Hră ênua yang ƀuôn čŏng blei jing hdră ênua yang ƀuôn mơ̆ng Đảng leh anăn Knŭk kna, kyua klei tŭ dưn kơ mnuih mă bruă leh anăn mnuih ƀuôn sang, mâo Knŭk kna răng mgang, mơ̆ng anôk bruă Hră ênua yang ƀuôn hluê ngă.

Phung nao hgŭm jing mnuih ƀuôn sang Việt Nam mơ̆ng 15 thŭn kơ dlông amâo djŏ phung nao hgŭm hŏng hră ênua yang ƀuôn leh anăn amâo djŏ phung dôk dưn prăk mlan leh wĭt mdei bruă, prăk đru hŏng hră ênua yang ƀuôn, prăk đru grăp mlan.

Hnơ̆ng tla grăp mlan hŏng 22% ênoh hrui wĭt ngă tur knơ̆ng tla prăk. Hlăm anăn, mnuih nao hgŭm hră ênua yang ƀuôn čŏng pô dưi ruah hnơ̆ng hrui mă ngă tur knơ̆ng tla msĕ si: hnơ̆ng ƀiă hĭn jing hnơ̆ng kah knar gŏ êsei ƀun krĭng ƀuôn sang hluê si klei kčah mtrŭn; hnơ̆ng lu hĭn jing 20 blư̆ hnơ̆ng prăk mlan phŭn.

Mnuih mă bruă dưi ruah hdră tla prăk grăp mlan, 3 mlan, 6 mlan, 12 mlan; tla 1 blư̆ kơ lu thŭn êdei anăp (lu êdi 5 thŭn); amâodah tla 1 blư̆ kơ wưng adôk kƀah (lu êdi 60 mlan) čiăng djăp klei găl dưi dưn prăk mlan leh wĭt mdei.

Mnuih nao hgŭm hlăm hră ênua yang ƀuôn čŏng pô mâo Knŭk kna đru prăk tla hluê si ênoh kah knar (%) hlăm hnơ̆ng tla hră ênua yang ƀuôn grăp mlan hŏng hnơ̆ng čuăn gŏ êsei ƀun krĭng ƀuôn sang (wưng đru amâo êgao 10 thŭn (120 mlan)). Ênoh đru klă klơ̆ng kơ grăp čô sơnei:

- Đru 50% hŏng mnuih dôk hlăm gŏ êsei ƀun; mnuih dôk hdĭp ti să plao ksĭ, anôk bruă knơ̆ng.

- Đru 40% hŏng mnuih dôk hlăm gŏ êsei giăm ƀun.

- Đru 30% hŏng mnuih djuê ƀiă.

- Đru 20% hŏng dŭm êpul mkăn.

Mnuih nao hgŭm hlăm hră ênua yang ƀuôn čŏng pô tơdah mâo djăp klei găl tui si klei kčah mtrŭn, dưi dưn dŭm klei tŭ dưn snei:

-Tal êlâo: dưi dưn prăk đru kơ klei ƀă kkiêng anak hluê si klei čuăn.

-Tal dua: dưi dưn prăk mlan leh wĭt mdei ênŭm klei găl kơ thŭn wĭt mdei leh anăn wưng bi mguôp hră ênua yang ƀuôn. Prăk mlan leh wĭt mdei dưi mkra mlih grăp thŭn hluê si hnơ̆ng đĭ kyar bruă duh mkra.

-Tal tlâo: mnuih nao hgŭm hlăm hră ênua yang ƀuôn čŏng pô tơdah dưi dưn prăk mlan leh wĭt mdei srăng mâo anôk bruă ênua yang ƀuôn mkăp brei hră ênua mdrao mgŭn amâo mâo mă prăk ôh.

-Tơdah mnuih nao hgŭm hlăm hră ênua yang ƀuôn djiê, găp djuê srăng dưi dưn prăk đru dơr djiê leh anăn prăk đru sa blư̆ hluê si klei čuăn.

-Tơdah leh djăp thŭn wĭt mdei ƀiădah ka djăp 15 thŭn tla prăk hră ênua yang ƀuôn leh anăn ka djăp klei găl dưi dưn prăk mlan leh wĭt mdei yang ƀuôn, mnuih nao hgŭm hŏng hră ênua dưi dưn hră ênua yang ƀuôn sa blư̆, amâodah akâo dưn hluê si hdră đru mguôp grăp mlan.