Leh êbeh sa thŭn ngă klei bi hmô bruă sang čư̆ êa alŭ wăl 2 gưl, Lâm Đồng ăt dôk mâo lu klei gun kpăk hlăm bruă kriê dlăng lăn ala. Dŭm pluh êbâo ha lăn čuăl mkă mă boh tâo bosit, titan pluă mbĭt hŏng anôk mnuih ƀuôn sang dôk, ƀuôn prŏng leh anăn anôk bruă nah gŭ; dŭm êbâo gŏ êsei mnuih ƀuôn sang dôk hdĭp hlăm lăn dliê amâo dah ti dŭm anôk ka dưi čuăl mkă anôk mnuih ƀuôn sang dôk. Lu ênhă lăn ngă bruă lŏ hma dôk bi mmiă hŏng anôk bruă lŏ hma, dliê kmrơ̆ng.

Bon Yô Soan, Kiăng khua Dhar bruă mặt trận čar Lâm Đồng brei thâo, hdră bhiăn lăn ala thŭn 2024 leh anăn dŭm hră mơar ktrâo lač mjing leh klei bi mlih jăk, ƀiădah klei hlue ngă ăt mâo dŭm klei êdu kƀah hdră bhiăn leh anăn hdră ba yua ka sa hnơ̆ng, boh nik hŏng dŭm klei dôk mâo mơ̆ng êlâo:

“Mnuih ƀuôn sang čang hmăng kơ bruă kƀĭn ala, knŭk kna leh anăn dŭm phŭn, dhar bruă gưl dlông lŏ dơ̆ng ksiêm dlăng, bi leh dŭm klei bhiăn mơ̆ng hdră bhiăn lăn ala hluê hdră klă mngač, sa hnơ̆ng, ênưih ba yua, mbĭt anăn mâo hdră msir mghaih hŏng dŭm boh klei hŏng hƀuê ênuk sui čiăng ñĕ kơ klei kčŭt hưn, rơ̆ng klei dưi leh anăn klei tŭ dưn djŏ hdră bhiăn mơ̆ng mnuih ƀuôn sang.”

Ktuê dlăng Klei bi kƀĭn amâo mâo bhiăn tal sa, bruă kƀĭn ala gưl XVI, phung bi ala čar Lâm Đồng bi êdah klei čang hmăng hdră êlan klei bhiăn mkra mlih hdră bhiăn lăn ala thŭn 2024 mơ̆ng bruă kƀĭn ala leh anăn knŭk kna srăng dưi bi lar ai dưi lăn ala kơ ênuk đĭ kyar mrâo.

Bi hŏng ênoh lăn, phung bi ala bruă sang čư̆ êa leh anăn anôk bruă djŏ tuôm čar Lâm Đồng akâo kơ knŭk kna bi sa hnơ̆ng hdră êlan gĭt gai, mđing truh kơ sa ênoh lăn klă mngač. Mbĭt anăn, brei bi leh klei čih pioh kơ lăn ala čiăng hưn mdah klei hâo hưn, mjing klei găl kơ dŭm klei bi mnia mblei msĕ si bi mlih, dưn yua klei dưi yua lăn leh anăn bi hrŏ klei mâo hlăm klei kiă kriê.

Lê Trọng Yên, k'iăng khua bruă sang čư̆ êa čar Lâm Đồng lač klei akâo kơ hdră êlan hrui wĭt lăn mâo wưng kčah hŏng dŭm hdră bruă, boh nik hdră bruă mă mnơ̆ng hlăm gŭ lăn:

“Dŭm hdră bruă mnơ̆ng hlăm gŭ lăn drei hrui wĭt lăn hơĭt kjăp jing dleh êdi. Kyua dah mnuih ƀuôn sang arăng hrui wĭt leh lăn snăn drei bi mâo hdră duh ƀơ̆ng kơ mnuih ƀuôn sang snăn ya ngă drei amâo mâo hdră êlan, hdră mtrŭn kơ klei hrui wĭt lăn mâo wưng kčah. Klei mkra mlih hdră bhiăn lăn ala hrui wĭt lăn mâo wưng kčah srăng dưi bi hrŏ klei čiu hnô đru kơ anôk dôk mrâo leh anăn bi hrŏ prăk bi liê kơ ênoh mơ̆ng alumin”.