Hruê mbruê 21/10, ti Tač êdeh phiơr prŏng Cần Thơ (krĭng kahan alŭ wăl 9), Knơ̆ng gĭt gai lĭng kahan krĭng 9 bi hgŭm hŏng Phŭn bruă lĭng kahan leh anăn dŭm čar, ƀuôn prŏng hlăm krĭng Lăn Dap Kngư kdrưh kơăm mkŏ mjing hdră dŭ mdiăng, ba jao klang lĭng kahan djiê êngiă pioh mkă dlăng ADN čiăng bi mklă anăn phung lĭng kahan djiê êngiă hŏng êdeh phiơr dŭ mdiăng CASA-C295 Lữ đoàn 918 (Kahan răng mgang wăl adiê).

Gưl dŭ mdiăng 8.453 mta klang lĭng kahan djiê êngiă hŏng êdeh phiơr dŭ mdiăng lĭng kahan tal anei ăt mjưh ruê̆ bruă mă mta kman mơ̆ng Hdră bruă 500 hruê mlam.

Anei jing kdrông mkŏ êlan phiơr myang bi mguôp h ƀuê ênuk kdrưh kơăm hŏng ară anei mơ̆ng klei hdơr knga. Grăp mta klang lĭng kahan djiê êngiă guôm hŏng hla čhiăm gru hrah mtah jing sa pui klei čang hmăng, jing asăp iêô ktang phĭt mơ̆ng dŭm êbâo thŭn dôk guôn. Anei amâo djŏ knŏng jing hdră bruă mơ̆ng klei kreh knhâo leh anăn kdrăp mrâo, ƀiădah jing klei phiơr mơ̆ng klei khăp, klei thâo bi đru, ba hriê klei đăo knang ktang phĭt, klei čang hmăng, bi hơĭt klei ênguôt hnĭng leh dŭm thŭn mlan dôk guôn.