Mbĭt hŏng bruă răng mgang klei êđăp ênang kơ klei bi lông, alŭ wăl mđing đru kơ phung hđeh krĭng taih kbưi, krĭng mnuih djuê ƀiă, lehanăn phung hđeh dôk hlăm klei dleh dlan, čiăng kơ jih jang phung hđeh dưi nao bi lông jăk amâo mâo dleh kpăk ôh hlăm klei bi lông. Klei bi lông thŭn anei, Daklak mkŏ mjing leh truh 64 anôk bi lông klă klơ̆ng, 55 anôk bi lông mkăp hŏng 1.500 boh adŭ bi lông.

Êbeh 5.000 knuă druh, nai mtô, mnuih mă bruă mâo tiŏ nao đru kiă kriê klei bi lông. Čar jao bruă čuăn kơ dŭm knơ̆ng dhar bruă, alŭ wăl, mjing djăp klei găl kơ anôk, kơ mnuih lehanăn hdră mghaih msir dŭm klei dleh kpăk. Hŏng dŭm krĭng taih kbưi čar mâo leh klei bi mguôp hŏgn dŭm alŭ wăl ksiêm dlăng, lehanăn mâo hdră êlan đru kơ hđeh hriăm hră nao bi lông. Hdră “Đru hđeh kơ klei bi lông” mâo ngă hlăm djăp anôk, mâo lu phung êdam êra nao bi mguôp, đru kơ hđeh bi lông anôk dôk, êdeh êdâo nao bi lông lehanăn djăp mta klei hlăm dŭm hrue bi lông. Mbĭt hŏng anăn, dŭm anôk bruă djŏ tuôm đru răng mgang klei êđăp ênang êlan klông, mkăp pui kmlă, klei hâo hưn lehanăn dŭm bruă đru kơ klei bi lông./.