Hlăm sang mrâo prŏng siam, khua mduôn Kră Jăn Ha Nhang, ƀuôn Đam Pao, să Phú Sơn Lâm Hà, čar Lâm Đồng, ăt pioh lu mmông kơ bruă mâo khua mduôn yap jing bruă klam mơ̆ng pô: mtrŭt mjhar mnuih ƀuôn sang kriê pioh bruă djuê ana. Gŏ sang khua mduôn mâo giăm 5ha kphê, hlăm brô 100 phŭn durian leh anăn bruă pơ̆k mñam đru kơ klei hdĭp hơĭt kjăp. Ƀiădah klei khua mduôn mĭn jăk hĭn jing hlăm wăl sang pô, khua mduôn mdơ̆ng leh sa boh sang djuê ana, rang mdah čing čhar, mnơ̆ng dhơ̆ng mkra hŏng kiê kngan leh anăn dŭm mta mnơ̆ng djŏ tuôm hŏng klei hdĭp mơ̆ng mnuih K'Ho djuê ana Cil.

Mơ̆ng bruă ngă mơ̆ng pô, khua mduôn Kră Jăn Ha Nhang mtrŭt mjhar mnuih ƀuôn sang hrăm mbĭt kriê pioh bruă pơ̆k mñam. Leh anăn năng mơak êjai ti alŭ Đam Pao, bruă pơ̆k mñam ăt mâo lu gŏ sang krơ̆ng kjăp:

“Tinei jing giăm 300 gŏ êsei mnuih djuê ƀiă, mkra mjing mnơ̆ng pơ̆k mñam êbeh 225 gŏ êsei. Phung hđeh mơ̆ng 15 thŭn truh kơ phung aduôn 70, 80 thŭn ăt pơ̆k mñam jih. Phung aduôn ăt yua mmông wăn mkra mjing ti sang mñam, pơ̆k mñam leh ăt iêô jing čhĭ 300, 400 tui hluê mta ăt mâo hnư hrui wĭt hơĭt mơh”.

Klei yăl dliê ti Đam Pao brei ƀuh, djă pioh bruă djuê ana ăt jing djă pioh sa kdrêč dhar kreh hlăm klei hdĭp hruê anei, boh nik hlăk bruă pơ̆k mñam đru kơ mnuih ƀuôn sang mâo thiăm prăk hrui wĭt leh anăn mtô bruă kơ phung mda asei.

Hŏng mnuih mâo kơhưm, klei thâo mbruă êlâo hĭn kbiă hriê mơ̆ng bruă bi hmô. Tơdah khua mduôn ngă êlâo, blŭ hŏng dŭm klei jĕ giăm hŏng klei hdĭp leh anăn hrăm mbĭt hŏng mnuih ƀuôn sang msir mghaih dŭm bruă klă klơ̆ng, klei blŭ anăn ênưih mŭt hlăm êpul êya hĭn. Anei ăt jing klei bruă sang čư̆ êa nah gŭ ti Phú Sơn Lâm Hà čih yap klă hlăm hdră lŏ mkŏ dăp krĭng mnuih ƀuôn sang dôk, mkŏ mjing anôk bruă leh anăn dŭm alŭ.

Ayŏng Ha Mi, knuă druh Adŭ bruă Dhar kreh - ala ƀuôn să Phú Sơn Lâm Hà, brei thâo: ti 4 alŭ mâo lu mnuih djuê ƀiă, klei blŭ khua mduôn mâo klei hmăi prŏng hlăm hdră mtô mblang, mtrŭt mjhar mnuih ƀuôn sang.

"Hlăm klei bi kƀĭn ƀuôn sang blŭ snăn mnuih ƀuôn sang đăo knang snăk hŏng hdră mtô mblang, hdră mtrŭt mjhar, mtô mblang mơ̆ng khua mduôn, bi êdah dŭm hdră ngă bruă jăk bruă duh mkra, kriê pioh dhar kreh djuê ana leh anăn wăt kơ bruă kđi čar, klei êđăp ênang yang ƀuôn. Khua mduôn ăt hur har êdi lač kơ ai tiê klei mĭn mơ̆ng ƀuôn sang".

Bi mklă mnuih mâo kơhưm jing kdrông mkŏ plah wah gưl bruă Đảng, bruă sang čư̆ êa hŏng mnuih ƀuôn sang, dŭm thŭn êgao, dŭm gưl bruă Đảng, bruă sang čư̆ êa leh anăn êpul êya čar Lâm Đồng mđing hluê ngă djăp ênŭm hdră mtrŭn hluê si klei kčah mtrŭn; hlăm anăn mâo mkăp klei hâo hưn, mjuăt bi hriăm klei thâo, kriê dlăng klei hdĭp mnơ̆ng dhơ̆ng leh anăn ai tiê klei mĭn. Leh anăn yuôm bhăn hĭn jing mjing klei găl čiăng kơ êpul anei mđĭ lar bruă klam ti alŭ wăl.

