Leh bi mŭt mbĭt, čar Dak Lak mâo ênhă êbeh 18.096 km², ênoh mnuih êbeh 3.3 êklăk čô, 102 anôk bruă knŭk kna gưl să; mâo knông lăn hŏng Campuchia leh anăn wăl êa ksĭ. Hlăm wăl đĭ kyar mrâo hŏng krĭng lăn dap kngư, êa ksĭ leh anăn knông lăn, čar mâo thiăm lu klei găl kơ bruă lŏ hma, bruă tuh tia mkra mjing, logistics, bruă duh mkra êa ksĭ leh anăn bruă duh mkra ƀăng jang knông lăn. Ƀiădah, anei ăt jing alŭ wăl ba mdah klei čiăng kơ bruă răng mgang klei êđăp ênang.

Ti anôk mă bruă, phung bi ala mđing bi trông kơ hdră ba yua tŭ dưn klei găl mrâo mơ̆ng čar ƀiădah brei mguôp kjăp hŏng klei čiăng rơ̆ng kơ bruă lĭng kahan - răng mgang klei êđăp ênang, boh nik ti dŭm alŭ wăl phŭn, krĭng knông lăn leh anăn dŭm hdră bruă, êlan klông mâo boh tŭ yuôm bhăn. Thượng tướng Trần Việt Khoa, Khua hlăm bruă Đảng gưl dlông, Khua sang hră ksiêm hriăm kơ bruă lĭng kahan ala čar, mñă kơ Dak Lak brei mđĭ lar klei găl kơ bruă lŏ hma leh anăn êa ksĭ čiăng mđĭ hnơ̆ng đĭ kyar, hlăm anăn mđing mkra mjing êlam leh anăn mnuih mă bruă:

“Dak Lak ară anei mâo êa ksĭ êlam ƀiădah amâo mâo kdrŭn ksĭ prŏng snăn klă sĭt jing dleh dlan êdi hlăm bruă hluê ngă kdrŭn ksĭ leh anăn logictic; tal dua jing krĭng lăn bazan mâo lu klei găl êdi dlông rŏng lăn, lu mta boh mnga yuôm mơ̆ng bruă lŏ hma ƀiădah amâo mâo mkra mjing êlam ôh. Mơ̆ng anăn drei ƀuh dŭm mta klei, ară anei si ngă Dak Lak dưi mđĭ kyar bruă lŏ hma, brei mđĭ kyar bruă mkra mjing êlam kơh dưi mghaih msir bruă mđĭ kyar bruă duh mkra kơ bruă lŏ hma.”

Sa mta phŭn dưi mñă hlăm mmông mă bruă jing mđĭ kyar bruă duh mkra brei nao mbĭt hŏng bruă mkŏ mkra krĭng wăl răng mgang leh anăn bi kjăp "wăl mnuih ƀuôn sang". Hluê anăn, mđĭ hnơ̆ng klei hdĭp, bi hrŏ ƀun, rơ̆ng klei êđăp ênang, mjing hdră duh ƀơ̆ng hơĭt kjăp kơ mnuih ƀuôn sang, boh nik ti krĭng knông lăn leh anăn krĭng mnuih djuê ƀiă, amâo djŏ knŏng jing bruă klam mđĭ kyar ƀiădah lŏ đru rơ̆ng klei hơĭt kjăp mơ̆ng nah gŭ. Hŏng dŭm alŭ wăl hdră êlan, bruă duh bi liê êlan klông, logistics, mđĭ kyar bruă duh mkra ƀăng jang knông lăn, mkŏ hŏng Campuchia leh anăn wăl anôk mđing kơ êa ksĭ ăt dưi mdưm hlăm klei čiăng rơ̆ng klei êđăp ênang - răng mgang klei êđăp ênang.

Mbĭt hŏng anăn jing mđĭ hĭn klei dưi thâo ƀuh, răng mgang yang ƀuôn, mdrơ̆ng hŏng klei yan adiê ngă, klei truh jŭ jhat leh anăn klei amâo mâo jăk hlăm klei êđăp ênang. Lương Nguyễn Minh Triết, Khua hlăm bruă Đảng gưl dlông, Khua bruă Đảng čar Dak Lak bi mklă:

“Hmei bi mklă klei čuăl mkă bruă duh mkra ala ƀuôn hŏng klei čuăl mkă bruă răng mgang klei êđăp ênang mơ̆ng akŏ mtam boh nik hŏng dŭm hdră bruă prŏng, dŭm ktuê êlan phŭn, dŭm alŭ wăl yuôm bhăn leh anăn mđing nanao kơ klei mđĭ kyar čiăng hơĭt kjăp leh anăn hơĭt kjăp čiăng mđĭ kyar. Tal dua jing hmei mđing lŏ dơ̆ng mkŏ mjing bruă răng mgang klei êđăp ênang yang ƀuôn mguôp hŏng bruă răng mgang klei êđăp ênang yang ƀuôn leh anăn bruă răng mgang ai tiê mnuih ƀuôn sang, boh nik mđing kơ krĭng knông lăn, krĭng mnuih djuê ƀiă leh anăn dŭm alŭ wăl mâo anôk yuôm bhăn.”

Mơ̆ng krĭng čư̆ čhiăng truh kơ krĭng êa ksĭ, mơ̆ng dŭm boh ƀuôn krĭng taih kbưi truh kơ krĭng knông lăn, Dak Lak mâo nanao mta kñăm mđĭ kyar hơĭt kjăp mguôp hŏng sa Lăn Dap Kngư êđăp ênang.