Ti krĭng wăl Sang mnă Thành Diên Khánh, leh êdeh mă lăn kuai ƀô lăn, êpul duah ƀuh yua wăng, knguôr, ƀaih leh anăn kƀiêng, hŏng klei mbruă mă ƀrư̆ ƀrư̆ dŭm tal lăn čiăng hrui mă. Lu klang leh brŭ, lŭ hlăm lăn, kyua anăn ya mta klang, êgei amâodah mnơ̆ng dhơ̆ng dưi ƀuh ăt ksiêm dlăng kjăp.

Čiăng bi mklă dŭm anôk mâo klei găl dưi ƀuh klang kleh, êpul tui duah hluê hŏng klei hâo hưn mơ̆ng phung tuôm hdĭp lehanăn mă bruă ti Ƀuôn prŏng đưm Diên Khánh. Sa hlăm dŭm čô anăn jing kahan hđăp Đinh Thanh Nhật, 63 thŭn, mâo êbeh 50 thŭn hdĭp ti krĭng anei. Ñu tuôm ƀuh leh dŭm klei bi blah djiêu ƀuôn prŏng lehanăn phung lĭng kahan djiê êngiă:

“Kâo mlam pĭt ăt dôk bi mĭn êjai ƀuh klei anăn, phung kahan mtlaih êngiê wĭt, diñu čŭt kăl sŏng đuč, asei mlei miă jŭ jih. Pap mñai êdi. Tơdah djiê adôk asei mlei sơnăn lĭng kahan knŭk kna hđăp mă ba hwiê ti tač, bi djŏ min mbha lu kdrêč snăn diñu kuai ƀăng dơr. Amâo thâo klă ôh ti anôk msat dôk, ti anôk tuôm diñu dơr tinăn. Tơdah lŏ hdơr ya klei, kâo srăng lŏ brei kơ dŭm anôk bruă djŏ tuôm.”

Huỳnh Bửu Đông, 62 thŭn, mâo êbeh 40 thŭn siă suôr hŏng Sang mnă Thành Diên Khánh. Êbeh 20 thŭn êlâo, êjai dôk mă bruă hlăm knơ̆ng bruă kahan ksiêm, ñu tuôm ƀuh leh klei ƀuh dua klang kleh hlăm hdră rŭ mdơ̆ng leh anăn mbĭt hŏng ƀĭng găp bi kƀĭn ba wĭt kơ msat. Ară anei pŏk ngă Hdră bruă 500 hruê mlam tui duah, bi kƀĭn klang kleh lĭng kahan djiê êngiă, ñu lŏ wĭt ti anôk hđăp čiăng đru kčĕ thiăm dŭm klei hâo hưn. Dôk ti anôk dôk tui duah, ñu Đông ktuê dlăng grăp tal lăn dưi kuai leh anăn ktrâo lač dŭm anôk pô adôk hdơr.

“Êlâo dih, krĭng anei giăm êa ksĭ, knơ̆ng bruă amâo mâo ngă ôh, knŏng pla djam. Êdei anei, êjai knơ̆ng bruă rŭ mdơ̆ng sang, êjai klei tur sang kâo ƀuh 1 klang kleh. Pŭ mă, nah gŭ lŏ ƀuh 1 klang kleh mkăn jing 2 klang kleh.”

Lê Văn Thành, 70 thŭn, hdĭp jĕ hŏng Sang mnă Thành Diên Khánh mơ̆ng điêt. Dŭm klei ñu thâo kơ sang mnă jing dŭm klei hâo hưn mâo boh tŭ yuôm, dôk mkăp kơ êpul tui duah, hrui kƀĭn ti nei:

"Sang mnă anei mâo mơ̆ng ênuk Prăng, leh truh ênuk Ngụy, mâo wưng phung mnă diñu bi mdjiê ti anăn mtam. Anôk anei krư̆ kơ phung Cách mạng amâodah đing gŏ sang mâo mnuih Cộng sản, diñu ba wĭt êmuh phat kđi, bi mklă klei soh čiăng phat mkra."

Mơ̆ng knhal jih mlan 8, klei kuai mă mphŭn kčưm, ti 5 anôk ƀuh klang lehanăn mnơ̆ng dhơ̆ng. Leh kơ anăn, ênhă kuai mă pŏk prŏng hlăm brô 300 m2, grăp hruê êbeh 70 čô mnuih mă bruă. Êdeh wai jơ̆ng knŏng kuai lăn nah dlông; trŭn êlam hĭn, êpul tui duah kuai hŏng kngan, ksiêm dlăng grăp tal lăn. Ênoh êlam kreh mâo mơ̆ng 2 truh 2.5 met. Leh lu thŭn, klang êbuh, snăn hdră kuai mă hŏng klei êmưt, ksiêm dlăng grăp klei bi knăl. Krah tal lăn jŭ, sa klei bi knăl dưi ƀuh. Pô gĭt gai kŭp kŏ dlăng lehanăn lač:

“Ơ ƀuh mâo êgei anei leh, yuôm êdi lah! Mă hla čhiăm gru ba ti anei adei ah!”

Sa pŏk hla čhiăm gru dưi dưm ti anôk ƀuh. Wăng, knguôr dưi bi mlih hŏng ƀaih leh anăn kƀu. Lăn djiêu anôk mnơ̆ng đưm dưi kwă ƀrư̆ ƀrư̆ čiăng rơ̆ng kơ klang adôk.

 Ngô Thị Xuân, mâo ama jing kahan êka êkeh Ngô Quang Trung djiê êngiă ti ƀuôn hgŭm Diên Khánh, ăt hriê đru hlăm hdră tui duah. Êbeh 50 thŭn êgao, gŏ sang ăt rŭng răng ka dưi ƀuh klang kleh mơ̆ng ñu. Aduôn lŏ brei thâo thiăm klei hâo hưn kơ phung mnă cách mạng tuôm dơr leh ƀĭng kahan tinei:

“Êlâo dih kâo mâo ksiêm êmuh, phung knuă druh hlăm sang mnă mâo mbha bruă tơdah mâo hlei pô djiê snăn ba kơ anôk anei, kuai lăn čiăng dơr hĕ. Đăm brei  kơ phung roh ba asei mlei kơ hang krông Cái, huĭ êa đoh hĕ. Ƀĭng kahan hlăm mnă huĭ luč asei mlei snăn tlĕ dơr. Bruă kuai dơr anăn amâo mâo êlam ôh, êgao hruê mlan kyua tuh lăn snăn êlam hĭn. 15 čô luč hlăm anei”.

36 anôk dưi ƀuh klang kleh, ƀiădah klei hâo hưn kơ 15 čô mnuih luič ti Sang mnă Thành Diên Khánh ăt dôk ksiêm dlăng. Êbeh mkrah êklai thŭn leh êgao, lăn dưi guôm hĕ gru grua, ƀiădah klei hdơr kơ phung săn asei ăt dôk nanao. Mơ̆ng dŭm klei yăl dliê mơ̆ng mnuih adôk hdĭp, êpul tui duah lŏ dơ̆ng tui duah grăp gru grua ti gŭ lăn Ƀuôn prŏng đưm Diên Khánh, hŏng klei čang hmăng êdu êun ƀiădah yuôm bhăn: ba phung djiê leh wĭt hŏng anăn, hŏng ƀuôn sang leh anăn ƀĭng găp.