Ti să dleh dlan Sơn Điền, Trịnh Văn Dũng, Khua adŭ bruă dhar kreh - ala ƀuôn să, brei thâo, bruă bi mguôp hŏng phung khua mduôn, mnuih mâo kơhưm dưi krơ̆ng nanao. Bruă sang čư̆ êa iêô mnuih mâo kơhưm nao hgŭm hlăm dŭm klei bi kƀĭn, mkăp klei hâo hưn kơ hdră êlan mơ̆ng Đảng, hdră bhiăn mơ̆ng Knŭk kna čiăng kơ dŭm mta anei dưi ba truh kơ mnuih ƀuôn sang hŏng hdră blŭ jĕ giăm, ênưih thâo săng.

"Mơ̆ng akŏ thŭn ƀuôn hgŭm mkŏ mjing leh hdră êlan kriê dlăng mnuih mâo kơhưm hlăm alŭ wăl ăt msĕ mơh bruă bi mguôp. Hlăm dŭm klei bi kƀĭn bruă Đảng, bruă sang čư̆ êa ƀuôn hgŭm ăt iêo jak mnuih mâo kơhưm hlăm alŭ wăl nao hgŭm hlăm dŭm klei bi kƀĭn čiăng mâo mta phŭn bi trông, mđing hmư̆ ăt msĕ mơh păn kjăp kơ hdră êlan mtrŭn mơ̆ng Đảng, hdră bhiăn mơ̆ng Knŭk kna čiăng hâo hưn kơ mnuih ƀuôn sang hlăm alŭ wăl ƀuôn hgŭm Sơn Điền".

Mơ̆ng hdră mtrŭt mjhar mđĭ kyar bruă duh mkra, kriê pioh dhar kreh truh kơ msir mghaih klei amâo thâo bi djŏ, hâo hưn mtô mblang hdră bhiăn, gang mkhư̆ klei amâo jăk hlăm yang ƀuôn leh anăn nao hgŭm hlăm dŭm gru hmô čŏng kriê dlăng kơ klei êđăp ênang, klei êđăp ênang yang ƀuôn, bruă klam mơ̆ng phung mâo kơhưm dôk klă sĭt ti lu mta bruă hlăm klei hdĭp êpul êya ti dŭm ƀuôn sang mơ̆ng čar Lâm Đồng.

Leh mkŏ dăp anôk bruă knŭk kna, Lâm Đồng mâo alŭ wăl prŏng, êpul êya mnuih ƀuôn sang lu jơr, hŏng lu krĭng mnuih djuê ƀiă hdĭp mda. Bùi Ngọc Sơn, Kiăng Khua Knơ̆ng bruă djuê ana leh anăn klei đăo čar Lâm Đồng, brei thâo, bruă mđĭ lar bruă klam mơ̆ng phung mâo êpul êya đăo knang ƀrư̆ mâo boh tŭ yuôm hlăm bruă ba hdră êlan truh giăm mnuih ƀuôn sang leh anăn hưn mdah klei mĭn, klei čiăng mơ̆ng nah gŭ.

“Leh hluê ngă klei bi mŭt mbĭt čar êpul kahan hđăp hlăm alŭ wăl čar jing mâo 883 čô. Mnuih mâo kơhưm bi êdah bruă klam hlăm klei đru mguôp mkŏ mkra, ktrâo lač, hâo hưn mtrŭt mjhar mnuih ƀuôn sang nao hgŭm hlăm dŭm hdră êlan mtrŭn mơ̆ng Đảng ăt msĕ mơh hdră bhiăn knŭk kna. Mnuih mâo kơhưm hâo hưn dŭm gru hmô jăk leh anăn mnuih jăk bruă jăk, ktrâo lač hlăm klei mkra mjing, hdră duh ƀơ̆ng kơ mnuih ƀuôn sang leh anăn nao hgŭm răng mgang klei êđăp ênang ti alŭ wăl.”

Lŏ čuê klei mđing dlăng mơ̆ng Đảng, Knŭk kna hŏng bruă klam mơ̆ng mnuih mâo khưm hlăm êpul êya, hruê 20/9/2026, Hdră mtrŭn mrô 307 mơ̆ng Knŭk kna klă klơ̆ng mâo klei tŭ dưn kčah mtrŭn hdră êlan kơ mnuih mâo khưm hlăm krĭng mnuih djuê ƀiă. Hŏng hnơ̆ng đru kơ klei hâo hưn, đru kơ mnơ̆ng dhơ̆ng, mđĭ ai dưi mđĭ hĭn. Anei jing tur knơ̆ng čiăng kơ čar Lâm Đồng lŏ dơ̆ng hluê ngă jăk hdră êlan hŏng mnuih mâo khưm, mbĭt anăn ăt jing boh kdrŭt čiăng kơ mnuih mâo khưm ti alŭ wăl mđĭ lar hĭn bruă klam mdê hjăn ti nah gŭ.