8 klei čih mkra hdră bhiăn mâo mđing bi trông, đru mguôp, mâo: Hdră bhiăn bi lông blei (lŏ mlih mrâo); Hdră bhiăn bi lông blei ngăn drăp (lŏ mlih mrâo); Hdră bhiăn sang dôk (lŏ mlih mrâo); Hdră bhiăn mđĭ kyar anôk bruă duh mkra điêt lehanăn man dưn; Hdră bhiăn lŏ mlih mrâo, thiăm mbŏ dŭm mta mơ̆ng Hdră bhiăn mnia mblei, Hdră bhiăn bi ktưn, Hdră bhiăn kriê dlăng bruă mnia mblei hŏng ala tač êngao, Hdră bhiăn răng mgang klei tŭ dưn kơ mnuih blei yua; Hdră bhiăn hrui blei, hrui mă ngăn drăp; Hdră bhiăn lŏ mlih mrâo, thiăm mbŏ dŭm mta mơ̆ng Hdră bhiăn răng mgang klei êđăp ênang hlăm bruă mă; leh anăn klei čih mkra Hdră bhiăn lŏ mlih mrâo, thiăm mbŏ dŭm mta mơ̆ng dŭm hdră bhiăn kơ klei mjuăt ktang asei mlei, hiu čhưn ênguê, sang dlăng hră, film, mnơ̆ng kriê pioh dhar kreh, klei hưn mthâo, bruă klei mrâo.

Hŏng klei čih mkra Hdră bhiăn bi lông blei mnia (lŏ mlih mrâo), pô bi ala Knơ̆ng bruă Hdră bhiăn čar Dak Lak lač, klei čih mkra mrâo mdei ti klei čih yap dŭm phŭn, dhar bruă leh anăn Knơ̆ng bruă sang čư̆ êa gưl čar, ka bi klă ôh bruă klam klă klơ̆ng mơ̆ng grăp anôk bruă.

“Mta 9 kơ bruă klam kiă kriê mơ̆ng knŭk kna hŏng klei bi lông blei mnia ngăn drăp brei lŏ thiăm mbŏ, jao kơ knŭk kna čoh čuăn klă mngač mta phŭn anei čiăng bi klă mta phŭn kiă kriê mơ̆ng knŭk kna, mbĭt anăn bi klă ya alŭ wăl anôk bruă mâo bruă klam, đru kơ knơ̆ng bruă sang čư̆ êa čar hlăm bruă hluê ngă bruă klam anei”.

Đru mguôp klei blŭ kơ hdră mtrŭn mkra mlih, thiăm mbŏ dŭm mta mơ̆ng Hdră bhiăn mnia mblei, phung bi ala mtă brei čih mkra klă klơ̆ng hĭn bruă klam hưn mthâo, bi mrâo mrang anăn mnơ̆ng dhơ̆ng, bruă ngă dôk hlăm klei dưi knŭk kna, rơ̆ng klă klei dưi leh anăn găl ênưih hlăm hdră hluê ngă. Hồ Văn Dũng, K’iăng khua anôk bruă ksiêm dlăng klei mŭt kbiă krĭng wăl XIV, lač:

"Hdră mtrŭn msĕ snăn jing knŏng mdei ti bruă jing Phŭn bruă mâo bruă klam jing hưn mdah dŭm mta mnơ̆ng dhơ̆ng, bruă ngă dôk hlăm klei dưi, ka lač ôh kơ bruă anôk bruă mâo bruă klam čih mkra bi mlih mrâo dŭm mta mnơ̆ng dhơ̆ng, bruă ngă dôk hlăm klei dưi, dŭm hdră mtrŭn anăn anôk bruă anăn. Akâo thiăm mbŏ hdră mtrŭn jing klă klơ̆ng čiăng rơ̆ng klă klei dưi leh anăn bruă klam mjing leh anăn mjing klei găl hlăm hdră mkŏ mjing hluê ngă".

Hŏng hră čih Hdră bhiăn mkra mlih, thiăm mbŏ dŭm mta mơ̆ng Hdră bhiăn klei êđăp ênang, doh ê ƀăt hlăm bruă knuă, klei phung bi ala mđing jing pŏk mlar mnuih nao hgŭm hlăm hră ênua klei truh hlăm bruă knuă, klei ruă djŏ tuôm hŏng hdră đru djŏ guôp. Hluê anăn, brei ksiêm dlăng klei kčah mtrŭn klă phŭn đru mơ̆ng ngăn prăk knŭk kna amâo dah Keh Hră ênua klei truh hlăm bruă knuă, klei ruă djŏ tuôm hŏng hnơ̆ng tla mơ̆ng êpul mnuih mă bruă amâo mâo hră kuôl kă mă bruă hlăm gŏ êsei ƀun, giăm ƀun amâo dah hdĭp ti krĭng mnuih djuê ƀiă, đru hdră êlan mâo klei tŭ dưn êjai pŏk ngă.

Mbĭt anăn, phung bi ala akâo ksiêm dlăng tĭng mkă hnơ̆ng tla, hnơ̆ng dưi dưn hdră êlan hră ênua klei truh êka hlăm bruă knuă, klei ruă djŏ tuôm hŏng bruă knuă hŏng mnuih mă bruă ti dŭm alŭ wăl hlăm krĭng II, III, IV, hlăm anăn mâo Dak Lak. Bruă mkŏ mjing hnơ̆ng ênoh ênil amâodah hnơ̆ng đru ƀiă hĭn čiăng dưi ksiêm dlăng kñăm rơ̆ng klei tŭ dưn kơ mnuih mă bruă mâo klei hmăi amâo jăk kyua klei truh êka amâodah klei ruă djŏ tuôm hŏng bruă knuă. Nguyễn Phú Lập, K'iăng khua Êpul hgŭm mnuih mă bruă čar Dak Lak, lač klei:

"Tơdah drei bi mklă leh mơ̆ng hnơ̆ng prăk mlan tal êlâo truh kơ hnơ̆ng prăk mlan ƀiă hĭn hlăm krĭng snăn drei srăng tĭng hnơ̆ng ƀiă hĭn dŭm êtuh êbâo prăk ti dlông hnơ̆ng đru anăn. Čiăng kơ tơdah mâo klei truh tui hluê si hnơ̆ng toh hroh klei dưi mă bruă snăn drei srăng mâo hnơ̆ng msĕ snăn. Snăn klă klơ̆ng tơdah hluê ngă hlăm hdră bhiăn snăn hră ênua yang ƀuôn srăng tĭng tla ênưih hĭn, čiăng ñĕ kơ dŭm boh klei tơdah prăk snăn amâo mâo lu ôh ƀiădah nao ngă hră mơar jing dleh dlan êdi tơdah mâo klei truh hlăm bruă knuă amâo dah klei ruă hlăk êjai mă bruă".