Êpul gơ̆ng bruă ƀuôn sang čar Dak Lak ba mdah leh Hdră mtrŭn mrô 19 kčah mtrŭn hdră đru thiăm mbŏ hŏng phung hđeh hriăm hră leh anăn sang hră knŭk kna rông ba ti dŭm să knông lăn leh anăn bi knông hŏng ala čar. Hluê si Hdră mtrŭn, hđeh hriăm hră sang hră knŭk kna rông ba dưi đru 110.000 prăk hlăm grăp čô/hruê kăm, hđeh hriăm hră sang hră knŭk kna čiêm rông dưi đru 300.000 prăk hlăm grăp čô/hruê kăm.

Phung hđeh nao sang hră kbưi hŏng sang lŏ mâo klei đru prăk êrô êbat. Hŏng phung hđeh sang hră gưl sa, ênoh đru jing 120.000 prăk hlăm grăp mlan tơdah boh kbưi mơ̆ng sang truh kơ sang hră mơ̆ng 4 km truh ti gŭ 15 km, ênoh đru jing 240.000 prăk tơdah mơ̆ng 15 km kơ dlông. Phung hđeh sang hră gưl dua dưi ba yua ênoh msĕ snăn hŏng boh kbưi mơ̆ng 7 km truh ti gŭ 15 km leh anăn mơ̆ng 15 km kơ dlông. Wưng đru amâo êgao 9 mlan hlăm thŭn hriăm.

Thŭn hriăm anei, phung hđeh, sinh viên ti alŭ wăl čar Dak Lak mâo ngăn prăk knŭk kna đru 55% ênoh tla hră ênua mdrao mgŭn, bi knar 751.410 prăk hlăm grăp čô/thŭn. Dak Lak ăt mĭn tĭng mkăp brei hlăm brô 41 êklai prăk blei hdruôm hră hriăm čiăng kơ dŭm sang hră mkŏ mjing kơ phung hđeh čŏng nao mă.

Mbĭt hŏng đru klă anăp, Dak Lak mđing duh bi liê kơ anôk bruă nah gŭ, boh nik ti dŭm alŭ wăl adôk dleh dlan. Thŭn hriăm 2026-2027, Dak Lak lŏ mâo thiăm 3 sang hră knŭk kna čiêm rông hđeh ti dŭm să knông lăn leh anăn 1 sang hră knŭk kna čiêm rông hđeh ti să knông lăn Êa Rốk dưi ba yua. Dŭm hdră bruă dưi duh bi liê mđrăm mbĭt, kñăm mjing wăl anôk hriăm hră, dôk dơ̆ng ƀơ̆ng huă găl ênưih hĭn kơ hlăm brô 3.100 čô hđeh krĭng knông lăn leh anăn bi knông hŏng ala čar.

Lê Thị Thanh Xuân, Khua knơ̆ng bruă sang hră mtô bi hriăm Dak Lak, brei thâo, knơ̆ng bruă lŏ dơ̆ng mđing iêu mtrŭt djăp ai dưi, klei mâo mơ̆ng phŭn mkăp prăk gưl dlông leh anăn prăk mơ̆ng dŭm Hdră kñăm ala čar kơ bruă sang hră mtô bi hriăm čiăng duh bi liê, bi leh anôk bruă nah gŭ sang hră.

“Ti anăp mñă kơ dŭm alŭ wăl dăp djăp ênoh prăk bi liê kơ bruă sang hră mơar. hŏng dŭm ênoh prăk anei, dhar bruă ăt gĭt gai dŭm sang hră ba yua tŭ dưn čiăng duh bi liê, mkra mđĭ kdrăp mnơ̆ng yua. Hluê anăn, rơ̆ng klei găl mtô leh anăn hriăm kơ thŭn hriăm mrâo, ƀrư̆ ƀrư̆ mđĭ hnơ̆ng jăk leh anăn bi mâo djăp klei čuăn bruă kalm hlăm wưng ară anei.”