Jing să krĭng 3 dleh dlan êdi, anôk bruă hâo hưn mtô mblang ti să Dam Rông 4, čar Lâm Đồng ăt đĭ kyar ktang. Đĭng blŭ thâo mĭn jing  mâo lu hlăm dŭm boh ƀuôn mnuih djuê ƀiă. Amâo djŏ knŏng phung mda asei, ƀrư̆ hruê ƀrư̆ mâo lu mnuih ƀuôn sang hlăk thŭn mda leh anăn wăt phung khua thŭn yua đĭng blŭ thâo mĭn čiăng thâo klei mrâo. Ayŏng Liêng Hót Ha Ngát, ƀuôn Mê Ka, să Dam Rông 4, brei thâo, lu kdrăp yua, klei ngă hlăm  đĭng blŭ thâo mĭn dôk mâo mnuih ƀuôn sang yua hlăm klei hdĭp, bruă knuă aguah tlam:

“Đĭng blŭ thâo mĭn jing sa hdră êlan ară anei leh. Klei phung mda asei djă yua snăn đa đa djă yua pral snăk. Êpul kdrăp mrô êpul êya đru kơ mnuih ƀuôn sang mkŏ dưm VneiD, lehanăn tla prăk amâo mâo yua prăk mơar ôh leh anăn yua bruă knŭk kna online".

Čiăng kơ bruă bi mlih mrô hlăm êpul êya boh nik ti dŭm alŭ, ƀuôn krĭng taih kbưi, krĭng mnuih djuê ƀiă mơ̆ng čar mâo boh tŭ klă sĭt, čar Lâm Đồng mkŏ mjing leh êbeh 2.650 Êpul kdrăp mrô êpul êya hŏng êbeh 16.300 čô hgŭm. Klei mdê hjăn jing dŭm êtuh čô mâo kơhưm ti dŭm alŭ, ƀuôn jing phung hgŭm hlăm dŭm Êpul kdrăp mrô êpul êya. Hŏng klei đăo knang leh anăn wăt ai tiê bi hmô găn êgao klei kpăk gun thŭn mduôn nao hgŭm, ba yua kdrăp mrô, phung mâo kơhưm hlăm dŭm alŭ, ƀuôn ti Lâm Đồng sĭt êmĭt mtrŭt mjhar anak čô, mnuih ƀuôn sang ba yua đĭng blŭ thâo mĭn čiăng tui duah klei hâo hưn, tui hriăm klei thâo mkra mjing leh anăn nao hgŭm hlăm hdră kreh knhâo mrâo mrang. Thŭn anei găn leh thŭn 72 leh anăn mâo êbeh 650 gŏ sang hlăm alŭ mpŭ kơ ai tiê tui hriăm kdrăp hâo hưn ăt msĕ mơh ba yua tŭ dưn đĭng blŭ thâo mĭn hlăm klei hdĭp, Ntơ Ha Krong, mnuih mâo kơhưm alŭ Dă Nhinh, să Dam Rông 4, brei thâo:

“Kâo dlăng klei hâo hưn, kâo thâo săng boh klei dlông rŏng lăn. Tal 2 jing hlăm đĭng blŭ arăng hưn mthâo anôk hbâo pruê. Grăp mlan dưi pruê snăn kâo blei lông yơh. Klei kreh knhâo, yua ana anei, ana adih kâo ksiêm dlăng lông ngă, kâo ngă. Klei găl hĭn jing đĭng blŭ. Đĭng blŭ anei nai mtô hlăm sang. Kâo ksiêm dlăng anôk anei, đăm ksiêm dlăng anôk soh. Klei hâo hưn hlăm anei mâo klei tŭ mâo klei jhat ƀiădah êlan djŏ snăn kâo nao anôk anăn yơh”.

