Êlâo anăn, Siu Bích, kkiêng thŭn 1952, dôk ti ƀuôn Bi, hưn hŏng Anôk bruă gĭt gai lĭng kahan să Ia Dom leh anăn Êpul K52 hriê ksiêm dlăng, tui duah,  hlăk ñu ƀuh dŭm boh msat lăn đing jing msat phung lĭng kahan. Hluê klei ksiêm dlăng, êpul bruă djŏ tuôm bi mklă phŭn agha mâo klei tŭ leh anăn mkŏ mjing klei tui duah, bi kƀĭn.

Boh tŭ, Êpul K52 bi kƀĭn leh 2 klang lĭng kahan djiê êngiă tui si mnơ̆ng yua. Dua klang lĭng kahan dưi ƀuh ti dua anôk kbưi hŏng 12 met hlăm krĭng ƀuôn Bi, să Ia Dom. Ară anei anăn phung 2 čô kahan djiê êngiă ka dưi bi mklă. Êpul K52 lŏ dơ̆ng hưn mdah hŏng gưl mâo klei dưi čiăng ktuê dlăng, gĭt gai dŭm hdră êdei anăp.