Dŭm hruê krah mlan 9, ti Wăl anôk dôk mrâo krĭng yan adiê ngă să Cát Tiến, čar Gia Lai, êbeh 40 gŏ sang dôk mjêč rŭ mdơ̆ng sang mrâo. Wăl anôk dôk mrâo dôk kbưi hŏng anôk dôk hđăp dŭm êtuh met, mâo anôk ala jăk găl, bruă mkŏ mkra pui kmlă, êa leh anăn êlan klông dưi duh bi liê mđrăm mbĭt. Jing sa hlăm dŭm gŏ sang hnưm ngă leh sang, Bùi Thanh Vương bi mlih leh anôk dôk mrâo mâo sa mlan.

"Knŭk kna mđing dlăng čiăng kơ mnuih ƀuôn sang nao ti anôk dôk mrâo snăn hơ̆k mơak êdi. Yan hjan truh leh anăn mnuih ƀuôn sang hơ̆k kdơ̆k čiăng kơ phung mă bruă ngă pral bi leh sang čiăng ñĕ kơ klei klưh hroh čư̆, ti anei hjan trŭn huĭ snăk. Ară anei ti anei phung mă bruă pui kmlă, phung mă bruă êa wĭt lu ti anei hơ̆k mơak mă bruă. Bi kơ kdrêč kâo mâo 2 hră lăn, tŭ mă 2 kdrêč lăn mrâo"

Mbĭt hŏng gŏ sang Vương, lu gŏ sang mkăn ti alŭ Trung Lương, să Cát Tiến ăt čŏng rŭ mdơ̆ng sang êjai mâo jao lăn, hŏng klei čang hmăng hnưm đuĕ mơ̆ng krĭng huĭ hyưt. Mai Trần Hải, mnuih ƀuôn sang alŭ Trung Lương, brei thâo êlâo dih grăp blư̆ adiê hjan angĭn êbŭ, gŏ sang ñu bi mlih nao ti anôk êđăp ênang. Ară anei mâo lăn lŏ mkŏ anôk dôk mrâo leh anăn prăk đru, gŏ sang mưn mnuih rŭ mdơ̆ng sang mrâo.

“Boh tâo prŏng klưh jih sang mnuih ƀuôn sang, wăl anôk anăn jing mbĕ mnuih ƀuôn sang đuĕ jih, amâo lŏ brei hlei pô dôk tinăn ôh”.

Klei rŭng răng anăn kbiă hriê mơ̆ng klei klưh hroh kjham ti čŏng čư̆ Cấm hlăk mlan 11/2021, dơr hĕ êbeh 40 boh sang ti alŭ Trung Lương. Čar Bình Định hđăp hlăk anăn hưn mdah leh klei mjêč kơ klei truh yan adiê klưh hroh ti krĭng anei. Alŭ wăl mkŏ mjing hdră mkŏ anôk dôk mrâo kơ 64 gŏ sang hlăm krĭng huĭ hyưt. Lại Minh Đức, Khua alŭ Trung Lương, brei thâo, truh kơ ară anei, 44 gŏ sang ngă leh leh anăn dôk rŭ mdơ̆ng sang dôk mrâo.

“Wăl anôk dôk mrâo ară anei mnuih ƀuôn sang truh leh anăn dôk mâo hlăm brô 80% tŭ mă prăk truh kơ anôk dôk mrâo čiăng mdơ̆ng leh anăn rŭ mdơ̆ng sang. Bi 20 gŏ sang ăt dôk mtrŭt mjhar čiăng truh kơ anôk dôk mrâo".

Nguyễn Ngọc Thạch, K'iăng khua adŭ bruă duh mkra să Cát Tiến, brei thâo alŭ wăl lŏ dơ̆ng mtrŭt mđĭ pral bruă čiu hnô, mbĕ đuĕ mnuih ƀuôn sang; mbĭt anăn mkŏ mjing hdră rơ̆ng klei êđăp ênang kơ dŭm gŏ êsei ka dưi nao dôk ti anôk mrâo.

"Hlăm wưng kơ anăp gĭr bi pral hdră mbĕ đuê̆ čiăng kơ mnuih ƀuôn sang hơĭt klei hdĭp hlăm wưng kơ anăp, bruă sang čư̆ êa să ăt mkŏ mjing leh hdră mbĕ đuê̆ mnuih ƀuôn sang, mbĭt anăn mkŏ mjing leh hdră êlan gang mkhư̆ klei truh yan adiê thŭn 2026. Amâo djŏ knŏng čư̆ Cấm, ƀiădah să mkŏ mjing leh hdră êlan klă klơ̆ng tơdah mâo klei truh yan adiê alŭ wăl srăng gĭr mbĕ mnuih ƀuôn sang truh kơ dŭm anôk êđăp ênang msĕ si dŭm anôk sang hră, anôk dlông đru kơ mnuih ƀuôn sang".

Mơ̆ng krĭng lăn kreh tuôm nanao hŏng klei klưh hroh, mnuih ƀuôn sang ti gŭ jơ̆ng čư̆ Cấm hlăk ƀrư̆ ƀrư̆ bi mlih truh kơ anôk dôk êđăp ênang hĭn. Dŭm boh sang mrâo amâo djŏ knŏng đru kơ mnuih ƀuôn sang bi hơĭt klei hdĭp, ƀiădah lŏ jing boh tŭ dưn mơ̆ng hdră čŏng pô mbĕ đuê̆ mnuih ƀuôn sang mơ̆ng krĭng huĭ hyưt kyua klei truh yan adiê ngă. Khădah snăn, tơdah wưng krah yan hjan hlĭm truh giăm, bruă bi leh hdră mbĕ đuê̆ dŭm gŏ sang adôk jing bruă mjêč, kñăm bi hrŏ klei hmăi kyua klei klưh hroh, rơ̆ng klei êđăp ênang kơ klei hdĭp leh anăn ngăn drăp mnuih ƀuôn sang./.