Tui si klei hâo mdah, hlue ngă hdră êlan “500 hrue mlam” tui duah, kuai ba wĭt klang kleh, lehanăn bi klă anăn phung djiê êngiă, truh kơ ară anei hlăm kluôm ala mâo kuai leh truh klang kleh 1.080 čô djiê êngiă. Phŭn bruă kahan ksiêm lŏ ksiêm wĭt, bi mklă dŭm êtuh êbâo čô phung djiê êngiă ka thâo klă anăn, mkŏ mjing mă ADN ti lu alŭ wăl lehanăn dưi bi mklă leh truh 23 čô.

Knŭk kna mâo hdră mkŏ mjing klei bi hdơr 80 thŭn hrue kahan êka êkeh – phung êngiă asei, mkŏ mjing bruă bi liê hŏng ênoh 13.000 êklai prăk kơ klei hdơr knga tla ai, duh kơ nuih mâo bruă hŏng cách mạng. Blŭ klah čŭn klei bi kƀĭn, K’iăng khua knŭk kna Phạm Thị Thanh Trà mñă, klei bi hdơr 80 thŭn hrue kahan êka êkeh – phung êngiă asei jing bruă yuôm bhăn kơ kđi čar, kơ hƀuê ênuk, bŏ hŏng klei thâo khăp ti gưl lăn čar, jing wưng čiăng kơ kluôm  Đảng, jih jang mnuih ƀuôn sang lehanăn lĭng kahan hdơr knga, mpŭ mni dŭm klei săn asei mlei, klei duh myơr prŏng prĭn mơ̆ng phung mâo bruă hŏng la čar. K’iăng khua knŭk kna mtă kơ dŭm êpul bruă mkŏ mjing dŭm bruă bi hdơr hŏng klei mpŭ, hŏng klei klă, mâo klei tŭ dưn yuôm bhăn, bi lar jăk ba klei tŭ dưn kơ găp djuê mnuih êngiă asei, kahan êka êkeh, kahan ruă duam, lehanăn mnuih mâo bruă tŭ dưn./.