Ti msat lĭng kahan djiê êngiă Bảo Lộc, anôk dơr 740 čô lĭng kahan djiê êngiă, hlăm anăn 102 boh msat ka dưi bi mklă klei hâo hưn, bruă sang čư̆ êa alŭ wăl bi hgŭm kjăp hŏng êpul lĭng kahan čar Lâm Đồng hluê ngă bruă mă mta ksiêm mkă. Nguyễn Thị Huyền Phương, K''iăng khua bruă sang čư̆ êa ƀuôn hgŭm 3 - Bảo Lộc, brei thâo:

“Mkŏ mjing klei mă mta ksiêm mkă ti Wăl msat kahan djiê êngiă Bảo Lộc, Knơ̆ng bruă sang čư̆ êa ƀuôn hgŭm gĭt gai leh Anôk bruă gĭt gai lĭng kahan ƀuôn hgŭm 3 - Bảo Lộc rơ̆ng kơ anôk bruă nah gŭ, djăp klei găl bi hgŭm hŏng Anôk bruă gĭt gai lĭng kahan čar pŏk ngă bruă mă mta ksiêm mkă klang kleh phung kahan djiê êngiă, đru bi klă anăn phung kahan djiê êngiă, ba wĭt phung ayŏng adei hŏng gŏ sang, bi êdah knhuah gru, klei bhiăn hdĭp mda "Mnăm êa hdơr kơ hnoh" mơ̆ng djuê ana".

Bruă dưi pŏk ngă mđrăm mbĭt ti 11 msat lĭng kahan djiê êngiă hlăm alŭ wăl čar Lâm Đồng. Boh tŭ, 4.776 msat lĭng kahan djiê êngiă ka bi mklă klei hâo hưn dưi mă mta ksiêm dlăng. Hlăm anăn, 3.625 msat mâo mta sinh phẩm djăp klei găl ksiêm mkă ADN. Đại tá Phạm Văn Soái, K'iăng khua bruă kđi čar, Knơ̆ng gĭt gai lĭng kahan čar Lâm Đồng, hâo hưn:

“Lâm Đồng jing sa hlăm dŭm čar bi leh hnưm hĭn bruă mă mta ksiêm mkă. Boh tŭ dưn anei dưi mâo kyua klei uêñ mĭn mơ̆ng Khua gĭt gai bruă Đảng čar, Êpul gơ̆ng bruă ƀuôn sang, Knơ̆ng bruă sang čư̆ êa, Dhar bruă mặt trận čar kwar Việt Nam čar; boh nik jing klei gĭr, ktuh êyuh klă sĭt jing phung knuă druh, lĭng kahan čar. Wăt tơdah adiê mđiă hjan, dôk mâo lu klei dleh dlan, hmei ăt gĭr bi leh bruă klam hnưm".

Tơdah ti dŭm msat lĭng kahan, dleh dlan jing klei kčah mtrŭn kơ hdră ngă bruă, hnơ̆ng ngă bruă, snăn duah klang kleh lĭng kahan êngiă asei êngao kơ anôk klă klơ̆ng lŏ dleh dlan hĭn. Leh dŭm pluh thŭn, lăn ala lu anôk mâo klei bi mlih; anôk dơr klang kleh êlâo dih năng ai ară anei jing dliê kyâo, lăn pla mjing, krĭng mnuih ƀuôn sang dôk amâodah sang ală kĭng. Phŭn klei hâo hưn lu jing mơ̆ng hră mơar hđăp, klei hdơr mơ̆ng lĭng kahan leh anăn mnuih ƀuôn sang, hlăk êjai pô hưn mdah ƀrư̆ hruê ƀrư̆ ƀiă. Hjan sui ngă kơ bruă ksiêm dlăng, klei duah ti dlông čư̆, lăn pla mjing lŏ dleh dlan; mâo anôk brei bi mklă lu blư̆, pŏk mlar anôk duah kơh dưi ƀuh klei bi knăl.

Hŏng phung knuă druh, lĭng kahan klam ngă, anei amâo djŏ knŏng jing bruă klam thơ̆ng kơ bruă ôh ƀiădah lŏ jing bruă klam hŏng phung săn leh asei. Thượng tá Phạm Ngọc Khánh, Kiăng khua bruă kđi čar hlăm knơ̆ng gĭt gai lĭng kahan răng mgang knông lăn alŭ wăl 1 Đức Trọng, čar Lâm Đồng, lač:

“Hŏng grăp čô êjai mâo jao bruă klam, grăp čô ƀuh klei ktưn hưn leh anăn thâo klă bruă klam êjai mâo klei đăo knang jao ngă sa bruă yuôm bhăn snăk”.

Găn dŭm hruê adiê hjan angĭn êbŭ, Lâm Đồng bi leh hnưm hlăm brô 3 mlan bruă mă mta ksiêm mkă ti 11 msat lĭng kahan. 3.625 mta klang lĭng kahan dưi ba jao mkăp kơ bruă ksiêm mkă ADN, pŏk thiăm klei čang hmăng bi klă anăn kơ dŭm msat ka mâo anăn, mbĭt anăn lŏ dơ̆ng đru kơ hdră tui duah, bi kƀĭn phung lĭng kahan djiê êngiă adôk dôk ti tač.

Ti anăp ăt dôk lu bruă klam, ƀiădah hŏng klei gĭr leh anăn bruă klam, hdră ba phung kahan djiê êngiă wĭt hŏng anăn, gŏ sang leh anăn ƀuôn sang ăt dôk dưi lŏ dơ̆ng grăp hruê.