdang, gang mkhư̆ klei trah mă soh hŏng hdră bhiăn IUU, đru mbĭt hŏng kluôm ala ruh hră knĭ mơ̆ng Dhar bruă Ơrôp hŏng kan hdang mơ̆ng Việt Nam.