Ti kdrăn lŏ Soi, alŭ Nam Phước, să Nghĩa Giang, čar Quảng Ngãi dŭm kdrăn lŏ hlăk mŭt hlăm yan hrui êmiêt êngăp hlăm êa. Mâo anôk, knŏng mmung mdiê điêt êdah ti dlông êlah êa; mâo anôk, jih kdrăn lŏ êbuh. Mnuih ƀuôn sang tram hlăm êa lŏ wiă grăp ana mdiê, dưm hlăm dlông ana mtei čăp ba ti hang. Gŏ sang Lê Thị Kiều, ti alŭ Mỹ Tịnh, să Nghĩa Giang mâo 4 sao lŏ, 1 sao êngăp êa êlam lu hruê. Amai Kiều čiăng kơ êpul lĭng kahan să đru wiă mdiê:

"Êa đoh hŏng rơ̆k êngăp jih kdrăn mdiê, gŏ sang kâo nao pŭ jih rơ̆k êngăp ti dlông kdrăn lŏ. Hruê anei êa hrŏ leh anăn mâo să đru snăn kơh wiă jih. Msĕ si aguah ưm să đru mâo năm čô nao wiă mdiê. Hŏng dŭm čô êkei nao wiă mdiê. Tơdah amâo mâo đru ôh snăn ăt kăn dưi lui rei, kăn dưi wiă rei".

Lu krĭng lŏ êngăp êlam, mdiê êngăp lu hruê dơ̆ng c̆uh blang mnga leh. Mnuih ƀuôn sang mprăp grăp mnĭt mmông êa hrŏ c̆iăng wiă mdiê. Ti kdrăn lŏ, ênai mnuih iêô đĭng blŭ, ênai mniă wiă mdiê hlai mbĭt hŏng ênai êdeh wiă mdiê, mjing wăl anôk mtluk mtlak. Dŭm hruê êgao, amai Nguyễn Thị Thu Hiền, Khua anôk bruă Mặt trận alŭ An Hội Bắc 2, să Nghĩa Giang, mbĭt hŏng êpul hlăm alŭ đru mnuih ƀuôn sang alŭ Nam Phước hrui êmiêt mdiê:

“Dŭm amai adei mniê găn êa nao wiă, leh anăn kahan ƀuôn srăng dŭ ba mdiê kơ hang. Hruê mbruê, kdrêč nah dih êngăp kjham hĭn, mdiê čăt leh mnga jih leh. Bi kdrêč aguah anei dôk wiă snăn ăt êngăp mơh. Tlam hruê mbruê kdrêč anei êngăp êlam, amâo dưi trŭn ôh. Myun jing amâo lŏ hjan ôh snăn aguah anei êa hrŏ. Gŏ sang bi mklă ăt khăt, dưi mă dŭm anăn snăn mă yơh”.

Ti să Nghĩa Giang mâo 19 ha mdiê êa lip. Knơ̆ng bruă sang čư̆ êa ƀuôn hgŭm iêô mthưr êpul kahan ƀuôn, dŭm êpul bruă phung mniê leh anăn êpul ti dŭm alŭ nao đru kơ mnuih ƀuôn sang. Cao Thanh Tuyên, K’iăng khua knơ̆ng bruă  sang čư̆ êa să Nghĩa Giang, čar Quảng Ngãi brei thâo:

“Êlâo hĭn, să iêo mkrum dŭm ai dưi hrui pĕ, rơ̆ng djŏ guôp hŏng yan adiê. Tal dua lĕ jing să bi hgŭm hŏng dŭm anôk bruă djŏ tuôm, mĭn tĭng srăng mkra mlih wưng dŭm yan čiăng ñĕ kơ wưng mâo adiê hjan hnưm msĕ si ară anei. Sitôhmô, thŭn êdei drei dưi mkra mlih wưng rah pla, mkra mlih hdră mkăp êa kơ mnuih ƀuôn sang hnưm hĭn wưng anei hlăm brô 10 hruê. Tơdah wưng rah pla dưi mđĭ êlâo hlăm brô sa hruê kăm snăn truh kơ ară anei hrui pĕ jih leh”.

Dŭm hruê êgao, lu alŭ wăl ti alŭ wăl čar Quảng Ngãi mâo hjan prŏng snăk, ngă êbeh 63 héc ta mdiê leh anăn djam mtam hmăi djŏ. Hlăm anăn, êbeh 48 héc ta mdiê ti dŭm să An Phú, Nghĩa Giang leh anăn Đình Cương êngăp êa. Êngao anăn, hlăm brô 15 héc ta djam mtam ti să An Phú jhat rai kyua hjan prŏng. Knŭk kna leh anăn dŭm êpul êya alŭ wăl dôk đru kơ mnuih ƀuôn sang hrui pĕ čiăng bi hrŏ klei luč liê/.