Hlăm anôk rang mdah bŏ hŏng klei mngač, dŭm ƀô̆ mta mngač hlăm dŭm kdrăp čŭt hô rang mdah mngač ƀlêč ƀlir. Wăt tơdah hđeh amâo mâo jăk asei mlei, wăt tơdah hđeh amâo thâo săng, ăt bi êdah klei mơak hlăm Tết mơ̆ng phung hđeh. Ti tluôn dŭm mnĭt mmông mơak ti anôk rang mdah anei, jing lu klei khăp leh anăn klei gĭr mơ̆ng phung nai mtô. Nai Phan Thị Lệ, nai mtô adŭ can thiệp ƀrư̆ ƀrư̆ mgei ai tiê yăl dliê:

"Kyua phung ƀĭng găp amâo mâo hmư̆ ênhiang mmuñ kyua anăn phung nai bi hriăm dŭm klei kdŏ êlâo kơ anăn kơh lŏ mkŏ mbĭt hŏng klei mmuñ leh anăn êjai mkŏ mbĭt klei mmuñ snăn nai ktrâo atăt hŏng klei blŭ kngan mbĭt hŏng anăn čiăng kơ phung ƀĭng găp hdơr kơ klei kdŏ leh anăn hluê ngă hluê ênhiang."

Hŏng phung kdŏ hđeh điêt ti anôk mdah mlan pur mơ̆ng Anôk bruă đru mđĭ kyar bruă mtô bi hriăm kơ phung hđeh amâo mâo jăk asei mlei Dak Lak, mlam anei ăt bŏ hŏng klei hơ̆k mơak êdu êun. Phung hđeh čŭt hơô kdrăp mrâo mrang, bi msiam ƀô mta, lehanăn boh nik dưi mâo klei khăp čiăng, dưi bi mguôp hlăm hruê kƀĭn mak mlan pur. Hrăm mbĭt hŏng phung amai adei hlăm mlam kƀĭn mak mlan pur ti Anôk bruă đru mđĭ kyar bruă mtô bi hriăm kơ phung hđeh amâo mâo jăk asei mlei čar Dak Lak jing phung amĭ ama. Hŏng diñu, klei ƀuh anak pô mâo klei hơ̆k mơak, dưi bi mguôp hŏng ƀĭng găp lehanăn hơ̆k mơak dôk guôn mmông ƀơ̆ng huă, yan mlan pur thŭn anei djăp ênŭm leh klei yuôm bhăn. Amai Lê Thị Hồng, amĭ ĕ Hoàng Lê Minh Khang mgei ai tiê:

“Jing sa čô amĭ kâo ƀuh hơ̆k mơak leh anăn mgei ai tiê êdi, kâo ƀuh anak kâo ăt msĕ hŏng phung hđeh mkăn hơ̆k mơak êdi, leh anăn diñu khăp êdi. Kâo mâo klei lač jăk lu sơnăk.”

Aduôn Lưu Thị Bình Minh, kiăng khua kiă kriê anôk bruă đru mđĭ kyar bruă mtô bi hriăm hŏng phung hđeh amâo mâo jăk asei mlei čar Dak Lak brei thâo, ară anei sang hră jing sang dôk mbĭt mơ̆ng 144 čô hđeh điêt, hlăm anăn mâo 42 čô hđeh kngăl, kmlô, mbĭt hŏng phung hđeh êmưt đĭ kyar hlăm klei mĭn leh anăn dôk hjăn păn. Dŭm mta bruă bŏ hŏng klei khăp msĕ sơnei amâo djŏ knŏng ba truh kơ phung hđeh sa hruê hơ̆k mơak, ƀiădah lŏ pŏk ƀăng jang blŭ hrăm, đru kơ phung hđeh mâo thiăm klei jhŏng ñŭ kma hŏng yang ƀuôn.

Grăp mlan Anôk bruă ăt mkŏ mjing dŭm mta bruă êngao adŭ hriăm kơ phung hđeh, ƀiădah Trung thu thŭn mdê hĭn jing mâo klei uêñ mĭn mơ̆ng khua gĭt gai čar, Knơ̆ng bruă hriê mđup brei mnơ̆ng, phung hđeh leh anăn Anôk bruă hơ̆k mơak êdi. Anei jing sa Trung thu jăk êdi kyua mmăt hruê 5 phung hđeh dưi iêo nao ti Anôk bruă Dhar kreh čiăng nao hgŭm.”

Lŏ sa yan mlan pur lŏ wĭt ti sang hră mdê êdi anei. Ti anôk anei, mâo ênai hgơr lân kwang, mâo dŭm ênhiang kdŏ bŏ hŏng êa hŏ hang leh anăn klei khăp mơ̆ng phung nai hđeh, mâo dŭm hnư mnơ̆ng hơuh mđao klei khăp leh anăn lu mta mta ală mta mngač tač, mngač tač. Mlam mlan pur srăng kčưm ruê̆, ƀiădah klei hơ̆k kdơ̆k leh anăn ai êwa klei khăp ăt srăng dôk nanao, mđĭ ai phung hđeh hơĭt ai tiê ti ktuê êlan anăp.