Luč amĭ ama amâo djŏ knŏng jing klei ênguôt hnĭng mơ̆ng phung hđeh ƀiădah lŏ jing klei luč liê kơ gŏ sang, găp djuê. Adei Võ Thị Ngọc Ngân, hđeh sang hră gưl tlâo Bà Điển, ƀuôn prŏng Hồ Chí Minh, lač:

 "Mơ̆ng hruê ama djiê, klei hdĭp gŏ sang tuôm hŏng lu klei lông dlăng hĭn êjai jih jang klei dleh dlan bruă duh ƀơ̆ng knang knŏng kơ amĭ. Wăt tơdah bruă knuă jing suăi êmăn leh anăn hnư hrui wĭt amâo mâo hơĭt, amĭ ăt gĭr jih ai tiê čiăng kơ amai adei kâo dưi lŏ nao sang hră msĕ hŏng phung ƀĭng găp mkăn".

Kluôm ala ară anei mâo hlăm brô 1.5 êklăk čô hđeh mâo klei hdĭp dleh dlan, hlăm anăn mâo hlăm brô 176 êbâo čô hđeh êrĭt amĭ ama, hđeh arăng lui. Lu hdră êlan, hdră bruă, dưi pŏk ngă čiăng rơ̆ng kơ hđeh êrĭt amĭ ama, hđeh arăng lui đĭ kyar leh anăn bi mguôp jăk hĭn msĕ si: Klei kuôl kă lu ala čar kơ hđeh êlăk, Hdră bhiăn kơ hđeh êlăk, Hdră ngă bruă ala čar kyua hđeh êlăk wưng thŭn 2021-2030; Hdră êlan hdră bhiăn kơ hđeh mâo klei hdĭp dleh dlan…

Ară anei kluôm ala dôk hluê ngă hdră đru kơ yang ƀuôn grăp mlan kơ 21.000 čô hđeh êrĭt amĭ ama. Mbĭt anăn, Đảng leh anăn Knŭk kna ba mdah leh hdră mtrŭn mđing dlăng, mtrŭt mjhar dŭm êpul êya, mnuih, anôk bruă duh mkra hlăm leh anăn êngao ala čar hrăm mbĭt, đru mguôp kriê dlăng kơ phung hđeh êrĭt amĭ ama, phung hđeh mâo klei hdĭp dleh dlan.

Mơ̆ng anăn mâo duh mĭn leh kơ klei hdĭp phung hđeh êrĭt êrin, phung hđeh arăng lui, mjing klei găl mtăp mđơr, mkăp djŏ hĭn kơ klei dưi djŏ klă, djŏ hdră bhiăn, mđĭ ai phung hđeh čŏng mđĭ lar klei thâo, kpưn đĭ bi mguôp hŏng yang ƀuôn. Nguyễn Văn Lực, Khua êpul hgŭm răng mgang mnuih amâo mâo jăk asei mlei čar Lâm Đồng brei thâo:

“Ti Lâm Đồng mâo êbeh 4.000 čô hđeh êrĭt amĭ ama čiăng mâo klei kriê dlăng. Grăp mlan hmei đru kơ 400 čô, grăp čô 1 êklăk prăk, sa thŭn msĕ snăn jing 4 êklai 800 êklăk prăk. Leh anăn grăp akŏ grăp thŭn hriăm anăn, hmei mkŏ mjing klei iêo mthưr ayŏng adei ƀĭng hgŭm đru mguôp, amâo mâo akâo klei đru ôh, čiăng rơ̆ng kơ 20 čô hđeh êrĭt amĭ ama mŭt hlăm sang hră gưl prŏng leh anăn grăp čô dưi đru 200 êklăk prăk čiăng rơ̆ng kơ 4 thŭn hriăm. Leh anăn si srăng ngă čiăng kơ phung hđeh hơĭt ai tiê mŭt hlăm klei hdĭp, kpưn đĭ, amâo mâo djŏ knŏng bi mguôp hŏng yang ƀuôn ôh ƀiădah mgi dih lŏ đru mguôp kơ yang ƀuôn.

Ngô Sách Thực, Khua Êpul hgŭm đru kơ phung amâo jăk asei mlei Việt Nam brei thâo: hŏng klei hgŭm kngan mơ̆ng dŭm êpul bruă, anôk bruă duh mkra, phung mâo ai tiê kmah leh anăn êpul êya yang ƀuôn, hlăm 5 thŭn êgao, dŭm gưl êpul hgŭm dưi iêo mkrum leh êbeh 637 êklai prăk čiăng mđup brei prăk đru hriăm hră, êdeh wai jơ̆ng, mnơ̆ng yua hriăm hră… kriê dlăng kơ phung hđeh mâo klei hdĭp dleh dlan:

"Êpul hgŭm đru kơ phung amâo jăk asei mlei Việt Nam mâo nanao klei mĭn si srăng ngă čiăng kơ bruă kriê dlăng phung hđeh êrĭt amĭ ama amâo djŏ knŏng mđing dlăng kơ mnơ̆ng dhơ̆ng ƀiădah lŏ mjing boh kdrŭt čiăng kơ phung hđeh lŏ dơ̆ng hriăm hră, mjuăt ktang asei mlei kpưn đĭ hlăm klei hdĭp, amâo lui hlei pô ti tluôn".

Đảng, Knŭk kna drei mâo nanao klei mĭn mđĭ kyar hŏng anak mnuih jing phŭn, jing pô phŭn, jing mta kñăm leh anăn boh kdrŭt mơ̆ng klei đĭ kyar. Kyua anăn, kriê dlăng kơ phung hđeh êrĭt êrin, hđeh luič amĭ ama leh anăn phung mâo klei hdĭp dleh dlan jing bruă klam mơ̆ng Knŭk kna, jing bruă klam mơ̆ng jih yang ƀuôn. Anei ăt jing knhuah gru jăk siam mơ̆ng djuê ana, kriê dlăng, răng mgang leh anăn mjing klei găl čiăng kơ phung hđeh êrĭt êrin dưi hriăm hră, đĭ kyar kluôm dhuôm, kjăp knhuang jing mnuih ƀuôn sang tŭ dưn kơ yang ƀuôn./.