Anôk bruă dhar kreh - ala ƀuôn, Êpul gơ̆ng bruă ƀuôn sang čar Dak Lak ngă leh klei ksiêm dlăng hŏng dŭm knơ̆ng, dhar bruă djŏ tuôm kơ bruă mkŏ mjing bruă ngă mơ̆ng dŭm anôk bruă mtô bi hriăm leh mkŏ dăp, ngă djŏ bruă klam thŭn hriăm 2026-2027 leh anăn dŭm thŭn kơ anăp. Leh mkŏ dăp, Dak Lak bi hrŏ mkrah wah ênoh anôk bruă mtô bi hriăm knŭk kna, trŭn adôk 625. Bruă lŏ mkŏ dăp anôk bruă sang hră mơar đru bi khuăt anôk kriê dlăng, mđing kơ klei mtô leh anăn hriăm. Ƀiădah, bruă anei ăt ba lu klei awăt hlăm hdră mkŏ dăp êpul, boh nik ti dŭm sang hră hnơ̆ng prŏng, mâo lu anôk hriăm kbưi hŏng anôk mkăn.

Ară anei kluôm čar Dak Lak mâo giăm 33.000 čô nai mtô, hlăk êjai hluê si ênoh čuăn jing čiăng êbeh 35.000 čô. Klei mđing dlăng, khădah kƀah nai mtô ti lu gưl hriăm, klei hriăm, alŭ wăl ăt mâo 686 čô nai êbeh ƀiă, lu ti dŭm klei hriăm Ngữ văn, Lịch sử, Địa lý. Hlăk êjai anăn, dŭm klei hriăm Tiếng Anh, Tin học, Mỹ thuật, Âm nhạc leh anăn Mjuăt ktang asei mlei dôk kƀah nai mtô. Klei dưi mkŏ dăp nai mtô plah wah dŭm anôk bruă mrâo dưi mkăp kơ hlăm brô mkrah ênoh čiăng, ngă kơ klei ktrŏ hrŏng ruah leh anăn kuôl kă nai mtô ăt prŏng.

Mbĭt anăn, hnơ̆ng čuăn mnuih mă bruă ti dŭm sang hră leh bi mŭt mbĭt ăt ka djŏ guôp hŏng boh sĭt. Mâo sang hră lu anôk hriăm kbưi truh dŭm pluh km, ƀiădah mnuih mă bruă mdrao mgŭn sang hră knŏng mâo sa čô. Knơ̆ng bruă sang čư̆ êa čar Dak Lak akâo kơ Phŭn bruă sang hră mtô bi hriăm ksiêm dlăng, mkra mlih hnơ̆ng čuăn mnuih mă bruă hluê si hnơ̆ng leh anăn klei mdê hjăn mơ̆ng dŭm anôk bruă mtô bi hriăm, rơ̆ng mkăp djŏ hŏng klei čiăng kriê dlăng klei suaih pral phung hđeh sang hră.

Sa klei gun kpăk mkăn jing msir mghaih hdră mtrŭn kơ phung knuă druh kriê dlăng êgao hnơ̆ng leh mkŏ dăp. Phung knuă druh hđăp mâo dăp leh ti anôk bruă mrâo, wăt ngă nai mtô, amâo djŏ hlăm ênoh ksiêm dlăng bi hrŏ. Klei anei ngă kơ dŭm čô mâo klei čiăng mdei bruă ƀiădah ka dưi msir mghaih ôh hdră mtrŭn. Knơ̆ng bruă sang hră mtô bi hriăm čar Dak Lak akâo kơ Phŭn bruă kriê dlăng bruă knuă pral mkra mlih hdră mtrŭn čiăng ruh mgaih klei dleh dlan kơ dŭm alŭ wăl, rơ̆ng klei tŭ dưn leh anăn bi hơĭt ai tiê êpul êya leh mkŏ dăp.