Mơ̆ng să plao êa Nhơn Châu, ayŏng Nguyễn Văn Bảy mbĭt hŏng êbeh 100 čô mnuih ƀuôn sang găn 13 hải lý mŭt hlăm lăn hang čiăng nao hlăm klei bi lông mă hră dưi mgăt êdeh hnơ̆ng A1. Hŏng mnuih ƀuôn sang ti plao êa, grăp blư̆ mŭt hlăm lăn hang jing thiăm sa blư̆ brei mđing kơ klei êrô êbat, huă ƀơ̆ng. Hlăm klei bi lông anei, dŭm ênoh prăk anăn mâo knŭk kna đru, đru kơ mnuih ƀuôn sang bi hrŏ sa kdrêč klei dleh dlan. Hŏng ayŏng Bảy, klei yuôm bhăn hĭn jing dŭm klei thâo săng kơ hdră bhiăn êlan klông dưi ba yua hlăm klei hdĭp grăp hruê.

“Klei mĭn tal êlâo mâo hŭi ƀiădah ăt gĭr bi lông čiăng tŭ jing. Tơdah nao hlăm êlan klông thâo nao djŏ êlan, djŏ grông êlan klông hluê si klei kčah mtrŭn mơ̆ng hdră bhiăn”.

 Dương Hiệp Hưng, Khua anôk bruă sang čư̆ êa să Nhơn Châu brei thâo, ênoh yuôm mơ̆ng hdră bruă amâo djŏ knŏng dôk ti bruă đru kơ mnuih ƀuôn sang mâo thiăm klei găl dưi mkăp hră dưi mgăt êdeh, ƀiădah yuôm bhăn hĭn jing mprăp klei thâo săng kơ hdră bhiăn hlăm êlan klông hŏng klei klă nik.

“Mnuih ƀuôn sang đăo knang êdi kơ dŭm hdră bruă tŭ yuôm msĕ snei, hmăng hmưi mnuih ƀuôn sang mâo klei tŭ dưn leh anăn grăp čô mnuih ƀuôn sang jing pô hâo hưn čiăng mđĭ klei thâo săng hlue ngă hdră bhiăn êlan klông čiăng mkŏ mjing să plao ksĭ ƀrư̆ hruê ƀrư̆ kreh dhar, mrâo mrang leh anăn jăk siam.”

Tơdah ti plao ksĭ Nhơn Châu, boh kbưi lăn ala jing klei gun kpăk snăn ti dŭm krĭng mnuih djuê ƀiă mơ̆ng Gia Lai, klei dleh dlan lŏ dơ̆ng mơ̆ng klei dlăng leh anăn thâo săng klei bi lông hŏng klei yuăn. Mâo dŭm mnuih ƀuôn sang amâo thâo dlăng, thâo čih klei yuăn. Tơdah ba yua hdră bi lông hluê si klei bhiăn, diñu dleh dưi bi êdah djăp ênŭm klei thâo leh ktrâo lač, khădah ăt mâo klei čiăng leh anăn klei dưi ba yua êdeh êdâo.

Čiăng ruh mgaih klei gun kpăk anei, ti dŭm alŭ wăl, hdră bi lông klei hriăm hŏng klei blŭ hrăm. Phung bi lông ăt jing mnuih djuê ƀiă klă anăp mdưm klei êmuh hŏng klei blŭ djuê ana pô, đru kơ phung bi lông thâo săng klă boh phŭn leh anăn wĭt lač hluê si klei pô thâo. Amai Rơ Châm Di, ti ƀuôn O, să Ia O, čar Gia Lai, hơ̆k mơak brei thâo:

“Hruê anei dưi bi lông mă hră dưi mgăt êdeh leh anăn dưi leh hlăm klei  bi lông klei hriăm snăn pô mơak snăk. Êdei anăp mgăt êdeh srăng êđăp ênang hĭn”.

Klei hơ̆k mơak mơ̆ng amai Di ăt jing klei hmăng hmưi mơ̆ng lu mnuih ƀuôn sang krĭng mnuih djuê ƀiă: dưi hriăm leh anăn dưi tŭ yap hră bi mklă hŏng klei thâo pô, ƀiădah hluê hdră djŏ guôp hŏng boh sĭt. Trung tá Thái Hoàng Nam, Khua kahan ksiêm să knông lăn Ia O, čar Gia Lai, brei thâo, jing alŭ wăl mâo giăm 70% ênoh mnuih ƀuôn sang jing mnuih djuê ƀiă, klei hdĭp adôk lu klei dleh dlan. Bruă dưi mtô bi hriăm, bi lông čiăng mkăp hră dưi mgăt êdeh amâo mă prăk đru kơ mnuih ƀuôn sang lŏ mâo klei găl dưi dưn hdră bhiăn êlan klông.

“Hluê anăn ăt mđĭ hĭn klei thâo săng kơ hdră bhiăn êđăp ênang hlăm êlan klông. Leh anăn tơdah dưi mkăp dŭm hră mơar snăn mnuih ƀuôn sang srăng mâo ai tiê đua klam hĭn hlăm bruă hluê ngă hdră bhiăn, răng mgang asei pô, gŏ sang leh anăn êpul êya yang ƀuôn”.

Mơ̆ng krah mlan 8/2025 truh kơ ară anei, kahan ksiêm čar Gia Lai mkŏ mjing leh 13 klei bi lông hrŏng ruah hră dưi mgăt êdeh hnơ̆ng A1 amâo mă prăk kơ 862 čô mnuih hlăm gŏ sang ƀun, giăm ƀun ti dŭm să dleh dlan. Hlăm ênoh anei, 475 čô mnuih djăp leh klei čiăng leh anăn dưi mkăp hră dưi mgăt êdeh.

Thượng tá Ksor H’bơ Khắp, Kiăng khua knơ̆ng bruă kahan ksiêm čar Gia Lai brei thâo, hdră đru kơ lu gŏ sang dleh dlan mâo klei găl dưi mâo klei thâo săng kơ hdră bhiăn leh anăn dŭm klei čiăng êdi čiăng nao hlăm êlan klông êđăp ênang.

“Gĭt gai kahan ksiêm dŭm să hlăm kluôm čar ksiêm dlăng jih jang gŏ sang dleh dlan, gŏ sang knŭk kna dlăng ba čiăng kơ knŭk kna đru. Leh kơ anăn čih anăn leh anăn ngă dŭm knhuang čiăng đru kơ mnuih ƀuôn sang ti dŭm krĭng anei dưi ngă klei bi lông čiăng dưi mâo hră dưi mgăt êdeh, rơ̆ng dưi mâo klei thâo săng hdră bhiăn tơdah mŭt hlăm êlan klông”.

 Hŏng dŭm alŭ wăl dôk mâo lu klei dleh dlan ti Gia Lai, gru hmô "hră dưi mgăt êdeh khăp čiăng" ăt jing hdră ba dŭm klei găl rơ̆ng êđăp ênang hlăm êlan klông truh giăm hĭn hŏng mnuih ƀuôn sang, mơ̆ng anăn đru mguôp mkŏ mjing klei thâo săng hlue ngă hdră bhiăn hlăm êlan klông mơ̆ng nah gŭ.