Hnêč mmông mdei yang hruê, Trung tá Y Dhăm Byă, k’iăng khua kahan ksiêm să Quảng Phú, čar Dak Lak, mgăt êdeh nao ti ƀuôn Êmăp. Ñu nao ti sang mduôn ƀuôn Y-Lưng Êban, pô mâo kơhưm leh anăn ăt jing khua êpul răng mgang klei êđăp ênang mơ̆ng ƀuôn, čiăng bi trông kơ bruă knuă, thâo klă boh sĭt klei êđăp ênang êlâo kơ wưng mdêi hruê Mkŏ mjing lăn čar.

Êbeh sa thŭn êgao, dŭm klei bi tuôm sơnăn mâo nanao. Amâo guôn truh wưng kdlưn hĭn, Trung tá Y Dhăm Byă leh anăn mduôn ƀuô Y-Lưng rơ̆ng klei bi trông čiăng hmao thâo dŭm boh klei bluh mrâo hlăm ƀuôn. Mduôn Y-Lưng brei thâo:

“Ayŏng Y-Dhăm bi mguôp hŏng ƀuôn, boh nik mơ̆ng leh bi mŭt mbĭt leh anăn ngă bruă Knŭk kna alŭ wăl 2 gưl. Ñu jêñ jêñ hriê ti ƀuôn thâo klă boh sĭt, boh nik ti dŭm anôk bi kƀĭn phung đăo, mđing hmư̆ klei ngă bruă mơ̆ng anôk bi kƀĭn djŏ hdră bhiăn mơ̆. Êjai ñu nao sơnăn kâo ăt nao mbĭt, bi mguôp hlăk mblang leh anăn mtă mtăn kơ mnuih ƀuôn sang”.

Mơ̆ng klei bi tuôm hŏng khua mduôn, hưn kơ klei hdĭp, klei čiăng mơ̆ng mnuih ƀuôn sang leh anăn mơĭt kơ êpul kahan ksiêm să. Êjai mâo boh klei, pô mâo kơhưm mbĭt bruă Bruă sang čư̆ êa leh anăn kahan ksiêm nah gŭ klă anăp bi tuôm, hlăk mblang, mtrŭt mjhar, hrô kơ dŭm boh klei bluh mrâo hlăm wưng sui.

Hdră ngă bruă anei dưi bi lar boh tŭ dưn ti ƀuôn Ea Măp hlăm bruă msir boh klei djŏ tuôm hŏng klei đăo. mâo hŏng anei 7 thŭn, đa đa gŏ sang nao bi kƀĭn bruă klei đăo ka djŏ hŏng klei čuăn. Kahan ksiêm să Quảng Phú bi mguôp hŏng gưl bruă Đảng nah gŭ, Bruă sang čư̆ êa leh anăn phung mâo kơhưm čiăng bi tuôm, hâo hưn, mtô brei mnuih ƀuôn sang săng leh anăn ngă djŏ hŏng hdră bhiăn. Êbeh 200 čô leh anăn lŏ wĭt kƀĭn djŏ hŏng klei bhiăn.

Khua pô mtô Y Nuer Bdap, pô kiă sang Aê Diê Lutheran ƀuôn Êa Măp brei thâo, Bruă sang čư̆ êa leh anăn êpul kahan ksiêm jêñ jêñ bi trông, mtô brei klei ngă bruă djŏ hŏng klei čuăn. Ară anei klei bi hmô “Klei đăo kjăp - ƀuôn sang êđăp ênang” dôk mkŏ mjing hlăm ƀuôn, mđing truh êpul êya phung đăo bi mguôp, hdĭp siam đăo djŏ, ngă djŏ hdră bhiăn lăn čar leh anăn nao hgŭm răng mgang klei êđăp ênang.

“Phung đăo hơ̆k mơak êjai dưi mâok klei tŭ yap, dưi bi kƀĭn sa anôk. Grăp čô mtrŭt mjhar, mtă kơ hdơ̆ng pô hmư̆ klei ktrâo lač mơ̆ng Knŭk kna, kreh kriăng mă bruă knuă. Êjai klei bi hmô “Klei đăo kjăp, ƀuôn sang êđăp ênang dưi ba mdah”, mnuih ƀuôn sang dưi bi tuôm, jĕ giăm hŏng dŭm gưl bruă Knŭk kna mơ̆ng să truh ti čar. Phung đăo mâo klei hơĭt êdi”.

Leh bi mŭt mbĭt, să Quảng Phú (čar Dak Lak) mâo 37 alŭ ƀuôn hŏng giăm 62 êbâo čô mnuih ƀuôn sang, hlăm anăn mâo 9 ƀuôn lu jing mnuih Êđê. Alŭ wăl prŏng, mnuih ƀuôn sang lu jơr, mâo lu mta klei đăo ngă bruă bruă răng mgang klei êđăp ênang čiăng kơ knuă druh thâo klă alŭ wăl leh anăn săng kơ klei hdĭp êpul êya.

Jing sa čô mnuih Êđê, dưi hriăm bruă răng mgang klei êđăp ênang, Trung tá Y Dhăm Byă mâo klei găl thâo blŭ leh anăn thâo kơ knhuah gru, klei mưng. Čiăng thâo klă boh sĭt alŭ wăl, leh anăn msir boh klei mơ̆ng nah gŭ, ñu kreh nao ti grăp alŭ, ƀuôn, bi tuôm hŏng mnuih ƀuôn sang, khua mduôn, phung mâo kơhưm leh anăn ksiêm kơ phŭn agha boh klei. Trung tá Y Dhăm Byă brei thâo, mơ̆ng dŭm klei bi tuôm anăn, êpul kahan ksiêm să čŏng pô msir dŭm boh klei mâo mơ̆ng ƀuôn sang.

“Pô srăng jêñ jêñ jĕ giăm hŏng mnuih ƀuôn sang, mđing hmư̆ klei diñu čiăng, boh nik lŏ hâo hưn dŭm mta phŭn, hdră mtrŭn mơ̆ng gưl bruă nah dlông čiăng kơ mnuih ƀuôn sang thâo, leh anăn ngă djŏ hdră bhiăn lăn čar. Pô ăt srăng jĕ giăm, êmuh hrăm, bi trông klei hưn hŏng phung mâo kơhưm, khua mduôn, phung djă bruă brei diñu thâo, săng leh anăn mơ̆ng anăn ngă klei hâo hưn truh hŏng grăp čô mnuih ƀuôn sang ngă jăk hĭn.

Ti dŭm ƀuôn êlan mâo klei hdĭp dhar kreh, klei đăo lu jơr, răng mgang klei êđăp ênang kčưm mơ̆ng klei jĕ giăm leh anăn đăo knang. Hŏng Trung tá Y Dhăm Byă, anăn jing dŭm gưl nao ti ƀuôn, bi tuôm hŏng khua mduôn, phung mâo kơhưm, mđing hmư̆ mnuih ƀuôn sang čiăng hmao thâo klă leh anăn ruh mgaih boh klei mơ̆ng nah gŭ. Dŭm bruă ngă anăn đru bi hrŏ êwang kpleh plah wah knuă druh leh anăn mnuih ƀuôn sang. Klei knuă druh hnêč mmông mdei yang hruê nao duah sang mduôn ƀuôn ăt jing sa hdră hriăm leh anăn hluê ngă asăp Awa: jĕ giăm hŏng mnuih ƀuôn sang, čiăng krơ̆ng klei êđăp ênang mơ̆ng grăp ƀuôn sang./.