Hlăm mlan 8 leh êgao, grăp aguah ưm, dŭm adŭ hriăm mđĭ klei Yuăn kơ phung hđeh ti Sang hră gưl sa Nay Der, să Gào, čar Gia Lai mkŏ mjing hlăm ai êwa mơak mñai, jĕ giăm. Phung hđeh dưi mưng hŏng boh hră, hriăm blŭ, hriăm dlăng, hriăm čih leh anăn yuôm bhăn hĭn jing hriăm jhŏng blŭ hrăm hŏng nai mtô, ƀĭng găp. Adei Thin, ti alŭ Pley Nhao, să Gào, bi êdah khăp čiăng êdi hŏng dŭm mmông hriăm msĕ snăn.

“Kâo nao sang hră mơak snăk. Hriăm klei Yuăn mơak snăk.”

Thŭn hriăm mrâo anei, Sang hră gưl sa Nay Der, să Gào mâo 123 čô hđeh mŭt adŭ sa, lu jing hđeh mnuih Jarai. Kyua anăn bruă mtô leh anăn hriăm mđĭ klei Yuăn jing klei čiăng êdi. Mơ̆ng klei dôk bi kngăr, leh sa wưng bi mưng, dŭm klei wĭt lač mơ̆ng phung hđeh klă mngač hĭn. Dŭm ƀĕ kngan ăt jhŏng kčŭt tơdah nai êmuh. Hŏng nai mtô Lê Thị Thùy Khanh, anăn jing dŭm klei năng mơak êdi kơ phung hđeh leh anăn nai mtô.

“Adŭ hmei 100% phung hđeh jing mnuih djuê ƀiă, ti sang phung hđeh blŭ hŏng klei Jarai. Ƀiădah ară anei phung hđeh gĭr hriăm leh, đĭ hriê kơ prŏng grăp hruê. Ară anei phung hđeh ăt dưi hmư̆ klei nai mtô leh mơh.”

Msĕ snăn mơh, ti Sang hră gưl sa Lê Hồng Phong, ƀuôn hgŭm Hội Phú, dŭm adŭ mđĭ hĭn klei blŭ Yuăn ăt dưi mkŏ mjing hlăm wưng mdei prŏng. Phung hđeh nao sang hră bi mưng hŏng boh hră, hriăm čih grăp boh hră, hriăm dlăng grăp boh hră. Ti adŭ hriăm, nai Nguyễn Thị Hồng mtô boh hră, blŭ hrăm, êmuh čiăng kơ phung hđeh mưng hŏng klei blŭ Yuăn. Mâo mmông, ñu ăt hriăm thiăm dŭm klei Jarai mơ̆ng phung hđeh čiăng kơ klei mtô leh anăn hriăm jĕ giăm hĭn.

“Phung amĭ ama mđing leh kơ klei hriăm hră mơ̆ng anak aneh pô, mdiăng nao sang hră djŏ mmông leh anăn mprăp djăp ênŭm mnơ̆ng yua kơ phung hđeh tơdah truh ti adŭ hriăm. Đa đa phung hđeh dưi hriăm leh boh hră, hriăm čih lu boh hră leh anăn dlăng thâo klă boh hră hĭn. Nai mtô ăt ƀrư̆ ƀrư̆ hriăm klei blŭ amĭ kkiêng phung hđeh čiăng thâo săng phung hđeh hĭn.”

 Hluê si aduôn Trần Thị Kim Tuyến, Khua sang hră gưl sa Lê Hồng Phong, amâo djŏ knŏng ti ƀuôn hgŭm Hội Phú, lu sang hră hlăm alŭ wăl čar pŏk ngă leh dŭm adŭ hriăm mđĭ klei Yuăn kơ phung hđeh mnuih djuê ƀiă hlăm wưng mdei prŏng. Sang hră mprăp leh kdrăp mnơ̆ng, mbĭt anăn dăp phung nai mâo klei hriăm mjuăt kơ bruă mtô klei Yuăn kơ phung hđeh mnuih djuê ƀiă êlâo kơ mŭt adŭ sa hŏng 120 mmông hriăm hlăm wưng mdei prŏng, đru kơ phung hđeh hơĭt ai tiê mŭt hlăm thŭn hriăm mrâo. Aduôn Trần Thị Kim Tuyến brei thâo:

“Klă klơ̆ng hlăm wưng mđĭ klei blŭ Yuăn êlâo kơ mŭt adŭ sa, phung hđeh jhŏng blŭ hrăm hĭn. Mŭt hlăm thŭn hriăm mrâo, phung hđeh srăng hrăm mbĭt hŏng phung hđeh hriăm hră leh anăn ngă djŏ klei čiăng hriăm hră mơar.”

Leh bi mŭt mbĭt, čar Gia Lai mâo ênoh mnuih djuê ƀiă truh 23%. Bruă mđĭ klei blŭ Việt kơ phung hđeh êlâo kơ mŭt adŭ sa đru kơ phung hđeh jhŏng blŭ hrăm, jhŏng hĭn tơdah mŭt hlăm thŭn hriăm mrâo. Anei ăt jing hdră čar Gia Lai mjing thiăm tur knơ̆ng čiăng kơ phung hđeh krĭng dleh dlan hriăm hră jăk hĭn./.