Mơ̆ng klei hâo hưn truh kơ blei mprăp, kdrăp mrô hlăk ƀrư̆ bi mlih klei mưng hdĭp mơ̆ng mnuih ƀuôn sang krĭng taih kbưi, krĭng mnuih djuê ƀiă čar Lâm Đồng. Ti alŭ Đam Pao, să Phú Sơn Lâm Hà, bruă blei, čhĭ mnơ̆ng hluê hla pŏk yang ƀuôn jing klei mưng juăt hŏng lu mnuih ƀuôn sang. Alŭ mâo êbeh 225 gŏ sang mnuih djuê ƀiă K'Ho djuê ana Cil krơ̆ng kjăp bruă pơ̆k mñam, hlăm anăn lu gŏ sang ba yua leh hla pŏk yang ƀuôn čiăng hưn mthâo, čhĭ mnơ̆ng dhơ̆ng leh anăn hluê ngă dŭm klei bi mnia mblei mkăp kơ bruă pơ̆k mñam ăt msĕ mơh klei hdĭp aguah tlam. Ayŏng Hoàng La Nhất Duy, mnuih kreh jao mnơ̆ng ti alŭ Đam Pao, brei thâo:

“Grăp hruê kâo ăt nao ba mnơ̆ng hlăm ƀuôn Đam Pao anei yơh. Ară anei mnuih ƀuôn sang blei mnơ̆ng lu hlăm Tiktok, Facebook arăng čhĭ mnơ̆ng live. Mnuih ƀuôn sang ară anei mnơ̆ng ƀơ̆ng huă snăn blei hlăm sang mnia yơh ƀiă mnơ̆ng čŭt hơô snăn kreh blei hlăm hla pŏk web ƀiădah ƀiă snăk tuôm nao ruah mnơ̆ng”.

Hluê ngă hdră êlan "nao grăp êlan, nao grăp boh sang", phung hgŭm hlăm Êpul kdrăp mrô yang ƀuôn ti čar Lâm Đồng dôk jih ai tiê ktrâo lač kơ mnuih ƀuôn sang ba yua VNeID, ba mơĭt hră mơar online, tla prăk amâo yua prăk êdeh lehanăn dưn yua dŭm kdrăp mrô yua aguah tlam. Boh sĭt brei ƀuh, klei bi mlih mrô ti krĭng mnuih djuê ƀiă čar Lâm Đồng amâo djŏ knŏng jưh knang kơ klei dưi dưn yua kdrăp mrâo, ƀiădah lŏ čiăng kơ phung mâo klei blŭ, mâo kơhưm hlăm êpul êya čiăng ktrâo lač lehanăn tă hdră kơ mnuih ƀuôn sang ba yua kdrăp mrâo djŏ hdră. Hŏng klei mdê jing să dleh dlan êdi, êbeh 96% ênoh mnuih jing mnuih djuê ƀiă, Sơn Điền bi mklă mđĭ lar bruă klam mơ̆ng phung mâo kơhưm jing sa hlăm dŭm hdră msir čiăng ba klei mlih mrô truh giăm hĭn hŏng mnuih ƀuôn sang. Vũ Đức Nhuần, Khua anôk bruă sang čư̆ êa să Sơn Điền, bi mklă:

“Tơdah čiăng bi mlih mrô hlăm yang ƀuôn snăn brei phung mâo kơhưm jing mnuih dôk hlăm Êpul kreh knhâo mrô yang ƀuôn. Tơdah ba mdah dŭm hnơ̆ng čuăn ruah phung mâo kơhưm snăn hmei ba mdah hnơ̆ng čuăn brei mâo klei thâo săng kơ kdrăp hâo hưn leh anăn mâo klei gĭr hlăm bruă ba yua kdrăp hâo hưn. Sitôhmô phung mâo kơhưm hlăm yang ƀuôn snăn brei thâo ba yua dŭm kdrăp đĭng blŭ thâo mĭn čiăng ngă pô ba anăp ktrâo atăt kơ phung anak čô hlăm gŏ sang, hlăm yang ƀuôn. Mă kơhưm pô mđĭ ai mtrŭt mjhar anak čô, yang ƀuôn hluê ngă bruă bi mlih mrô”.

Čŏng pô tui hriăm, ba yua kdrăp mrâo leh anăn bi hmô hlăm klei hdĭp, phung mâo kơhưm mơ̆ng čar Lâm Đồng dôk jing kdrông mkŏ ba klei mlih mrô truh giăm hĭn hŏng grăp gŏ sang, grăp alŭ, ƀuôn. Mbĭt hŏng dŭm Êpul kdrăp mrô yang ƀuôn, phung mâo kơhưm dôk đru mguôp yuôm bhăn čiăng kơ klei mlih mrô klă sĭt nao hlăm klei hdĭp./.