Giăm 60 thŭn leh hruê djiê êngiă, lĭng kahan êngiă asei Ka Tơ Tiên, kkiêng thŭn 1949, khua kiă kriê êpul lĭng kahan kdriêk Anh Dũng êlâo dih, ăt dôk ti krah čư̆ dliê, ară anei hlăm să Anh Dũng, čar Khánh Hòa. Hruê mlan bi luč leh dŭm gru grua thŭn êlâo, phung thâo kơ anôk dơr tal êlâo ăt ƀrư̆ hruê ƀrư̆ ƀiă. Ƀiădah hŏng êpul tui duah, grăp klei bi knăl, khădah điêt, ăt mâo klei mpŭ, bi mklă, kyuadah ti tluôn anăn jing sa čô lĭng kahan dôk guôn hruê wĭt.

Mơ̆ng hră mơar, klei yăl dliê mơ̆ng pô hưn truh kơ klei hdơr mơ̆ng găp djuê, dŭm êpul êya djŏ tuôm gĭr mkŏ, bi mklă, ksiêm dlăng grăp krĭng. Ka Tơ Toàn, adei mniê kahan djiê êngiă, klam bruă atăt êlan, đru bi mklă anôk dơr. Leh lu hruê ksiêm dlăng, bi rai boh ƀom min, hruê 5/8 mrâo êgao, klang kleh kahan djiê êngiă Ka Tơ Tiên dưi ƀuh. Giăm 6 pluh thŭn dôk guôn, lĭng kahan ênuk đưm dưi wĭt hŏng ƀĭng kahan, gŏ sang leh anăn ƀuôn sang. Ka Tơ Toàn, mgei ai tiê:

"Ba ñu wĭt ti msat lĭng kahan djiê êngiă jing jăk êdi leh lui ti êngao dliê, êngao čư̆ ênguôt snăk. Êlâo dih, amâo mâo pô čuh brui mngưi kơ ñu ôh. Knŏng čuh brui mngưi mâo sa blư̆, ti sang kăn thâo rei mơh"

Klei yăl dliê mơ̆ng lĭng kahan djiê êngiă Ka Tơ Tiên ăt brei ƀuh sa boh sĭt: ti dŭm boh ƀuôn krĭng čư̆ čhiăng Khánh Hòa, klei bi hdơr kơ phung djiê êngiă ăt dưi kriê pioh, ƀiădah hluê hruê mlan, phung thâo klei anei ƀrư̆ hruê ƀrư̆ ƀiă, hlăk êjai hră mơar amâo djŏ djăp ôh. Ti să Anh Dũng, alŭ wăl prŏng, mnuih ƀuôn sang ƀiă, lu alŭ wăl dôk ti krah čư̆ dliê. Hŏng mnuih ƀuôn sang Raglay, leh knăm lui msat, klei nao čuă dlăng, čuh brui mngưi amâo mâo mkŏ mjing nanao. Dŭm klei dưi dơr hlăm klei bi blah, tơdah klei hưn amâo mâo kriê pioh, ƀrư̆ hruê ƀrư̆ dleh dưi bi mklă.

Kyua anăn, hlăm hdră 500 hruê mlam, gưl bruă Đảng, bruă sang čư̆ êa alŭ wăl leh anăn êpul lĭng kahan truh kơ grăp alŭ, grăp gŏ sang; bi tuôm hŏng mnuih khua thŭn, mnuih mâo kơhưm leh anăn phung tuôm thâo kơ dŭm klei bi blah ênuk đưm. Pa Xây Mơ, Khua bruă Đảng alŭ Ú, să Anh Dũng, brei thâo, grăp klei hưn mâo čih pioh, bi mkă hŏng hră mơar leh anăn bi mklă hlăm boh sĭt.

“Klei bhiăn mnuih Raglay tinei, leh mâo mnuih djiê, 1 thŭn ngă Knăm lui msat jing leh. Amâo čuh brui mngưi grăp hruê amâo dah hruê Knăm, Têt. Hlăk pŏk ngă hdră bruă 500 hruê mlam, mnuih ƀuôn sang sa ai, đru mguôp kyua grăp thŭn, anak čô dưi nao čuă, čuh brui mngưi hdơr knga kơ klei săn asei mơ̆ng aê, awa leh djiê êngiă.”

Mơ̆ng hdră ksiêm dlăng, să Anh Dũng (čar Khánh Hoà) phŭn tal êlâo bi mklă 39 čô kahan djiê êngiă tuôm dưi dơr ti alŭ wăl. Hlăm anăn, 11 čô dưi bi kƀĭn. Mơ̆ng dŭm klei hâo hưn ti nah gŭ, êpul tui duah lŏ pŏk mlar truh kơ dŭm alŭ wăl tuôm jing anôk krŭ kdơ̆ng, anôk mâo klei bi blah.

