Mơ̆ng hruê 30/9 truh 6/10, mơ̆ng klei hưn mơ̆ng mnuih ƀuôn sang alŭ wăl, Êpul K52 mkŏ mjing leh êpul ksiêm dlăng, kuai mă leh anăn bi kƀĭn mâo 5 klang lĭng kahan djiê êngiă ti Campuchia. Hlăm anăn, 1 klang ti čar Rattanakiri, 2 klang ti čar Stung Treng leh anăn 2 klang ti čar Preah Vihear. Ti dŭm anôk bi kƀĭn, êpul bruă djŏ tuôm hrui mă lu mnơ̆ng dhơ̆ng mơ̆ng lĭng kahan, msĕ si ca-men, pui pĕ, đĭng êa drao Penicillin, abŭ msei B52, knŭt ao lĭng kahan, ksi, ală kĭng… Êpul K52 ngă leh bruă mă mta êgei hŏng dŭm klang kleh adôk mta čiăng ngă bruă ksiêm mkă ADN bi mklă anăn phung lĭng kahan djiê êngiă êdei anei.

 Hŏng bruă tui duah, bi kƀĭn hlăm ala čar, Êpul K52 lŏ bi kƀĭn thiăm 3 klang kleh phung lĭng kahan djiê êngiă ti ƀuôn Bi, să Ia Dom, čar Gia Lai. Mơ̆ng klei hâo hưn mơ̆ng Siu Bích (kkiêng thŭn 1952, dôk ti alŭ wăl) kơ dŭm msat lăn hlăm war sang, anôk bruă ksiêm dlăng leh anăn ƀuh tŭ jing 2 klang kleh hlăm hruê 5/10 leh anăn 1 klang kleh hlăm tlam hruê 7/10.