Leh thâo klei hâo hưn kơ hdruôm hră mnơ̆ng bi hdơr mơ̆ng ung mô̆ aê mdrao Đào Ngọc Thạnh leh anăn aê mdrao Mai Thị Kim Ngân ti ƀuôn hgŭm Cẩm Thành, čar Quảng Ngãi, gŏ sang amai Trần Thị Sô ti să Tịnh Khê, čar Quảng Ngãi gĭr hiu duah truh ti anôk čiăng bi klă. Ti mrô tal 46 hlăm hdruôm hră mnơ̆ng bi hdơr, anăn "Trần Thị Lê" ƀuh, klă sĭt bi knar hŏng hră hưn djiê mơ̆ng gŏ sang amai Sô dôk djă pioh. Klei bi knăl mơ̆ng dŭm pŏk hră ƀrư̆ hruê ƀrư̆ sô lŏ pŏk mblang klei čang hmăng prŏng leh lu thŭn ênguôt hnĭng duah ƀuh găp djuê. Amai Trần Thị Sô, adei mniê djiê êngiă Trần Thị Lê mgei ai tiê yăl dliê:

“Kâo hơ̆k mơak êdi hmư̆ klei hâo hưn ayŏng ba hlăm hla pŏk yang ƀuôn. Tui duah klă anăn Trần Thị Lê snăn klei mgei ai tiê êdi. Kâo čang hmăng kyua ayŏng adei dôk pŏk hdră, dưi ƀuh klang kleh amai wĭt čiăng dơr ti msat phung êngiă asei mơ̆ng să.”

Thŭn anei 96 thŭn leh, ƀiădah aê mdrao Đào Ngọc Thạnh ăt mngač tač, hdơr klă anôk sang êa drao B23 leh anăn anôk dơr lu ƀĭng kahan thŭn êlâo. Ñu brei thâo, hdruôm hră čih pioh djăp ênŭm anăn ƀuôn sang, anôk bruă, hruê djiê leh anăn mrô čih pioh klei mdrao mgŭn mơ̆ng 181 čô kahan djiê êngiă. Hruê djiê čih hlăm hdruôm hră jing mmông djŏ hĭn phung lĭng kahan tuč ai  ti sang êa drao, kyua anăn năng ai mdê hŏng hră hưn djiê mơ̆ng anôk bruă. Lŏ bi hdơr klei djiê mơ̆ng kahan djiê êngiă Trần Thị Lê, Đào Ngọc Thạnh hdơr msĕ si hră:

“Trần Thị Lê, tơdah amâo mâo ôh klei bi mlih mơ̆ng kdriêk kahan Trà Bồng snăn dôk ti Cà Đam. Anei jing klă sĭt, kâo ngă mtam, hưn hŏng gŏ sang snăn.

Dŭm klei čih mbĭt hŏng klei bi hdơr mơ̆ng awa Thạnh hlăk jing leh mnơ̆ng yuôm bhăn êdi, pioh kơ bruă hlăm klei bi blah 500 hruê mlam mơ̆ng čar Quảng Ngãi. Nao čuă gŏ sang leh anăn nao dlăng hră čih, Đại tá Trịnh Công Sơn, kiăng khua bruă kđi čar hlăm knơ̆ng gĭt gai lĭng kahan čar Quảng Ngãi mgei ai tiê êjai ƀuh grăp pŏk hră čih ăt dôk msĕ hđăp:

“Mơ̆ng dŭm klei hâo hưn anei, Êpul gĭt gai mơ̆ng čar Quảng Ngãi srăng lŏ dơ̆ng ksiêm dlăng, bi mklă hŏng dŭm klei hâo hưn mâo leh leh anăn bi mklă hlăm hla pŏk web ala ƀuôn. Boh nik tui si klei bi klă alŭ wăl leh anăn hƀuê ênuk mơ̆ng čar Quảng Ngãi hlăm klei bi blah čiăng hrŏng ruah, lŏ dơ̆ng ksiêm dlăng hlăm alŭ wăl."

Hdruôm hră mơar mơ̆ng nai êa drao Sang êa drao B23 thŭn êlâo amâo djŏ knŏng jing mnơ̆ng bi hdơr kơ klei bi blah ôh, ƀiădah hlăk lŏ jing "pui mtrang mngač" atăt êlan tui duah ƀĭng kahan. Dŭm klei hâo hưn yuôm bhăn anăn srăng lŏ dơ̆ng mâo dŭm êpul bruă djŏ tuôm ksiêm dlăng, bi mklă; đru bi mngač dŭm klei bi knăl, čiăng hnưm ba wĭt phung jhŏng ktang êngiă asei hlăm kngan gŏ sang leh anăn ƀuôn sang./.