Ti čŏng čư̆ Hòn Chảo, să Vạn Ninh, hdră tui duah dleh dlan hĭn êjai êpul êya nao truh kơ krĭng dlông êbeh 840 met mkă hŏng êa ksĭ. Êlan đĭ kơ dlông, lu boh tâo, êlan dleh dlan. Mnơ̆ng ƀơ̆ng huă, êa mnăm leh anăn kdrăp mnơ̆ng yua tui duah dưi dŭ mdiăng hŏng ai mnuih. Trung tá Nguyễn Hải Sơn, Êpul tui duah, hrui mƀĭn klang kleh lĭng kahan djiê êngiă čar Khánh Hòa, brei thâo, leh dŭm hruê dôk ti krah čư̆ dliê, êpul tui duah dưi hrui mƀĭn 4 klang kleh lĭng kahan djiê êngiă.

“Knuă druh, lĭng kahan gĭr êdi, gĭr đĭ čư̆, găn hnoh êa, găn dŭm kčŭn čư̆ dlông, găn dŭm kčŭn boh tâo huĭ hyưt. Khădah snăn dôk tuôm hŏng lu klei dleh dlan ƀiădah kyua klei mđĭ ai mơ̆ng khua gĭt gai, ƀĭng kahan, êpul nao trŭn hlăm čư̆ tŭ jing. Ba 4 klang phung êngiă asei djiê êngiă ti čư̆ Hòn Chảo, krĭng phŭn krŭ kdơ̆ng mơ̆ng čar Khánh Hòa wĭt rơ̆ng klei êđăp ênang.”

Ti čar Khánh Hòa, hnơ̆ng bruă hlăm klei pŏk ngă "Hdră bruă 500 hruê mlam" adôk prŏng êdi. Êbeh 400 krĭng leh anăn giăm 2.400 klei hưn djŏ tuôm kơ lĭng kahan djiê êngiă, msat lĭng kahan dôk lŏ dơ̆ng bi mklă. Boh phŭn jing dŭm alŭ wăl tuôm mâo klei bi blah, anôk krŭ kdơ̆ng, krĭng dliê kmrơ̆ng leh anăn anôk mâo klei hưn kơ msat lĭng kahan. Hŏng alŭ wăl čư̆ čhiăng, yan hjan dôk mjing klei kpĭ kơ hnơ̆ng ngă bruă. Êlan dơ̆ng dleh găn êrô, klei hŭi hyưt klưh hroh đĭ, klei êrô êbat leh anăn tui duah dleh dlan hĭn. Khánh Hòa dôk kƀĭn êpul êya, mă wưng čiăng msir mghaih dŭm alŭ wăl mâo leh klei hưn. Mbĭt hŏng klei tui duah, bruă bi mklă phung lĭng kahan djiê êngiă ka thâo klă klei hâo hưn ăt dưi mtrŭt pral. Đại tá Trương Thành Việt, Khua bruă kđi čar knơ̆ng gĭt gai lĭng kahan čar Khánh Hòa, brei thâo, čar bi leh bruă kuai mă, ksiêm dlăng leh anăn mă mta ti êbeh 2.100 msat ka thâo klă klei hâo hưn ti 7 msat, hnưm hĭn hdră kčah.

“Hluê ngă hdră bruă 500 hruê mlam, Knơ̆ng gĭt gai lĭng kahan čar ngă bruă hŏng klei đua klam prŏng, čiăng kơ lĭng kahan djăp ai dưi bi leh bruă klam êlâo kơ yan hjan. Hmei ngă bruă hŏng gưl bruă Đảng, bruă sang čư̆ êa alŭ wăl, iêu mthưr êpul kahan ƀuôn, phung êdam êra, phung mniê nao hgŭm đru, mkăp kơ êpul bi ktlah čiăng bi leh bruă klam hnưm hĭn.”

Giăm 60 thŭn leh êgao, dŭm kdrăn dliê anôk phung lĭng kahan tuôm bi blah leh anăn săn asei mâo leh lu blư̆ bi mlih. Ƀiădah klei bi hdơr mơ̆ng pô bi ala, hră mơar adôk leh anăn grăp gru grua hlăm anôk anăn ăt dôk dưi lŏ mkŏ. Hŏng grăp klang kleh lĭng kahan dưi ƀuh, sa čô lĭng kahan dưi wĭt, leh anăn sa gŏ sang mâo thiăm anôk bi hdơr kơ găp djuê leh dŭm thŭn dôk guôn.